Jona 4:1-11
4 Ṣigba, enẹ ma hùnhomẹ na Jona paali, e sọ gblehomẹ sinsinyẹn.
2 Enẹwutu, e hodẹ̀ hlan Jehovah dọmọ: “Ṣo todin, Jehovah, be e ma yin ehe wẹ yin ahunmẹdunamẹnu ṣie to whenue n’to aigba ṣie titi ji ya? Enẹ wẹ zọ́n bọ n’tẹnpọn nado họnyi Talṣiṣi+ to tintan whenu; na yẹn yọnẹn dọ Jiwheyẹwhe awuvẹmẹtọ* podọ lẹblanunọ de wẹ hiẹ, mẹhe nọ whleawu nado gblehomẹ bosọ gọ́ na owanyi nugbo,+ yèdọ mẹhe nọ diọlinlẹn ma nado hẹn nugbajẹmẹji wá.
3 Todin, Jehovah E, jaale bo yí ogbẹ̀* ṣie, na e pọnte na mi nado kú hú nado nọgbẹ̀.”+
4 Jehovah kanse dọmọ: “Be e sọgbe dọ hiẹ ni gblehomẹ dole ya?”
5 Whenẹnu wẹ Jona tọ́n sọn tòdaho lọ mẹ bo yì sinai to whèzẹtẹn tòdaho lọ tọn. E wleawuna bẹtẹn de na ede to finẹ bo sinai to oyẹ̀ etọn glọ nado pọ́n nuhe na jọ do tòdaho lọ go.+
6 Jehovah Jiwheyẹwhe sọ wleawuna atinkan* de nado wú bo vùn wá Jona ji, nado na oyẹ̀ ota etọn bo de awufiẹsa etọn pò. Jona sọ hùnhomẹ taun na atinkan lọ tọn wutu.
7 Ṣigba, Jiwheyẹwhe nugbo lọ do owán de hlan to whenue ai jẹ hinhọ́n ji to wunkẹngbe bọ e dù atinkan lọ bọ e sọ fiọ.
8 To whenue owhè jẹ sinsinyẹn ji, Jiwheyẹwhe sọ do jẹhọn sinsinyẹn whèzẹtẹn tọn de hlan bọ owhè lọ sọ hùn do ota na Jona, bọ e sọ jẹ búbú do ede ji. E sọ to bibiọ nado kú* bo to didọmọ, “E pọnte na mi nado kú hú nado nọgbẹ̀.”+
9 Jiwheyẹwhe kanse Jona dọmọ: “Be e sọgbe dọ hiẹ ni to homẹgble dole gando atinkan lọ go ya?”+
Whenẹnu wẹ e dọmọ: “E sọgbe dọ yẹn ni gblehomẹ, n’gblehomẹ sọmọ bo tlẹ jlo nado kú.”
10 Ṣigba, Jehovah dọmọ: “Onú atinkan he hiẹ ma jẹtukla na kavi hẹn whẹ́n lọ tọn biọlanmẹna we; e wú to zánto dopo mẹ bosọ kú to zánto dopo mẹ.
11 Be onú Nineve tòdaho-gbó lọ tọn,+ ehe mẹ gbẹtọ hugan 120 000 he ma tlẹ yọ́n vogbingbọn to nuhe sọgbe po nuhe ma sọgbe po ṣẹnṣẹn* lẹ tin te, gọna kanlin yetọn susugege lẹ ma dona biọlanmẹna yẹnlọsu ya?”+
Nudọnamẹ Odò Tọn
^ Kavi “he gọ́ na ojọmiọn.”
^ Kavi “alindọn.”
^ Kavi vlavo, “atin de he nọ sẹ́n oká.”
^ Kavi “to bibiọ dọ alindọn etọn ni kú.”
^ Kavi “ma tlẹ yọ́n adusilọ yetọn gbọnvona amiyọn.”
