Isaia 45:1-25
45 Nuhe Jehovah dọna mẹyiamisisadode etọn die, yèdọ Kilusi,+Mẹhe yẹn ko hẹn adusilọ etọn go+Nado hẹn akọta lẹ zun mẹmẹglọ to nukọn etọn,+Nado yí adánwanu sọn* ahọlu lẹ si,Nado hùn họngbo awe topọ lẹ to nukọn etọn,Bọ họngbo lọ lẹ ma na yin súsú:
2 “Yẹn na to yìyì to nukọn towe,+Bo na gbigbá okọ́ta lẹ.
Yẹn na gbà ohọ̀n gànvẹẹ tọn lẹ hányán,Bo nasọ sán dòtin gànyuu tọn lẹ liai.+
3 Yẹn na na we adọkunnu he to zinvlu mẹ lẹGọna adọkunnu whiwhla he to fiwhiwhlá lẹ,+Na hiẹ nido yọnẹn dọ yẹn wẹ Jehovah,Jiwheyẹwhe Islaeli tọn, mẹhe ylọ we gbọn oyín towe dali.+
4 Na Jakọbu devizọnwatọ ṣie po Islaeli mẹdide ṣie po wutu,Yẹn ylọ we gbọn oyín towe dali.
Yẹn to oyín gigonọ de na we, mahopọnna dọ hiẹ ma yọ́n mi.
5 Yẹn wẹ Jehovah, podọ mẹdevo de ma tin gbọnvona mi.
Jiwheyẹwhe de masọ tin gbọnvona mi.+
Yẹn na hẹn we lodo,* mahopọnna dọ hiẹ ma yọ́n mi,
6 Na gbẹtọ lẹ nido yọnẹnSọn whèzẹtẹn kaka yì whèyihọDọ mẹdevo de masọ tin gbọnvona mi.+
Yẹn wẹ Jehovah, podọ mẹdevo de ma tin gbọnvona mi.+
7 Yẹn wẹ basi hinhọ́n+ bosọ dá zinvlu,+Yẹn wẹ nọ hẹn jijọho wá+ bosọ nọ hẹn nugbajẹmẹji wá;+Yẹn Jehovah wẹ to onú ehe lẹpo wà.
8 Mì olọn lẹ emi, mì ja jikun sọn aga;+Gbọ aslọ lẹ ni ja dodowiwa wududu.
Gbọ aigba ni kẹnù bo de sinsẹ́n whlẹngán tọn tọ́n,Podọ gbọ dodowiwa ni tọ́nkun sọn e mẹ to ojlẹ dopolọ mẹ.+
Yẹn Jehovah wẹ ko dá ẹ.”
9 Dindọn wẹ na mẹhe nọ diahi* hẹ Didatọ* etọn,Na zẹ́nkla tata de poun wẹ ewọTo zẹ́nkla devo he to kọmẹ lẹ ṣẹnṣẹn!
Be okò na dọna Zẹ́ndotọ* dọ: “Etẹ basi a te?”+
Kavi alọnuzọ́n towe na dọ dọ: “Hiẹ ma tindo alọ” wẹ ya?*
10 Dindọn wẹ na mẹhe dọna otọ́ de dọ: “Ovi nankọ die he a ji?”
Bo dọna yọnnu de dọ: “Ovi alọpa tẹ die he ji a te?”*
11 Nuhe Jehovah, Omẹ Wiwe Islaeli tọn,+ yèdọ Basitọ etọn dọ die:
“Be mìwlẹ na kanhose mi gando nuhe to nukọn ja lẹ goBo degbena mi gando visunnu ṣie lẹ+ po azọ́n alọ ṣie tọn lẹ po go ya?
12 Yẹn wẹ basi aigba+ bo dá gbẹtọ do e ji.+
Yẹn wẹ yí alọ ṣie titi lẹ do dlẹn olọn lẹ jẹgbonu,+Podọ yẹn wẹ nọ degbena awhànpa yetọn lẹpo.”+
13 “Yẹn ko ze dawe de daga to dodowiwa mẹ,+Yẹn nasọ jlọ aliho etọn lẹpo.
Ewọ wẹ na do tòdaho ṣie ai+Bo na tún omẹ ṣie he to kanlinmọgbenu lẹ dote+ matin ahọsumẹ kavi alọgodo-kuẹ,”+ wẹ Jehovah awhànpa lẹ tọn dọ.
14 Nuhe Jehovah dọ die:
“Ale* Egipti tọn, ajọnu* Etiopia tọn lẹ po Sabeanu lẹ po, yèdọ mẹhe súnte lẹ,Na wá dè we bo na lẹzun nutindo towe.
Yé na zinzọnlin to godona we to gẹdẹ lẹ mẹ.
Yé na wá bo na dẹ́ do odò na we.+
Yé na dọna we po sisi sisosiso po dọ, ‘Matin ayihaawe, Jiwheyẹwhe tin po hiẹ po,+Podọ mẹdevo de ma tin; Jiwheyẹwhe devo depope masọ tin.’”
15 Jiwheyẹwhe he nọ ze ede whlá de wẹ a yin nugbonugbo,Hiẹ Jiwheyẹwhe Islaeli tọn E, yèdọ Mẹwhlẹngántọ lọ.+
16 Yemẹpo wẹ na duwinyan bo jẹflumẹ;Mẹhe nọ basi boṣiọ lẹpo wẹ na dedo po winyan po.+
17 Ṣigba, Jehovah na na whlẹngán madopodo Islaeli.+
Mìwlẹ ma na duwinyan kavi jẹflumẹ kakadoi gba.+
18 Na nuhe Jehovah dọ die,Yèdọ Jiwheyẹwhe nugbo lọ,+ he dá olọn,Mẹhe basi aigba, podọ Didatọ etọn he do e ai gligli,+He ma dá ẹ to ovọ́ mẹ,* ṣigba he dá ẹ na yè nido nọ nọ̀ e ji:+
“Yẹn wẹ Jehovah, mẹdevo de ma tin gbọnvona mi.
19 Yẹn ma dọho to fiwhiwhlá de,+ yèdọ to aigba zinvlu tọn ji;Yẹn ma dọna kúnkan* Jakọbu tọn dọ,‘Mì dín mi to ovọ́ mẹ’* gba.
Yẹn wẹ Jehovah, mẹhe nọ dọ ohó dodo bosọ nọ dọ nuhe sọgbe.+
20 Mì bẹ mìde pli dopọ bo wá.
Mì dọnsẹpọ, mì mẹhe họ̀ngán sọn akọta lẹ mẹ emi.+
Yé mẹhe to boṣiọ pipà lẹ bẹ pé lẹ ma yọ́n nude,Yé sọ nọ hodẹ̀ hlan yẹwhe he ma sọgan whlẹn yé gán de.+
21 Mì na linlin mìtọn, mì hẹn owhẹ̀ mìtọn wá.
Mì gbọ yé ni dewé dopọ.
Mẹnu wẹ ko dọ dọdai ehe tọn sọn ojlẹ dindẹn dieBo ko lá ẹ sọn ojlẹ he wayi lẹ mẹ?
Be e ma yin yẹn Jehovah wẹ?
Jiwheyẹwhe devo depope ma tin gbọnvona mi;Jiwheyẹwhe dodonọ+ podọ Mẹwhlẹngántọ devo de masọ tin gbọnvona mi.+
22 Mì lẹhlan dè e bo yin whinwhlẹngán,+ mì opodo aigba tọn lẹpo emi,Na yẹn wẹ Jiwheyẹwhe, mẹdevo de ma tin gbọnvona mi.+
23 Yẹn ko yí dee do whlé;Ohó lọ ko tọ́n sọn onù ṣie mẹ to dodowiwa mẹ,Podọ e ma na lẹkọwa:+
Yẹn wẹ kligonu lẹpo na nọ dẹ́ yìdo na,Bọ odẹ́ lẹpo na nọ whlé nado yin nugbonọ na+
24 Bo na nọ dọ dọ, ‘E họnwun dọ Jehovah dè wẹ dodowiwa nugbo po huhlọn po tin te.
Mẹhe to adidu do e go lẹpo wẹ na wá nukọn etọn po winyan po.
25 Jehovah mẹ wẹ owhẹ̀ kúnkan* Islaeli tọn lẹpo tọn na whẹ́n te,+Podọ ewọ mẹ wẹ yé na nọ doawagun te.’”
Nudọnamẹ Odò Tọn
^ To paa mẹ, “Nado tún gbaja sọn alìn na.”
^ To paa mẹ, “na blagbajana we sinsinyẹn.”
^ Kavi “dọnnu.”
^ Kavi “Basitọ.”
^ Kavi “Basitọ etọn.”
^ Kavi vlavo, “Kavi okò na dọ dọ: ‘Alọnuzọ́n towe ma tindo alọhẹnnu’ wẹ ya?”
^ Kavi “Etẹwẹ hẹn we tin to awufiẹsa ajipanu tọn mẹ?”
^ Kavi vlavo, “Pakanọ.”
^ Kavi vlavo, “ajọwatọ.”
^ Kavi vlavo, “dá ẹ nado nọ ovọ́.”
^ To paa mẹ, “okún.”
^ Kavi “tata.”
^ To paa mẹ, “okún.”
