Yẹwhehodọtọ 9:1-18
9 Yẹn sọ doayi ehe lẹpo go bo wá tadona lọ kọ̀n dọ dodonọ po nuyọnẹntọ po gọna azọ́n yetọn lẹ tin to alọ Jiwheyẹwhe nugbo lọ tọn mẹ.+ Gbẹtọvi lẹ masọ yọ́n owanyi po wangbẹna he ko wá aimẹ jẹnukọnna yé lẹ po.
2 Nudopolọ wẹ nọ jọ* do yemẹpo go,+ yèdọ do dodonọ, mẹylankan,+ mẹdagbe, mẹwiwe, mawénọ, mẹhe nọ sanvọ́ po mẹhe ma nọ sanvọ́ lẹ po go. Nudopolọ wẹ mẹdagbe po ylandonọ po yin; mẹhe nọ whlé sọ yin nudopolọ hẹ mẹhe nọ whleawu nado whlé.
3 Nuhe nọ hẹnmẹ jẹflumẹ de wẹ ehe yin he nọ jọ to owhè glọ: Na nudopolọ wẹ nọ jọ* do mẹlẹpo go wutu,+ ahun gbẹtọ lẹ tọn sọ gọ́ na oylan; podọ nulú wẹ nọ tin to ahun yetọn mẹ to gbẹwhenu yetọn podọ to enẹgodo yé nọ kú!*
4 Todido tin na mẹdepope he gbẹ́ pò togbẹ̀, na avún he togbẹ̀ pọnte hú kinnikinni kúkú.+
5 Na mẹhe togbẹ̀ yọnẹn* dọ emi na kú,+ ṣigba oṣiọ lẹ ma yọ́n nudepope,+ mọjanwẹ yé ma tindo ale* depope ba, na nuhe gando yé go lẹpo ko yin winwọn.+
6 Humọ, owanyi yetọn, wangbẹna yetọn po awuwhàn yetọn po ko sudo, podọ yé masọ tindo mimá de to nuhe to jijọ to owhè glọ lẹ mẹ ba.+
7 Yì, dù núdùdù towe po ayajẹ po bosọ nù ovẹn towe po aglinjijẹ po,+ na Jiwheyẹwhe nugbo lọ ko hùnhomẹ do azọ́n towe lẹ go.+
8 Gbọ avọ̀ towe lẹ ni nọ wé* to whepoponu, a sọ gboawupo nado yí amì do ota towe blo.+
9 Nọ duvivi ogbẹ̀ tọn hẹ asi yiwanna towe+ to azán he a na yizan to gbẹzan ovọ́ tọn towe, he Ewọ ko na we to owhè glọ lẹpo mẹ, yèdọ azán ovọ́ tọn towe lẹpo whenu, na enẹ wẹ mimá* towe to gbẹ̀mẹ podọ to azọ́n sinsinyẹn towe he a jẹtukla na to owhè glọ lẹ mẹ.+
10 Nudepope he alọ towe plá, wà ẹ po huhlọn towe lẹpo po, na azọ́n ma tin, tito ma tin, oyọnẹn ma tin, podọ nuyọnẹn ma tin to Yọdò* mẹ,+ fie hiẹ jei.
11 Yẹn ko sọ mọ nude dogọ to owhè glọ, dọ e ma yin awuyatọ lẹ wẹ nọ duto wezundido ji to whepoponu, kavi huhlọnnọ lẹ to avùn ji,+ podọ e ma yin nuyọnẹntọ lẹ wẹ nọ tindo núdùdù to whepoponu, podọ e ma yin mẹhe tindo zinzin lẹ wẹ nọ jẹ adọkun to whepoponu,+ mọjanwẹ e ma yin mẹhe tindo oyọnẹn lẹ wẹ nọ tindo kọdetọn dagbe to whepoponu,+ na yemẹpo ji wẹ ojlẹ po kosọ po* nọ wá.
12 Gbẹtọ ma yọ́n ojlẹ etọn.+ Kẹdẹdile whèvi nọ yin wiwle do odọ̀ ylankan de mẹ, bọ ohẹ̀ lẹ nọ yin wiwle do fẹ́ṣà nù do, mọ wẹ yè nọ domọwle visunnu gbẹtọ tọn lẹ to ojlẹ nugbajẹmẹji ajiji tọn lẹ whenu do niyẹn.
13 Yẹn sọ doayi ehe go gando nuyọnẹn go to owhè glọ—e sọ jiawu na mi:
14 Tòdaho pẹvi de tin he mẹ gbẹtọ vude te; ahọlu huhlọnnọ de sọ tọ́nawhàn ẹn bo lẹdo e bosọ do adó daho lẹ lẹdo e.
15 Dawe wamọnọ ṣigba he yin nuyọnẹntọ de tin to e mẹ, e sọ whlẹn tòdaho lọ gbọn nuyọnẹn etọn dali. Ṣigba, mẹdepope ma flin dawe wamọnọ enẹ.+
16 Yẹn sọ dọna dee dọmọ: ‘Nuyọnẹn yọ́n hú huhlọn;+ etomọṣo nuyọnẹn wamọnọ tọn nọ yin vivlẹko, yè masọ nọ dotoaina ohó etọn lẹ.’+
17 E yọ́n nado dotoaina ohó dẹẹdẹ nuyọnẹntọ tọn hú awhá mẹhe to gandu to nulunọ lẹ ṣẹnṣẹn tọn.
18 Nuyọnẹn pọnte hú adánwanu awhàn tọn lẹ, ṣigba ylandonọ dopo gee sọgan hẹn dagbe susu gble.+
Nudọnamẹ Odò Tọn
^ Kavi “wẹ nuhe nọ jọ.”
^ Kavi “wẹ nuhe nọ jọ.”
^ To paa mẹ, “podọ to godo etọn—hlan oṣiọ lẹ dè!”
^ Kavi “nọ doayi e go.”
^ Kavi “ahọsumẹ.”
^ Enẹ wẹ, avọ̀ he wé he nọ do numọtolanmẹ ayajẹ tọn hia, e ma yin avọ̀ aluẹmẹninọ tọn.
^ Kavi “adà.”
^ Kavi “nujijọ madonukun.”
