Yẹwhehodọtọ 3:1-22
3 Nulẹpo wẹ ojlẹ dide de tin na,Ojlẹ de na nuwiwa lẹpo to owhè glọ:
2 Ojlẹ de nado ji podọ ojlẹ de nado kú;Ojlẹ de nado do podọ ojlẹ de nado họ̀n nuhe yin dido;
3 Ojlẹ de nado hù podọ ojlẹ de nado hẹnazọ̀ngbọ;Ojlẹ de nado họliai podọ ojlẹ de nado jlọ dote;
4 Ojlẹ de nado viavi podọ ojlẹ de nado konu;Ojlẹ de nado doavihàn podọ ojlẹ de nado dúwe;*
5 Ojlẹ de nado bẹ zannu lẹ dlan podọ ojlẹ de nado bẹ zannu lẹ pli dopọ;Ojlẹ de nado gbòmẹfán podọ ojlẹ de nado dapana mẹgbigbòfán;
6 Ojlẹ de nado dín podọ ojlẹ de nado hònúpla;Ojlẹ de nado ze whlá podọ ojlẹ de nado zedlan;
7 Ojlẹ de nado tlẹ́n+ podọ ojlẹ de nado tọ̀;Ojlẹ de nado nabọẹ+ podọ ojlẹ de nado dọho;+
8 Ojlẹ de nado yiwanna podọ ojlẹ de nado gbẹwanna;+Ojlẹ de na awhàn podọ ojlẹ de na jijọho.
9 Ale tẹwẹ azọ́nwatọ nọ tindo na vivẹnudido etọn lẹpo?+
10 Yẹn ko mọ azọ́n he Jiwheyẹwhe na visunnu gbẹtọ tọn lẹ nado hẹn alọnu yetọn ján.
11 Ewọ ko basi onú whanpẹnọ* lẹpo to ojlẹ etọn mẹ.+ Ewọ tlẹ ko yí madopodo do ahun yetọn mẹ; ṣogan gbẹtọvi ma sọgan mọnukunnujẹ azọ́n he Jiwheyẹwhe nugbo lọ ko basi lẹ mẹ sọn bẹjẹeji jẹ vivọnu.
12 Yẹn ko wá tadona lọ kọ̀n dọ nudepope ma yọ́n hugan dọ yé ni jaya bosọ nọ wà dagbe to gbẹwhenu yetọn,+
13 podọ dọ mẹdopodopo ni nọ dù bo nọ nù bosọ nọ mọ awuvivi sọn azọ́n sinsinyẹn etọn lẹpo mẹ. Nunina Jiwheyẹwhe tọn wẹ e yin.+
14 Yẹn ko wá mọdọ nuhe Jiwheyẹwhe nugbo lọ basi lẹpo wẹ na gbọṣi aimẹ kakadoi. Nude ma tin he na yin yiyidogọ podọ nude ma tin he na yin didesọn e mẹ. Jiwheyẹwhe nugbo lọ ko basi i to aliho ehe mẹ, na gbẹtọ lẹ nido nọ dibusi i.+
15 Nuhe to jijọ lẹpo wẹ ko jọ pọ́n, podọ nuhe ja ko wá aimẹ pọ́n;+ amọ́ Jiwheyẹwhe nugbo lọ nọ dín nuhe yè ko doafọna.*
16 Yẹn ko sọ mọ ehe to owhè glọ dọ: Fie whẹdida dodo dona nọ wẹ kanyinylan nọ tin te, podọ fie dodowiwa dona nọ wẹ kanyinylan nọ tin te.+
17 Enẹwutu wẹ yẹn dọ to ahun ṣie mẹ dọmọ: “Jiwheyẹwhe nugbo lọ na dawhẹna dodonọ po mẹylankan po,+ na ojlẹ de tin na nuwiwa lẹpo podọ na azọ́n lẹpo.”
18 Humọ, yẹn dọ to ahun ṣie mẹ gando visunnu gbẹtọ tọn lẹ go dọ Jiwheyẹwhe nugbo lọ na gbeje yé pọ́n bo na dohia yé dọ yé ma gbọnvona kanlin lẹ,
19 na nuhe nọ jọ do gbẹtọvi lẹ go dopolọ wẹ nọ jọ do kanlin lẹ go ga; nudopolọ wẹ nọ jọ do yemẹpo go.+ Dile ode to kúkú, mọ wẹ awetọ sọ to kúkú do; podọ gbigbọ dopolọ wẹ yemẹpo tindo.+ Enẹwutu, gbẹtọ ma pọnte hú kanlin, na nulẹpo wẹ yin ovọ́.
20 Yemẹpo wẹ jei ofi dopolọ.+ Yemẹpo wẹ wá sọn kọ́gudu mẹ,+ podọ kọ́gudu mẹ wẹ yemẹpo nasọ gọ̀ do.+
21 Mẹnu na taun tọn wẹ yọnẹn eyin gbigbọ gbẹtọvi tọn nọ hẹji yiaga, podọ eyin gbigbọ kanlin lẹ tọn nọ jẹte wá aigba?+
22 Yẹn sọ mọdọ nude ma yọ́n hugan na gbẹtọ nado mọ awuvivi to azọ́n etọn mẹ,+ na enẹ wẹ ale* etọn; na mẹnu wẹ na hẹn ẹn penugo nado mọ nuhe na wá jọ to godo etọn?+
Nudọnamẹ Odò Tọn
^ To paa mẹ, “lọ́n; lọ́n pé.”
^ Kavi “he yè basi titona ganji; he sọgbe; he jẹ.”
^ Kavi vlavo, “nuhe ko juwayi.”
^ Kavi “mimá.”
