Yẹwhehodọtọ 2:1-26
2 Whenẹnu wẹ yẹn dọ to ahun ṣie mẹ dọmọ: “Wá bo gbọ yẹn ni tẹ́n awuvivinu* lẹ pọ́n bo mọ dagbe he to e mẹ.” Ṣigba pọ́n! Ovọ́ wẹ enẹ lọsu.
2 Yẹn dọ gando nukiko go dọmọ, “Nulú wẹ!”
Podọ gando awuvivi* go dọmọ, “Ale tẹwẹ tin to e mẹ?”
3 Yẹn yí sọwhiwhe do dindonanu gbọn dee jijodona ovẹn dali,+ dile yẹn gbẹ́ hẹn nuyọnẹn ṣie go; yẹn tlẹ sọ joawuna gúgú nado mọdona nuhe yin dagbe hugan he gbẹtọvi lẹ sọgan wà to azán vude he yé nọ nọgbẹ̀ na to owhè glọ lẹ whenu.
4 Yẹn wazọ́n susu.+ Yẹn gbá owhé ṣie titi lẹ;+ yẹn sọ pọ̀ vẹngle ṣie titi lẹ.+
5 Yẹn wleawuna jipa po ogle ṣie titi lẹ po bosọ do atin he nọ sẹ́n wunmẹ voovo lẹ do yé mẹ.
6 Yẹn kùn osindò ṣie titi lẹ nado húsinna ogle* he mẹ atin he vùn lẹ tin te.
7 Yẹn tindo devisunnu po deviyọnnu lẹ po,+ yẹn sọ tindo devi he yin jiji to owhé ṣie gbè lẹ.* Yẹn sọ tindo kanlin-yìnyìn susu—enẹ wẹ oyìn po lẹngbọ lẹ po+—yèdọ hú mẹdepope he nọ Jelusalẹm jẹnukọnna mi.
8 Yẹn bẹ fataka po sika po pli,+ yèdọ adọkunnu* ahọlu lẹ po ayimatẹn lẹ po tọn.+ Yẹn bẹ hànjitọ sunnu po yọnnu lẹ po pli gọna nuhe nọ hẹn awuvivi daho wá na visunnu gbẹtọ tọn lẹ—yèdọ yọnnu, mọwẹ yọnnu susu.*
9 Yẹn sọ lẹzun agbàjúmọ bo klohu mẹhe nọ Jelusalẹm jẹnukọnna mi depope.+ Podọ nuyọnẹn ṣie gbẹ́ gbọṣi dè e.
10 Yẹn ma tẹ̀ dee nudepope he jlo mi.*+ Yẹn ma whlá awuvivinu* wunmẹ depope do ahun ṣie, na ahun ṣie to ayajẹ na azọ́n sinsinyẹn ṣie lẹpo wutu, podọ ehe wẹ yin ale* ṣie na azọ́n sinsinyẹn ṣie lẹpo.+
11 Ṣigba, whenue yẹn lẹnnupọndo azọ́n he yẹn ko yí alọ ṣie titi lẹ do wà lẹpo ji, po azọ́n sinsinyẹn he yẹn ko jẹtukla nado wadotana lẹpo po,+ yẹn mọdọ ovọ́ wẹ nulẹpo, yèdọ wezundido to jẹhọn godo;+ nuhe yin nuhọakuẹ* taun depope masọ tin to owhè glọ.+
12 Yẹn sọ lẹ́ ayidonugo ṣie hlan nuyọnẹn, nulú po gúgú po.+ (Na etẹwẹ mẹhe wá nọgbẹ̀ to ahọlu godo de sọgan wà? Nuhe ko yin wiwà janwẹ.)
13 Yẹn sọ mọdọ nuyọnẹn doale hú gúgú,+ kẹdẹdile hinhọ́n doale hú zinvlu do.
14 Nuyọnẹntọ nọ yí nukun etọn lẹ do mọnú hezeheze;+ ṣigba nulunọ nọ to zọnlinzin to zinvlu mẹ.+ Yẹn ko sọ wá doayi e go dọ nudopolọ wẹ nọ jọ* do yemẹpo go.+
15 Whenẹnu wẹ yẹn dọ to ahun ṣie mẹ dọmọ: “Nuhe nọ jọ do nulunọ go wẹ na jọ do yẹnlọsu go ga.”+ To whelọnu lo, ale tẹwẹ yẹn na mọyi eyin yẹn lẹzun nuyọnẹntọ glanglan? Enẹwutu, yẹn dọ to ahun ṣie mẹ dọmọ: “Ovọ́ wẹ ehe lọsu.”
16 Na nuyọnẹntọ kavi nulunọ ma na yin finflin kakadoi gba.+ To azán he ja lẹ mẹ, mẹlẹpo wẹ na yin winwọn. Podọ nuyọnẹntọ nọ kú kẹdẹdile nulunọ nọ kú do.+
17 Enẹwutu, yẹn gbẹwanna ogbẹ̀,+ na nuhe to yinyin wiwà to owhè glọ lẹpo wẹ nọ hẹn apọṣi mi, na nulẹpo wẹ ovọ́,+ yèdọ wezundido to jẹhọn godo.+
18 Yẹn gbẹwanna nuhe yẹn ko wazọ́n sinsinyẹn na to owhè glọ lẹpo,+ na yẹn na jo e do na mẹhe na bọdo go e.+
19 Podọ mẹnu wẹ yọnẹn eyin ewọ na yin nuyọnẹntọ kavi gugutọ?+ Etomọṣo, ewọ wẹ na deanana nuhe yẹn yí vivẹnu susu po nuyọnẹn po do bẹpli to owhè glọ lẹ. Ovọ́ wẹ ehe lọsu.
20 Enẹwutu wẹ yẹn jẹ todido hẹnbu ji to ahun ṣie mẹ gando azọ́n sinsinyẹn he yẹn ko jẹtukla na to owhè glọ lẹpo go.
21 Na mẹde sọgan yí nuyọnẹn, oyọnẹn po azọ́nyinyọnẹn po do wazọ́n sinsinyẹn, ṣigba e dona jo nuhe e tindo lẹ do* na mẹdevo he ma wazọ́n na.+ Ovọ́ wẹ ehe lọsu yin podọ awubla daho.*
22 Ale tẹwẹ mẹde nọ mọyi na taun tọn sọn azọ́n sinsinyẹn etọn po ojlo vẹkuvẹku* he e yí do wazọ́n sinsinyẹn to owhè glọ lẹpo po mẹ?+
23 Na to azán etọn lẹpo gbè, azọ́n etọn nọ hẹn awufiẹsa po flumẹjijẹ po wá,+ podọ etlẹ yin to zánmẹ, ahun etọn ma nọ jai.+ Ovọ́ wẹ ehe lọsu.
24 Nude ma yọ́n na gbẹtọ hú nado dù bo nù bosọ mọ awuvivi* to azọ́n sinsinyẹn etọn mẹ.+ Yẹn ko sọ doayi ehe lọsu go ga, alọ Jiwheyẹwhe nugbo lọ tọn mẹ wẹ e wá sọn,+
25 na mẹnu wẹ dù kavi nù hú yẹn?+
26 Ewọ nọ na nuyọnẹn, oyọnẹn po ayajẹ po mẹhe nọ hẹn homẹ etọn hùn lẹ,+ ṣigba na ylandonọ, ewọ nọ na ẹn azọ́n nado nọ bẹpli podọ nado nọ pli dopọ kiki nado na mẹhe nọ hẹn homẹ Jiwheyẹwhe nugbo lọ tọn hùn lẹ.+ Ovọ́ wẹ ehe lọsu, yèdọ wezundido to jẹhọn godo.
Nudọnamẹ Odò Tọn
^ Kavi “homẹhunnu.”
^ Kavi “homẹhunnu.”
^ Kavi “zungbo.”
^ To paa mẹ, “visunnu owhé lọ gbè tọn lẹ.”
^ Kavi “yèdọ awhli de, mọwẹ, awhli lẹ.”
^ Kavi “nutindo he yin.”
^ To paa mẹ, “he nukun ṣie lẹ biọ.”
^ Kavi “homẹhunnu.”
^ Kavi “mimá.”
^ Kavi “alenu.”
^ Kavi “nuhe nọ jọ.”
^ Kavi “nugbajẹmẹji.”
^ Kavi “dona bẹ nulẹpo jo.”
^ To paa mẹ, “kanvinván ahun etọn tọn.”
^ Kavi “hẹn alindọn etọn nado tindo nudagbe.”
