Whẹdatọ lẹ 19:1-30
-
Bẹnjamininu lẹ hùwhẹ zanhẹmẹ tọn to Gibea (1-30)
19 To azán enẹlẹ gbè, whenue ahọlu de ma tin to Islaeli,+ Levinu de he nọ nọ̀ fidindẹn de to lẹdo osó tọn Eflaimi tọn mẹ+ to whenẹnu dà yọnnu de sọn Bẹtlẹhẹm+ to Juda taidi asimọwhlá.
2 Ṣigba, yọnnu lọ ma yin nugbonọ na ẹn bo jo e do bosọ yì owhé otọ́ etọn tọn gbè to Bẹtlẹhẹm to Juda. E sọ gbọṣi finẹ na osun ẹnẹ.
3 Enẹgodo, asu etọn doafọna ẹn nado diọlinlẹnna ẹn na e nido lẹkọwa; devizọnwatọ etọn sunnu de sọ hodo e bọ yé hẹn kẹtẹkẹtẹ awe. Yọnnu lọ sọ plan ẹn biọ owhé otọ́ etọn tọn gbè. To whenue otọ́ yọnnu lọ tọn mọ ẹn, homẹ etọn hùn.
4 Enẹwutu, asi-tọ́ etọn, yèdọ otọ́ yọnnu jọja lọ tọn, vẹ̀ ẹ nado gbọṣi e dè na azán atọ̀n; yé sọ nọ dù bo nọ nù, bọ ewọ nọ dọ́ finẹ.
5 To azán ẹnẹtọ gbè, to whenue yé fọ́n to afọnnu fuu nado yì, otọ́ yọnnu jọja lọ tọn dọna ovisu etọn dọmọ: “Dùnú nado mọ huhlọn,* enẹgodo mì sọgan wleali.”
6 Enẹwutu, yé sinai bọ yé omẹ awe lẹ dù bosọ nù dopọ; enẹgodo otọ́ yọnnu jọja lọ tọn dọna sunnu lọ dọmọ: “Jaale, dọ́ jẹ osọ bo dugbẹ vude.”*
7 To whenue sunnu lọ fọ́n nado yì, asi-tọ́ etọn to vivẹ̀ ẹ mapote, bọ ewọ sọ dọ́ whladopo dogọ.
8 To whenue e fọ́n to afọnnu fuu nado yì to azán atọ́ntọ gbè, otọ́ yọnnu jọja lọ tọn dọmọ: “Jaale, dùnú nado mọ huhlọn.”* Yé sọ dọngbàn kakajẹ whèlẹkọ, bọ yé omẹ awe lẹ to dùdù.
9 To whenue sunnu lọ fọ́n nado yì, yèdọ ewọ, asimọwhlá etọn po devizọnwatọ etọn po, asi-tọ́ etọn, yèdọ otọ́ yọnnu jọja lọ tọn, dọna ẹn dọmọ: “Pọ́n! Tenu ko to dido. Mì jaale bo dọ́ jẹ osọ. Owhè ko dibla jai todin. Dọ́ jẹ osọ bo dugbẹ vude. Eyin e jẹ osọ, mìwlẹ sọgan fọ́nzán bo bẹ gbejizọnlin mìtọn dedo owhé mìtọn gbè.”*
10 Ṣigba, sunnu lọ masọ jlo na dọ́ ba, enẹwutu e fọ́n bo zingbejizọnlin kakajẹ Jẹbusi, yèdọ Jelusalẹm.+ Asimọwhlá etọn po devizọnwatọ etọn po sọ hodo e bọ yé hẹn kẹtẹkẹtẹ awe lọ lẹ he ko yin awuwlena na gbejizọnlin.
11 To whenue yé dọnsẹpọ Jẹbusi, owhè ko dibla jai pete. Enẹwutu, devizọnwatọ lọ dọna klunọ etọn dọmọ: “Be mí ma na zẹ̀ biọ tòdaho Jẹbusinu lẹ tọn ehe mẹ bo dọ́ finẹ jẹ osọ?”
12 Ṣigba, klunọ etọn dọna ẹn dọmọ: “Mí ni ma zẹ̀ biọ tòdaho jonọ he ma yin Islaelivi lẹ tọn de mẹ blo. Mí ni dlí yì Gibea.”+
13 Whenẹnu, e dọna devizọnwatọ etọn dọmọ: “Gbọ mí ni tẹnpọn bo yì dopo to nọtẹn ehelẹ mẹ; mí na dọ́ Gibea kavi Lama+ jẹ wunkẹngbe.”
14 Enẹwutu, yé zindonukọn, podọ owhè ko to họyì to whenue yé sẹpọ Gibea he yin Bẹnjamini tọn.
15 Whenẹnu, yé zẹ̀ biọ Gibea nado dọ́ finẹ. To whenue yé biọ tòdaho lọ mẹ, yé sinai to tòplitẹn etọn, ṣigba mẹdepope ma yí yé do whégbè na yé nido dọ́ jẹ wunkẹngbe.+
16 To godo mẹ to whèjai, dawe yọnhonọ de lẹkọ sọn azọ́nwa gbé to glemẹ. Lẹdo osó tọn Eflaimi tọn mẹ+ wẹ dawe lọ wá sọn bo ko to Gibea na ojlẹ de; ṣigba mẹhe nọ nọ̀ tòdaho lọ mẹ lẹ yin Bẹnjamininu lẹ.+
17 To whenue dawe yọnhonọ lọ ze nukun etọn daga bo mọ dawe he to gbejizọnlinzin lọ to tòplitẹn tòdaho lọ tọn, e dọmọ: “Fie wẹ hiẹ jei, podọ fie wẹ a wá sọn?”
18 Ewọ sọ gblọnna ẹn dọmọ: “Bẹtlẹhẹm wẹ mí tlọ́n to Juda bo wá jei fidindẹn de to lẹdo osó tọn Eflaimi tọn mẹ, fie yẹn wá sọn. Bẹtlẹhẹm wẹ n’yì to Juda+ bo wá jei ohọ̀* Jehovah tọn mẹ, ṣigba mẹdepope ma yí mi do whégbè.
19 Mí tindo núyọ po núdùdù po na kẹtẹkẹtẹ mítọn lẹ,+ podọ akla+ po ovẹn po sọ tin na yẹn po yọnnu lọ po gọna devizọnwatọ mítọn. Nudepope ma whè do mí.”
20 Ṣigba, dawe yọnhonọ lọ dọmọ: “Jijọho ni tin hlan we! Gbọ yẹn ni penukundo nudepope he whè do we go. Ṣigba, ma dọ́ tòplitẹn gbede blo.”
21 Enẹwutu, e plan ẹn yì owhé etọn gbè bo na núdùdù* kẹtẹkẹtẹ lọ lẹ. Enẹgodo, yé klọ́ afọ yetọn lẹ bo dù bosọ nù.
22 Dile yé to gbẹdu, sunnu nuvọ́nọ tòdaho lọ mẹ tọn delẹ lẹdo owhé lọ bo to ohọ̀n lọ húhú po zingidi po, yé sọ to didọ mapote na dawe yọnhonọ he yin whétọ lọ dọmọ: “De sunnu he wá owhé towe gbè lọ tọ́n, na mí nido zanhẹ ẹ.”+
23 Whenẹnu, whétọ lọ tọ́n bo dọna yé dọmọ: “Lala, mẹmẹsunnu ṣie lẹ, mì ma yinuwa po kanyinylan po blo. Mì jaale, jonọ de wẹ dawe ehe yin to owhé ṣie gbè. Mì ma wà nuhe huwinyan ehe blo.
24 Viyọnnu ṣie he gbẹ́ pò to alọji po asimọwhlá dawe lọ tọn po tin tofi. Mì gbọ yẹn ni de yé tọ́n, na mì ni dowinyan yé, eyin e jlo mì.*+ Ṣigba, mì wà nuhe huwinyan ehe na dawe ehe blo.”
25 Ṣigba, sunnu lọ lẹ ma jlo na dotoaina ẹn, enẹwutu dawe jonọ lọ plan asimọwhlá etọn+ bo hẹn ẹn jẹgbonu na yé. Yé sọ zanhẹ ẹ gánnugánnu bo to kọndopọ zanhẹmẹ tọn tindo hẹ ẹ to ozán lọ blebu mẹ kaka ai do họ́n. Enẹgodo, yé jo e do nado yì to whenuena ai jẹ hinhọ́n ji.
26 Yọnnu lọ lẹkọwa to afọnnu fuu bo họ́jai do họntonu dawe lọ tọn fie klunọ etọn te bosọ gbọṣi finẹ kaka owùn do kẹ̀n pete.
27 To whenue klunọ etọn fọ́n to afọnnu bo hùnhọ̀n nado tọ́n bo wleali, e mọ yọnnu lọ, yèdọ asimọwhlá etọn, to aimimlọn to họntonu bọ alọ etọn lẹ to pèkán lọ ji.
28 Enẹwutu, e dọna yọnnu lọ dọmọ: “Fọ́n; gbọ mí ni yì.” Ṣigba, mẹde ma yigbena ẹn. To whenẹnu, dawe lọ ze e do kẹtẹkẹtẹ ji bo dedo whé.
29 To whenue e jẹ owhé etọn gbè, e yí ohí de bo ze oṣiọ asimọwhlá etọn tọn bosọ já ẹ do 12, enẹgodo e do dopodopo hlan aigba Islaeli tọn lẹpo ji.
30 Mẹdepope he mọ ehe nọ dọmọ: “Onú ehe nkọtọn de ma ko jọ kavi yin mimọ pọ́n sọn whenue gbọ́n Islaelivi lẹ ko hẹji sọn aigba Egipti tọn ji kakajẹ egbehe. Mì lẹnnupọndeji* bo dewé+ bosọ dọ nuhe dona yin wiwà lọ na mí.”
Nudọnamẹ Odò Tọn
^ Kavi “nado hẹn ahun towe dogbẹ̀.”
^ Kavi “bo hẹn ahun towe jaya.”
^ Kavi “nado hẹn ahun towe dogbẹ̀.”
^ To paa mẹ, “dedo gòhọ mìtọn mẹ.”
^ Kavi vlavo, “bo nọ wà sinsẹ̀nzọn to ohọ̀.”
^ Kavi “ogbé flusọ́.”
^ Kavi “na mì ni zanhẹ yé gánnugánnu bo wà nuhe yọ́n to nukun mìtọn mẹ.”
^ Kavi “Mì ze ahun mìtọn do e ji.”
