Malku 5:1-43
5 Enẹgodo, yé jẹ awà awetọ ohù lọ tọn ji to lẹdo Gelazeninu lẹ tọn mẹ.+
2 Podọ to afọdopolọji, to whenue Jesu ko jẹte sọn tọjihun lọ mẹ, dawe de he tin to huhlọn gbigbọ mawé tọn de glọ wá pé e sọn yọdò* lẹ ṣẹnṣẹn.
3 E nọ nọ̀ yọdò lẹ ṣẹnṣẹn, podọ kakajẹ ojlẹ enẹ mẹ, mẹdepope ma ko penugo nado blá ẹ sinsinyẹn, etlẹ yin po gẹdẹ po.
4 Whlasusu wẹ yè ko yí afọgàn lẹ po gẹdẹ lẹ po do blá ẹ, ṣigba e nọ wẹ́n gẹdẹ lẹ bo nọ gbà afọgàn lẹ; mẹdepope masọ tindo huhlọn nado hùwhẹ́ ẹ.
5 Podọ to whepoponu, to ozán po okle po, e nọ to awhádo to yọdò lẹ ṣẹnṣẹn podọ to osó lẹ ji bo nọ yí zannu lẹ do to awugblena ede.
6 Ṣigba, to whenue e mọ Jesu hlan to olá, e họ̀nwezun bo dẹ́ do odò na ẹn.+
7 Enẹgodo, e dawhá po ogbè lélé po dọmọ: “Etẹwẹ yẹn tindo nado wà hẹ we, hiẹ Jesu, Visunnu Jiwheyẹwhe Gigogán lọ tọn? Yẹn biọ to hiẹ si nado yí Jiwheyẹwhe do whlé ma nado sayana mi.”+
8 Na Jesu ko to didọna ẹn dọmọ: “Tọ́njẹgbonu sọn dawe lọ mẹ, hiẹ gbigbọ mawé.”+
9 Ṣigba, Jesu kanbiọ ẹ dọmọ: “Nawẹ hiẹ nọ yin?” Ewọ sọ gblọn dọmọ: “Yẹn nọ yin Awhànpa, na mí mẹsusu wẹ.”
10 Podọ e to Jesu vẹ̀ mapote ma nado yàn gbigbọ lọ lẹ sọn otò lọ mẹ.+
11 Todin, pipli ohàn+ susu tọn de to núdù to finẹ to osó lọ ji.+
12 Enẹwutu, gbigbọ lọ lẹ vẹ̀ ẹ dọmọ: “Do mí hlan ohàn lọ lẹ mẹ, na mí nido sọgan biọ yé mẹ.”
13 E sọ nagbè yé. Enẹwutu, gbigbọ mawé lọ lẹ tọ́njẹgbonu bo biọ ohàn lọ lẹ mẹ, pipli lọ sọ hozín yì pópló lọ tónu* bo flẹ jẹ hùmẹ, yèdọ nudi 2 000 lọ lẹpo siọ do hùmẹ.
14 Ṣigba, kanlinyìntọ lọ lẹ họnyi bo yì na linlin to tòdaho lọ mẹ podọ to glètoho lọ mẹ, gbẹtọ lẹ sọ wá nado pọ́n nuhe ko jọ.+
15 Enẹwutu, yé wá Jesu dè, bo mọ dawe he tindo awhànpa gbigbọ aovi lẹ tọn dai lọ to aisinsin, e do avọ̀ bọ ayiha etọn ko gọwá, yé sọ gọ́ na obu.
16 Humọ, mẹhe mọ nuhe jọ do dawe he tindo gbigbọ aovi tọn dai lọ go podọ nuhe jọ do ohàn lẹ go lọ lẹ dọ lehe e jọ gbọn na yé.
17 Enẹwutu, yé jẹ vẹvẹna Jesu ji nado yì sọn lẹdo yetọn mẹ.+
18 Todin, dile e to tọjihun mẹ biọ, dawe he tindo gbigbọ aovi tọn dai lọ vẹ̀ ẹ nado hodo e.+
19 Ṣigba, ewọ ma dike, kakatimọ e dọna ẹn dọmọ: “Yì whégbè to hẹnnumẹ towe lẹ dè, bo dọ nuhe Jehovah* ko wà na we lẹpo gọna lẹblanu he e ko dohia we na yé.”
20 Dawe ehe sọ yì bo jẹ nuhe Jesu ko wà na ẹn lẹpo lá ji to Dekapole,* bọ awú sọ ji gbẹtọ lẹpo.
21 Whladopo dogọ, to whenue Jesu ko dasá lẹkọwa awà awetọ ji to tọjihun lọ mẹ, gbẹtọgun daho de pli dopọ to e dè dile ewọ tin to ohù lọ tó.+
22 Todin, dopo to ogán sinagọgu tọn lẹ mẹ, he nọ yin Jailu wá, podọ to whenue e mọ ẹn, e ṣinyọ́n nukunmẹ ai to afọ etọn lẹ kọ̀n.+
23 E sọ vẹ̀ ẹ whlasusu dọmọ: “Viyọnnu ṣie pẹvi to azọ̀njẹ sinsinyẹn.* Jaale, wá bo ze alọ towe do e ji+ na ewọ nido sọgan jẹgangan bo nọgbẹ̀.”
24 Enẹwutu, Jesu hodo e yì bọ gbẹtọgun daho de to hihodo e bo to finfinyọ́n ẹn.
25 Todin, nawe de tin he ko to hùndi+ sọn owhe 12 die gbọ́n.+
26 E ko jiya susu* to alọ dotozọ́nwatọ voovo lẹ tọn mẹ bo ko zan nutindo etọn lẹpo bọ e ma pọnte na ẹn, kakatimọ e ylan deji wẹ.
27 To whenue e sè linlin lẹ gando Jesu go, e gbọn godo wá e dè to gbẹtọgun lọ mẹ bo doalọ awugbó etọn go,+
28 na e to didọ to ede mẹ dọmọ: “Eyin n’ko gbẹ́ doalọ awugbó etọn lẹ go, yẹn na jẹgangan.”+
29 Podọ to afọdopolọji, hùndidi etọn doalọte, bọ e mọ to ede mẹ dọ emi ko yin azọ̀nhẹngbọna sọn azọ̀n sinsinyẹn lọ mẹ.
30 To afọdopolọji, Jesu mọ to ede mẹ dọ huhlọn+ ko tọ́nyi sọn emi mẹ, e sọ lẹgodo to gbẹtọgun lọ ṣẹnṣẹn bo kanse dọmọ: “Mẹnu wẹ doalọ awugbó ṣie lẹ go?”+
31 Ṣigba, devi etọn lẹ dọna ẹn dọmọ: “Hiẹ mọ gbẹtọgun lọ to finfinyọ́n we, bọ a ka sọ kanse dọ, ‘Mẹnu wẹ doalọ go e?’”
32 Ṣogan, e to pinpọn lẹdo pé nado mọ mẹhe wà ehe.
33 Yọnnu lọ he to budi bo to sisọsisọ, na e yọ́n nuhe ko jọ do e go wutu, wá bo jẹklo to nukọnna ẹn bosọ dọ nugbo lọ lẹpo na ẹn.
34 E dọna yọnnu lọ dọmọ: “Viyọnnu ṣie, yise towe ko hẹn we jẹgangan. Yì to jijọho mẹ,+ bo yin azọ̀nhẹngbọna sọn azọ̀n sinsinyẹn towe mẹ.”+
35 Dile e gbẹ́ pò to hodọ, mẹdelẹ wá sọn owhé ogán sinagọgu tọn lọ tọn gbè bo dọmọ: “Viyọnnu towe ko kú! Naegbọn hiẹ gbẹsọ to tuklado Mẹplọntọ?”+
36 Ṣigba, Jesu gblató nuhe dọ yé te bo dọna ogán sinagọgu tọn lọ dọmọ: “A dibu blo,* saa ko tindo yise poun.”+
37 Todin, e ma dike mẹdepope ni hodo e adavo Pita, Jakọbu po Johanu nọvisunnu Jakọbu tọn po.+
38 Enẹwutu, yé wá owhé ogán sinagọgu tọn lọ tọn gbè, bọ e mọ bẹwlu sinsinyẹn he mẹ yé te, gọna mẹhe to avivi bo to avihàn do lẹ.+
39 To whenue e biọ họmẹ, e dọna yé dọmọ: “Naegbọn mì do to avivi bosọ to bẹwlu sinsinyẹn mẹ? Ovi lọ ma kú gba, ṣigba amlọndọ wẹ e te.”+
40 Enẹwutu, yé jẹ ṣinṣàn ẹn kò ji. Ṣigba, to whenue e ko de yemẹpo tọ́n godo, e plan otọ́ po onọ̀ ovi lọ tọn po gọna mẹhe zọnhẹ ẹ lẹ, bo biọ fie ovi lọ te.
41 Enẹgodo, e hẹn alọ ovi lọ tọn bo dọna ẹn dọmọ: “Talita kumi,” he lẹdogbedevomẹ etọn yin: “Viyọnnu pẹvi, yẹn dọna we, fọ́n!”+
42 To afọdopolọji, viyọnnu lọ fọ́n bo jẹ zọnlinzin ji. (Ewọ yin owhe 12 mẹvi.) Yé sọ gọ́ na aglinjijẹ daho de to afọdopolọji.
43 Ṣigba, e degbena yé whlasusu* ma nado dike mẹdepope ni sè ehe,+ e sọ dọ dọ nude ni yin nina ẹn nado dù.
Nudọnamẹ Odò Tọn
^ Kavi “yọdò oflin tọn.”
^ Kavi “yì bẹbẹnu pópló lọ tọn.”
^ Kavi “Lẹdo Tòdaho Ao tọn lọ.”
^ Kavi “to kúdonu.”
^ Kavi “ko mọ awufiẹsa susu.”
^ Kavi “A sọ dibu ba blo.”
^ Kavi “sinsinyẹn.”
