Levitiku 12:1-8
-
Lẹ̀wé to vijiji godo (1-8)
12 Jehovah sọ dọna Mose dogọ dọmọ:
2 “Dọna Islaelivi lẹ dọ, ‘Eyin yọnnu de mọhò* bo ji visunnu de, ewọ na yin mawé na azán ṣinawe, kẹdẹdile ewọ ko nọ yin mawé do to ojlẹ lajijẹ tọn etọn whenu.+
3 To azán ṣinatọ̀ntọ gbè, visunnu lọ na yin adàgbona.+
4 Yọnnu lọ na zindonukọn nado to ohùn lọ klọ́ sọn ede go na azán 33 he bọdego lẹ. E ma dona doalọ onú wiwe depope go, podọ e ma dona wá ofi wiwe lọ kakajẹ whenue azán lẹ̀wé tọn etọn lẹ na pé.
5 “‘Eyin viyọnnu de wẹ e ji, whenẹnu e na yin mawé na azán 14, kẹdẹdile ewọ ko nọ te do to lajijẹ etọn whenu. E na zindonukọn nado to ohùn lọ klọ́ sọn ede go na azán 66 he bọdego lẹ.
6 Eyin azán lẹ̀wé tọn etọn lẹ pé na visunnu de kavi na viyọnnu de, ewọ na hẹn agbò winyanwinyan owhe dopo mẹ tọn de wá na avọ́nunina mimẹ̀,+ podọ awhànnẹvu kavi owhlé de wá na avọ́nunina ylando tọn to họntonu gòhọ opli tọn lọ tọn bo na ze e jo na yẹwhenọ lọ.
7 Yẹwhenọ lọ nasọ hẹn ẹn wá Jehovah nukọn bo na basi ovẹsè do ota yọnnu lọ tọn mẹ, ewọ nasọ yin hinhẹn zun wiwe sọn hùndidi etọn mẹ. Enẹ wẹ yin osẹ́n he gando yọnnu he ji vlavo visunnu de kavi viyọnnu de go.
8 Ṣigba, eyin ewọ ma penugo nado na lẹngbọ de, whenẹnu e na hẹn owhlé awe kavi awhànnẹvu awe wá,+ yèdọ dopo na avọ́nunina mimẹ̀ podọ awetọ na avọ́nunina ylando tọn, yẹwhenọ lọ nasọ basi ovẹsè do ota etọn mẹ, ewọ nasọ yin hinhẹn zun wiwe.’”
Nudọnamẹ Odò Tọn
^ Kavi “mọhò okún de tọn.”
