Whẹdatọ lẹ 12:1-15
12 Enẹgodo, sunnu Eflaimi tọn lẹ bẹ yede pli dopọ, yé sọ dasá tọ̀sisa lọ yì Zafoni* bo dọna Jẹfta dọmọ: “Naegbọn hiẹ do dasá bo yì hoavùn hẹ Amọninu lẹ, bọ hiẹ ma ylọ mí nado hodo we yì?+ Míwlẹ na fiọ ohọ̀ towe do ota na we.”
2 Ṣigba, Jẹfta dọna yé dọmọ: “Okẹ̀n daho mẹ wẹ yẹn po omẹ ṣie lẹ po tin te hẹ Amọninu lẹ. Yẹn dowẹn hlan mì na alọgọ, ṣigba mìwlẹ ma whlẹn mi sọn alọ yetọn mẹ.
3 To whenue yẹn mọdọ mìwlẹ ma na whlẹn mi, yẹn gbọ bo magbe nado ze ogbẹ̀ ṣie do owù mẹ* bo tọ́nawhàn Amọninu lẹ+ bọ Jehovah sọ jo yé do alọ ṣie mẹ. Todin, naegbọn mìwlẹ do wá nado hoavùn hẹ mi to egbé?”
4 Enẹgodo, Jẹfta bẹ sunnu Giliadi tọn lẹpo pli+ bọ yé hoavùn hẹ Eflaimi; sunnu Giliadi tọn lẹ sọ gbawhàn omẹ Eflaimi tọn lẹ tọn he dọmọ: “Mẹhe jẹgbé sọn Eflaimi wẹ mì Giliadinu lẹ yin poun to aigba Eflaimi po Manasse po tọn ji.”
5 Giliadi gbòalina omẹ Eflaimi tọn lẹ to fie tọ̀sisa Jọdani ma siso te lẹ;+ podọ eyin sunnu Eflaimi tọn lẹ to tintẹnpọn nado họ̀ngán, yé nọ dọ, “Mì dike mí ni gbọn fi dasá”; whenẹnu sunnu Giliadi tọn lẹ nọ kanse dopodopo yetọn dọ, “Eflaiminu de wẹ hiẹ ya?” Eyin e gblọn dọ, “Lala!”
6 yé nọ dọna ẹn dọ, “Jaale, dọ Ṣibolẹti.” Ṣigba, ewọ nọ dọ, “Sibolẹti,” na e ma penugo nado ylọ hogbe lọ ganji wutu. Whenẹnu, yé nọ wle e bo nọ hù i to fie tọ̀sisa Jọdani ma siso te lẹ. Enẹwutu, Eflaiminu 42 000 wẹ yin hùhù to ojlẹ enẹ mẹ.
7 Jẹfta dawhẹ to Islaeli na owhe ṣidopo, enẹgodo Jẹfta Giliadinu lọ kú bo yin dìdì do tòdaho etọn mẹ to Giliadi.
8 To ewọ godo, Ibzani sọn Bẹtlẹhẹm jẹ whẹda ji to Islaeli.+
9 E tindo visunnu 30 podọ viyọnnu 30. E sọ do viyọnnu etọn lẹ hlan nado dà asu sọn akọ̀ devo mẹ, bo plan yọnnu 30 wá nado dà visunnu etọn lẹ. Ewọ dawhẹ to Islaeli na owhe ṣinawe.
10 Enẹgodo, Ibzani kú bo yin dìdì do Bẹtlẹhẹm.
11 To ewọ godo, Elọni Zebuluninu lọ jẹ whẹda ji to Islaeli; ewọ dawhẹ to Islaeli na owhe ao.
12 Enẹgodo, Elọni Zebuluninu lọ kú bo yin dìdì do Aijalọni to aigba Zebuluni tọn ji.
13 To ewọ godo, Abdọni visunnu Hilẹli Pilatoninu lọ tọn jẹ whẹda ji to Islaeli.
14 E tindo visunnu 40 podọ ovivi sunnu 30 he nọ kùn kẹtẹkẹtẹ 70. E dawhẹ to Islaeli na owhe ṣinatọ̀n.
15 Enẹgodo, Abdọni visunnu Hilẹli Pilatoninu lọ tọn kú bo yin dìdì do Pilatoni to aigba Eflaimi tọn ji to osó Amalẹkinu+ lẹ tọn mẹ.
