Malku 8:1-38
8 To azán enẹlẹ gbè, gbẹtọgun daho de sọ vọ́ pli bọ yé ma tindo nude nado dù. Enẹwutu, e ylọ devi etọn lẹ pli bo dọna yé dọmọ:
2 “Onú gbẹtọgun lọ tọn wàlẹblanu na mi,+ na e ko yì azán atọ̀n todin bọ yé ko tin to dè e bo ma tindo nude nado dù.+
3 Eyin n’do yé hlan owhé yetọn lẹ gbè adọ̀vọ,* agbọ́ na pé yé to aliji, podọ delẹ to yé mẹ wá sọn fidindẹn.”
4 Ṣigba, devi etọn lẹ gblọnna ẹn dọmọ: “Fie wẹ mẹde na hẹn akla he na pé sọn to gblolo mẹ file nado gọ́ho na omẹ ehelẹ?”
5 Whenẹnu wẹ e kanbiọ yé dọmọ: “Akla nẹmu wẹ mì tindo?” Yé dọmọ: “Ṣinawe.”+
6 E sọ dọna gbẹtọgun lọ nado jagla do kọmẹ. Enẹgodo, e yí akla ṣinawe lọ lẹ bo dopẹ́ bosọ wẹ́n yé, bo jẹ yíyí na devi etọn lẹ ji nado má, bọ yé má ẹn na gbẹtọgun lọ.+
7 Yé sọ tindo whèvi flinflin vude ga, podọ to whenue e ko dona ehelẹ, e sọ dọna yé nado má ẹn ga.
8 Enẹwutu, yé dù bo gọ́ho, yé sọ bẹ dupò lẹ pli, bọ e gọ́ ohà daho ṣinawe.+
9 Todin, nudi sunnu 4 000 wẹ to finẹ. To godo mẹ, e do yé hlan.
10 To afọdopolọji, e biọ tọjihun de mẹ hẹ devi etọn lẹ bo wá agbegbe Dalmanuta tọn ji.+
11 Falesi lẹ sọ wá bo jẹ nudọn hẹ ẹ ji, bosọ to ohia de biọ to e si sọn olọn, nado whlé e pọ́n.+
12 Enẹwutu, e gbọ gángán bo dọmọ: “Naegbọn whẹndo ehe do to ohia de dín?+ Nugbo wẹ yẹn dọna mì dọ, ohia de ma na yin nina whẹndo ehe.”+
13 To whenẹnu, e jo yé do, bo biọ ohún mẹ whladopo dogọ, bosọ yì awà awetọ ji.
14 Ṣigba, yé wọn nado hẹn akla lẹ, bo ma hẹn hú akla dopo to tọjihun lọ mẹ.+
15 Podọ e gbẹnuna yé tlọlọ dọmọ: “Mì hùn nukun mìtọn lẹ dote; mì payi otọ́n Falesi lẹ tọn po otọ́n Hẹlọdi tọn po go.”+
16 Enẹwutu, yé jẹ nudọn hẹ ode awetọ yetọn ji, na yé ma hẹn akla depope wutu.
17 Na e doayi ehe go wutu, e dọna yé dọmọ: “Naegbọn mìwlẹ do to nudọn na mì ma hẹn akla depope wutu? Be mìwlẹ ma ko tunwun bo mọnukunnujẹemẹ kakajẹ din wẹ? Be e gbẹ́ vẹawuna ahun mìtọn nado mọnukunnujẹemẹ janwẹ?
18 ‘Dile mì tlẹ tindo nukun lẹ, be mì ma nọ mọnú wẹ; podọ dile mì tlẹ tindo otó lẹ, be mì ma nọ sènu wẹ?’ Be mì ma flin wẹ,
19 to whenue yẹn wẹ́n akla atọ́n+ na sunnu 5 000, ohà nẹmu wẹ dupò he mì bẹpli lọ gọ́?” Yé dọna ẹn dọmọ: “Wiawe.”+
20 “To whenue yẹn wẹ́n akla ṣinawe lọ lẹ na sunnu 4 000, ohà daho nẹmu wẹ dupò he mì bẹpli lọ gọ́?” Yé sọ dọna ẹn dọmọ: “Ṣinawe.”+
21 Enẹwutu, e dọna yé dọmọ: “Be mì ma ko mọnukunnujẹemẹ kakajẹ din wẹ?”
22 Todin, yé glinhún do Bẹtsaida. Gbẹtọ lẹ hẹn dawe nukuntọ́nnọ de wá e dè to finẹ, yé sọ vẹ̀ ẹ nado doalọ e go.+
23 E sọ hẹn alọ dawe nukuntọ́nnọ lọ tọn go, bo plan ẹn jẹ gbonu gbétatò lọ tọn. To whenue e túntán do nukun etọn lẹ ji godo,+ e ze alọ etọn lẹ do e ji bo kanse e dọmọ: “Be hiẹ mọ nudepope ya?”
24 Dawe lọ sọ pọ́n aga bo dọmọ: “N’mọ gbẹtọ lẹ, ṣigba yé taidi atin lẹ bo to zọnlinzin pé.”
25 E sọ vọ́ doalọ nukun dawe lọ tọn lẹ go, dawe lọ sọ mọnú hezeheze. Nukun etọn hùn bọ e sọgan mọ nulẹpo gblegede.
26 Enẹwutu, e do e hlan whé bo dọmọ: “A biọ gbétatò ehe mẹ blo.”
27 Todin, Jesu po devi etọn lẹ po yì gbétatò Sesalea Filipi tọn lẹ mẹ, podọ e jẹ hokanse devi etọn lẹ ji to aliji dọmọ: “Mẹnu wẹ gbẹtọ lẹ to didọ dọ yẹn yin?”+
28 Yé dọna ẹn dọmọ: “Johanu Baptizitọ,+ ṣigba mẹdevo lẹ nọ dọ Elija,+ podọ mẹdevo lẹ sọ nọ dọ, dopo to yẹwhegán lẹ mẹ.”
29 E sọ kanse yé dọmọ: “Ṣigba mìwlẹ, mẹnu wẹ mì nọ dọ dọ yẹn yin?” Pita gblọnna ẹn dọmọ: “Hiẹ wẹ Klisti lọ.”+
30 Enẹwutu, e dosẹ́n na yé sinsinyẹn ma nado dọ mẹhe ewọ yin na mẹdepope.+
31 Humọ, e jẹ pinplọn yé ji dọ Visunnu gbẹtọ tọn dona jiya nususu tọn bọ mẹho lẹ, yẹwhenọgán lẹ po wekantọ lẹ po na gbẹ́ ẹ dai bo hù i+ bọ e na yin finfọn to azán atọ̀ntọ gbè.+
32 Na nugbo tọn, e to ohó enẹ dọ madoadúdẹji. Ṣigba, Pita plan ẹn jẹ olá bo jẹ nugbẹna ẹn ji.+
33 Whenẹnu, e lẹgodo bo pọ́n devi etọn lẹ bosọ gbẹnuna Pita dọmọ: “Lẹ́ jẹ godo ṣie, Satani! na nulẹnpọn towe ma sọgbe hẹ linlẹn Jiwheyẹwhe tọn lẹ gba, ṣigba dehe yin gbẹtọ tọn lẹ.”+
34 Todin, e ylọ gbẹtọgun lọ wá ede po devi etọn lẹ po dè bo dọna yé dọmọ: “Eyin mẹdepope jlo nado hodo mi, mì gbọ e ni mọ́n ede bo ze yatin* etọn bosọ to hihodo mi zọnmii.+
35 Na mẹdepope he jlo na whlẹn ogbẹ̀* etọn na hẹn ẹn bu, ṣigba mẹdepope he hẹn ogbẹ̀* etọn bu na yẹn tọn podọ na wẹndagbe lọ tọn wutu, na whlẹn ẹn.+
36 Na nugbo tọn, ale tẹwẹ tin to e mẹ na gbẹtọ nado duale aihọn lọ pete tọn ṣigba bo hẹn ogbẹ̀* etọn bu?+
37 Na taun tọn, etẹwẹ gbẹtọ na yí do diọ ogbẹ̀* etọn?+
38 Na mẹdepope he kuwinyan ṣie podọ na ohó ṣie lẹ to whẹndo ayọdetọ* po ylandonọ ehe po mẹ, Visunnu gbẹtọ tọn nasọ kuwinyan etọn ga+ to whenue e na wá to gigo Otọ́ etọn tọn mẹ po angẹli wiwe lẹ po.”+
Nudọnamẹ Odò Tọn
^ Kavi “to nùbibla mẹ.”
^ Kavi “alindọn.”
^ Kavi “alindọn.”
^ Kavi “alindọn.”
^ Kavi “alindọn.”
^ Kavi “he ma yin nugbonọ.”
