Luku 14:1-35
14 To ojlẹ devo mẹ, e yì dopo to ogán Falesi lẹ tọn de sin whégbè to Gbọjẹzangbe nado dùnú, mẹhe to owhé lọ gbè lẹ sọ to ṣiṣọ́ ẹ sinsinyẹn.
2 Podọ pọ́n! dawe he to jijizọ̀n* jẹ de tin to nukọn etọn.
3 Todin, na enẹ tọn wutu, Jesu kanse mẹhe yọ́n Osẹ́n lọ ganji lẹ po Falesi lẹ po dọmọ: “Be e sọgbe hẹ osẹ́n nado hẹnazọ̀ngbọ to Gbọjẹzangbe ya kavi lala?”+
4 Ṣigba, yé ma kẹnù. Enẹwutu, e hẹn dawe lọ go, bo hẹnazọ̀ngbọna ẹn bosọ do e hlan.
5 Enẹgodo, e dọna yé dọmọ: “Mẹnu to mì mẹ wẹ visunnu etọn kavi oyìnsú etọn na flẹ jẹ dotọ̀ de mẹ+ bọ e ma na de e tọ́n to afọdopolọji to Gbọjẹzangbe?”+
6 Yé masọ penugo nado gblọn nude gando ehe go.
7 Whenẹnu, to whenue e doayi lehe mẹhe yin oylọ-basina lẹ to otẹn he yiaga hugan lẹ de na yedelẹ do go, e na yé apajlẹ de.+ E dọna yé dọmọ:
8 “To whenue mẹde basi oylọna we wá hùnwhẹ alọwle tọn, a jagla do otẹn he yiaga hugan mẹ blo.+ Vlavo ewọ sọgan ko basi oylọna mẹhe yin nukundeji hugan we de.
9 Mẹhe basi oylọna mì omẹ awe lẹ nasọ wá bo dọna we dọ, ‘Gbọ dawe ehe ni yí otẹn towe.’ Whenẹnu, hiẹ na dedo otẹn he yìdo hugan lọ mẹ po winyan po.
10 Ṣigba, to whenue hiẹ yin oylọ-basina, yì bo jagla do otẹn he yìdo hugan lọ mẹ, bọ whenue dawe he basi oylọna we lọ wá, e na dọna we dọ, ‘Họntọn, yì otẹn he yiaga mẹ.’ Whenẹnu, hiẹ na tindo gbégbò to jonọ hatọ towe lẹpo nukọn.+
11 Na mẹdepope he ze ede daga wẹ yè na whiwhẹ, podọ mẹdepope he whiwhẹ ede wẹ yè na zedaga.”+
12 Enẹgodo, e sọ dọna dawe he basi oylọna ẹn lọ dọmọ: “To whenue hiẹ wleawuna núdùdù whèmẹ tọn kavi whèjai tọn de, a ylọ họntọn towe lẹ, nọvisunnu towe lẹ, hẹnnumẹ towe lẹ, kavi kọmẹnu towe adọkunnọ lẹ blo. Eyin e ma yinmọ, yelọsu sọgan basi oylọna we bọ e na lẹzun ahọsumẹ de na we.
13 Ṣigba, to whenue hiẹ wleawuna hùnwhẹ de, basi oylọna wamọnọ lẹ, pòtẹnnọ lẹ, sẹkunọ lẹ, nukuntọ́nnọ lẹ;+
14 hiẹ nasọ yin ayajẹnọ, na yé ma tindo nudepope he yé na yí do suahọ we. Na yè na suahọ we to fọnsọnku+ dodonọ lẹ tọn whenu.”
15 To onú ehelẹ sisè godo, dopo to jonọ hatọ lẹ mẹ dọna ẹn dọmọ: “Ayajẹnọ wẹ mẹhe na dùnú* to Ahọluduta Jiwheyẹwhe tọn mẹ.”
16 Jesu dọna ẹn dọmọ: “Dawe de wleawuna núdùdù whèjai tọn daho de,+ bo basi oylọna mẹsusu.
17 E sọ do afanumẹ etọn hlan to ogàn núdùdù whèjai tọn lọ tọn mẹ nado dọna mẹhe yin oylọ-basina lẹ dọ, ‘Mì wá, na nulẹpo ko sọgbe todin.’
18 Ṣigba, yemẹpo jẹ ogbè biọ ji to aliho dopolọ mẹ.+ Tintan dọna ẹn dọ, ‘Yẹn họ̀ ogle de bo dona yì pọ́n ẹn; yẹn vẹ̀ we, nagbè mi.’
19 Podọ awetọ dọ, ‘Yẹn họ̀ zẹgẹ* oyìn tọn atọ́n bọ yẹn jlo na yì tẹ́n yé pọ́n; yẹn vẹ̀ we, nagbè mi.’+
20 Mẹdevo sọ dọ, ‘Yẹn ṣẹṣẹ dà asi wẹ podọ na ehe wutu, yẹn ma sọgan wá.’
21 Enẹwutu, afanumẹ lọ wá bo na linlin onú ehe lẹpo tọn klunọ etọn. To whenẹnu, klunọ whédo lọ tọn gblehomẹ bo dọna afanumẹ etọn dọ, ‘Tọ́nyi po awuyiya po bo yì alihogbó lẹ po ali pẹvi tòdaho lọ tọn lẹ po ji, bosọ plan wamọnọ lẹ, pòtẹnnọ lẹ, nukuntọ́nnọ lẹ po sẹkunọ lẹ po wáfi.’
22 To godo mẹ, afanumẹ lọ dọmọ, ‘Klunọ, nuhe hiẹ degbe etọn ko yin bibasi, ṣogan tẹnmẹ gbẹ́ pò.’
23 Enẹwutu, klunọ lọ dọna afanumẹ lọ dọ, ‘Tọ́nyi aliho po tòhomẹ-liho lẹ po ji, bo vẹ̀ yé nado wá, na ohọ̀ ṣie nido sọgan gọ́.+
24 Na yẹn dọna mì dọ, depope to mẹhe yin oylọ-basina enẹlẹ mẹ ma na dọ́ núdùdù whèjai tọn ṣie pọ́n.’”+
25 Todin, gbẹtọgun daho lẹ to gbejizọnlinzin hẹ ẹ, e sọ lilẹ́ bo dọna yé dọmọ:
26 “Eyin mẹdepope wá dè e bo ma gbẹwanna* otọ́, onọ̀, asi, ovi lẹ, nọvisunnu lẹ po nọviyọnnu etọn lẹ po, mọwẹ, podọ etlẹ yin ogbẹ̀* etọn titi,+ ewọ ma sọgan yin devi ṣie.+
27 Mẹdepope he ma ze yatin* etọn bo hodo mi ma sọgan yin devi ṣie.+
28 Di apajlẹ, mẹnu to mì mẹ wẹ na jlo nado gbá atọ̀họ̀ de he ma na sinai bo lẹn akuẹ etọn whẹ́ nado pọ́n eyin e tindo nuhe pé nado dotana ẹn?
29 Eyin e ma yinmọ, e sọgan do dodonu etọn ṣigba bo ma na penugo nado dotana ẹn, bọ nupọntọ lẹpo na jẹ ṣinṣàn ẹn kò ji,
30 dọmọ: ‘Dawe ehe jẹ ohọ̀ gbá ji, ṣigba bo ma penugo nado dotana.’
31 Kavi ahọlu tẹwẹ na to awhànfọ de nado pé ahọlu devo to awhàn mẹ, bo ma na sinai bo dewé whẹ́ eyin ewọ na penugo nado yí awhànfuntọ 10 000 do pehẹ ewọ he ja e dè po 20 000 po?
32 Na nugbo tọn, eyin e ma sọgan wàmọ, to whenẹnu e na do pipli afọzedaitọ lẹ tọn de hlan to whenue ewọ gbẹ́ pò to olá, nado dín jijọho.
33 To aliho dopolọ mẹ, mẹdepope to mì mẹ he ma dọ e yì whedenu na* nutindo etọn lẹpo ma sọgan yin devi ṣie.+
34 “E họnwun dọ ojẹ̀ yọ́n. Ṣigba, eyin ojẹ̀ hẹn huhlọn etọn bu, etẹwẹ yè na yí do hẹn ẹn dotọ́n?+
35 E ma yọ́n na aigba kavi na ogbó ba. Gbẹtọ lẹ nọ ze e dlan. Mì gbọ mẹhe tindo otó nado dotoai, ni dotoai.”+
Nudọnamẹ Odò Tọn
^ Kavi “azọ̀n agbasa jiji tọn,” susu zẹjlẹgo osin tọn to lanmẹ.
^ To paa mẹ, “dù akla.”
^ Kavi “zẹgẹ awe topọ.”
^ Kavi “ma de owanyi etọn pò na.”
^ Kavi “alindọn.”
^ Kavi “ma gbẹkọ.”
