Jobu 1:1-22
1 Dawe de tin to aigba Uzi tọn ji he nọ yin Jobu.*+ Dawe nugbonọ podọ tenọglinọ* de wẹ ewọ;+ e nọ dibusi Jiwheyẹwhe bo nọ họ̀nna oylan.+
2 Visunnu ṣinawe po viyọnnu atọ̀n po wẹ yin jiji na ẹn.
3 Sọha kanlin-yìnyìn etọn lẹ tọn yin lẹngbọ 7 000, kanklosọ́ 3 000, oyìn 1 000* po kẹtẹkẹtẹ* 500 po, gọna devizọnwatọ susugege, bọ ewọ lẹzun mẹhe klohugan to omẹ Whèzẹtẹn tọn lẹpo mẹ.
4 Dopodopo visunnu etọn lẹ tọn nọ basi hùnwhẹ to owhé edetiti tọn gbè to azán etọn ji.* Yé nọ basi oylọna nọviyọnnu yetọn atọ̀n lẹ nado wá dù bo nù hẹ yé.
5 To vivọnu azán hùnwhẹ debọdo-dego lọ lẹ tọn, Jobu nọ dowẹn hlan yé nado hẹn yé zun wiwe. Enẹgodo, e nọ fọ́n to afọnnu fuu bo nọ basi avọ́sinsan mimẹ̀+ lẹ do dopodopo yetọn tamẹ. Na Jobu nọ dọmọ: “Vlavo visunnu ṣie lẹ na ko waylando bo zánnu do Jiwheyẹwhe go to ahun yetọn mẹ.” Mọ wẹ Jobu nọ wà do to whepoponu.+
6 Todin, azán lọ pé bọ visunnu Jiwheyẹwhe nugbo lọ tọn lẹ*+ yì nado sọawuhia to Jehovah nukọn,+ bọ Satani+ lọsu wá finẹ.+
7 To whenẹnu, Jehovah kanse Satani dọ: “Fie wẹ hiẹ wá sọn?” Satani sọ gblọnna Jehovah dọmọ: “Yẹn nọ to yìyì pé gbọn aigba ji bosọ nọ to dindanpe gbọn e ji.”+
8 Jehovah sọ kanse Satani dọmọ: “Be hiẹ ko doayi* devizọnwatọ ṣie Jobu go ya? Mẹdepope ma tin he taidi ewọ nkọ to aigba ji. Dawe nugbonọ podọ tenọglinọ* de wẹ ewọ,+ he nọ dibusi Jiwheyẹwhe bo nọ họ̀nna oylan.”
9 To whenẹnu, Satani gblọnna Jehovah dọmọ: “Be tata wẹ Jobu do dibusi Jiwheyẹwhe ya?+
10 Be hiẹ ma ko wleawuna opá hihọ́-basinamẹ tọn de lẹdo ewọ+ po whédo etọn po gọna nuhe e tindo lẹpo ya? Hiẹ ko dona azọ́n alọ etọn tọn+ bọ kanlin-yìnyìn etọn lẹ ko gbàpe to aigba ji.
11 Ṣigba, nado diọ ninọmẹ lọ, dlẹnalọ towe bo doalọ nuhe e tindo lẹpo go bo pọ́n dọ ewọ ma na zánnu do gowe to nukun towe mẹ ya.”
12 To whenẹnu, Jehovah dọna Satani dọmọ: “Pọ́n! Nuhe e tindo lẹpo tin to alọ towe mẹ.* Ṣigba, a doalọ dawe lọ lọsu go blo!” Satani sọ tọ́nyi sọn Jehovah nukọn.+
13 Todin, to azán he gbè visunnu po viyọnnu Jobu tọn lẹ po to núdù bo to ovẹn nù to owhé nọvisunnu yetọn mẹho pete lọ tọn gbè,+
14 wẹnsagun de wá Jobu dè bo dọmọ: “To whenue oyìn lẹ to aigba-jlo bọ kẹtẹkẹtẹ lẹ to amà dù to apá yetọn,
15 Sabeanu lẹ tọ́navùn mí bo bẹ kanlin lọ lẹ yì bosọ yí ohí do hù devizọnwatọ lẹ. Yẹn doponọ wẹ họ̀ngán nado wá dọna we.”
16 Dile ewọ gbẹ́ to hodọ, mẹdevo wá bo dọmọ: “Miyọ́n de sọn Jiwheyẹwhe dè* flẹ sọn olọn wá lẹngbọ lẹ po devizọnwatọ lẹ po ṣẹnṣẹn bo fiọ yé! Yẹn doponọ wẹ họ̀ngán nado wá dọna we.”
17 Dile ewọ gbẹ́ to hodọ, mẹdevo wá bo dọmọ: “Kaldeanu+ lẹ zọ̀n ogbẹ́ atọ̀n ji wá bo jẹ kanklosọ́ lẹ ji bosọ bẹ yé yì, yé sọ yí ohí do hù devizọnwatọ lẹ. Yẹn doponọ wẹ họ̀ngán nado wá dọna we.”
18 Dile ewọ gbẹ́ to hodọ, mẹdevo sọ wá bo dọmọ: “Visunnu towe lẹ po viyọnnu towe lẹ po to núdù bo to ovẹn nù to owhé nọvisunnu yetọn mẹho pete lọ tọn gbè.
19 To ajiji mẹ, jẹhọn daho de wá sọn danfafa ji bo whàn agosu ẹnẹ ohọ̀ lọ tọn lẹ, sọmọ bọ e họ́ do ovi towe lẹ ji bọ yé kú. Yẹn doponọ wẹ họ̀ngán nado wá dọna we.”
20 To whenẹnu, Jobu fọ́n bo tlẹ́n awugbó etọn bosọ pà oda etọn; enẹgodo e dẹ́ do odò bo ṣinyọ́n nukunmẹ ai
21 bosọ dọmọ:
“Omẹ́ wẹ yẹn zọ̀n tọ́n sọn ohò onọ̀ ṣie tọn mẹ,Omẹ́ wẹ yẹn nasọ zọ̀n lẹkọyi.+
Jehovah ko na,+ Jehovah ko sọ gọyí.
Oyín Jehovah tọn ni yin gigopana zọnmii.”
22 Mahopọnna nuhe jọ do e go ehe lẹpo, Jobu ma waylando kavi sawhẹ nuylankan depope tọn dokọna Jiwheyẹwhe.*
Nudọnamẹ Odò Tọn
^ Vlavo zẹẹmẹdo “Nuhe Yè Gbẹwanna.”
^ Kavi “Dawe madoblọnọ podọ dodonọ.”
^ To paa mẹ, “oyìn awe awe 500.”
^ To paa mẹ, “kẹtẹkẹtẹ asi.”
^ Kavi “to owhé mẹdopodopo tọn gbè debọdo-dego.”
^ Hogbe yẹhiadonu tọn Heblugbe mẹ tọn he nọ dlẹnalọdo visunnu Jiwheyẹwhe tọn he yin angẹli lẹ.
^ To paa mẹ, “ze ahun towe do.”
^ Kavi “Dawe madoblọnọ podọ dodonọ.”
^ Kavi “to anademẹ towe glọ.”
^ Kavi vlavo, “Abì de.”
^ Kavi “hia nuhe ma sọgbe depope dokọna Jiwheyẹwhe.”
