Yẹwhehodọtọ 8:1-17
8 Mẹnu wẹ taidi dawe nuyọnẹntọ lọ? Mẹnu wẹ yọ́n lehe yè nọ didẹ nuhahun de do?* Nuyọnẹn gbẹtọ tọn nọ hẹn nukunmẹ etọn họ́n bosọ nọ de nukunmẹ yinylọ́n etọn sẹ̀.
2 Yẹn dọmọ: “Setonuna gbedide ahọlu tọn,+ na whiwhle towe to Jiwheyẹwhe nukọn wutu.+
3 A yawu nado tọ́n sọn nukọn etọn blo.+ A sọ nọgodona nuylankan depope blo;+ na ewọ sọgan wà nudepope he jlo e,
4 na ohó ahọlu tọn ma nọ yin agọjẹdo;+ podọ mẹnu wẹ sọgan dọna ẹn dọ, ‘Etẹ wà wẹ a te?’”
5 Mẹhe to gbedide lọ yìn ma na mọ awugble,+ ahun nuyọnẹntọ tọn nasọ yọ́n ojlẹ po tito* he sọgbe lọ po.+
6 Na nulẹpo wẹ tindo ojlẹ po tito* yetọn po,+ na tuklajijẹ gbẹtọvi lẹ tọn sù taun wutu.
7 Na mẹdepope ma yọ́n nuhe na jọ, enẹwutu mẹnu wẹ sọgan dọ lehe e na jọ do na ẹn?
8 Kẹdẹdile mẹdepope ma tindo huhlọn do gbigbọ* ji kavi sọgan hẹn gbigbọ dote do, mọ wẹ mẹdepope ma tindo huhlọn do okúzán ji do niyẹn.+ Kẹdẹdile dotẹnmẹ ma nọ yin nina mẹdepope nado tọ́n sọn awhàngbenu do, mọ wẹ kanyinylan ma na na dotẹnmẹ kanylantọ lẹ nado họ̀ngán* do niyẹn.
9 Ehe lẹpo wẹ yẹn ko mọ, yẹn sọ doayi azọ́n he ko yin wiwà to owhè glọ lẹpo go, yèdọ to ojlẹ he mẹ gbẹtọ ko dugán do gbẹtọ ji na awugble* etọn.+
10 Yẹn sọ mọ bọ yè to mẹylankan lẹ dì, yèdọ mẹhe ko nọ biọ ofi wiwe lọ bosọ nọ gọ̀ tọ́n sọn e mẹ lẹ, ṣigba e madẹn bọ yé yin winwọn to tòdaho he mẹ yé ko yinuwa te to aliho enẹ mẹ lọ.+ Ovọ́ wẹ ehe lọsu.
11 Na yè ma yawu gblewhẹdo gbẹtọ lẹ na walọ ylankan de wutu,+ ahun yetọn tliji nado wà oylan.+
12 Dile etlẹ yindọ ylandonọ de sọgan wà oylan whla kanweko bosọ nọgbẹ̀ na ojlẹ dindẹn, etomọṣo yẹn yọnẹn dọ e na yin dagbe na mẹhe dibusi Jiwheyẹwhe nugbo lọ lẹ, na yé dibusi i wutu.+
13 Ṣigba, e ma na yin dagbe na mẹylankan lọ,+ mọjanwẹ ewọ ma na nọgbẹ̀ na azán susu do niyẹn, yèdọ azán etọn lẹ he taidi oyẹ̀ de,+ na ewọ ma dibusi Jiwheyẹwhe wutu.
14 Onú ovọ́* de tin to aigba ji: Enẹ wẹ yindọ omẹ dodonọ delẹ nọ yin nuyiwa hẹ taidi dọ yé ko waylando de wẹ nkọ,+ podọ mẹylankan delẹ tin he nọ yin nuyiwa hẹ taidi dọ yé ko wà dodo wẹ nkọ.+ Yẹn dọ dọ ovọ́ wẹ ehe lọsu.
15 Enẹwutu, yẹn dọ dọ gbẹtọ ni to ayajẹ,+ na nude ma yọ́n hugan na gbẹtọ to owhè glọ dọ ewọ ni to dùdù bo to nùnù bosọ to ayajẹ; e dona to ehe wà dile e to azọ́n sinsinyẹn wà to azán he e na nọgbẹ̀ na lẹ whenu,+ yèdọ azán he Jiwheyẹwhe nugbo lọ ko na ẹn to owhè glọ lẹ.
16 Yẹn wleawuna ahun ṣie nado bẹ nuyọnẹn pli podọ nado mọ nuhe* to yìyì to aigba ji lẹpo,+ yèdọ amlọnmadọ́ to okle po ozán po.
17 Whenẹnu wẹ yẹn lẹnnupọndo azọ́n Jiwheyẹwhe nugbo lọ tọn lẹpo ji, yẹn sọ doayi e go dọ gbẹtọvi ma sọgan mọnukunnujẹ nuhe nọ jọ to owhè glọ lẹ mẹ.+ Mahopọnna vivẹnu depope he gbẹtọ lẹ do, yé ma sọgan mọnukunnujẹemẹ. Eyin yé tlẹ sọalọakọ́n dọ yé yọnnuin sọmọ nado yọnẹn, yé ma sọgan mọnukunnujẹemẹ na taun tọn.+
Nudọnamẹ Odò Tọn
^ Kavi “yọ́n tadena whẹho de tọn.”
^ Kavi “whẹdida.”
^ Kavi “whẹdida.”
^ Kavi “gbọfufu; jẹhọn.”
^ Kavi vlavo, “kanyinylan yetọn ma na whlẹn kanylantọ.”
^ Kavi “dindọn.”
^ Kavi “Nuhe nọ hẹnmẹ jẹflumẹ.”
^ Kavi “azọ́n he.”
