Matiu 15:1-39
15 To whenẹnu, Falesi lẹ po wekantọ lẹ po wá Jesu dè sọn Jelusalẹm,+ bo dọmọ:
2 “Naegbọn devi towe lẹ do nọ tùnafọ aṣa omẹ hohowhenu tọn lẹ tọn ji? Di apajlẹ, yé ma nọ klọ́ alọ yetọn lẹ* to whenuena yé jlo na dùnú.”+
3 E gblọnna yé dọmọ: “Naegbọn mìwlẹ do nọ tùnafọ gbedide Jiwheyẹwhe tọn ji na aṣa mìtọn wutu?+
4 Di apajlẹ, Jiwheyẹwhe dọ dọ, ‘Gbògbéna otọ́ towe po onọ̀ towe po,’+ podọ, ‘Mì gbọ mẹhe nọ zun* otọ́ kavi onọ̀ etọn ni yin hùhù.’+
5 Ṣigba, mìwlẹ dọ dọ, ‘Mẹdepope he dọna otọ́ kavi onọ̀ etọn dọ: “Nudepope he yẹn tindo he hiẹ sọgan mọyi yin nunina de he ko yin kinklandowiwe hlan Jiwheyẹwhe,”+
6 e ma yin dandan dọ ewọ ni gbògbéna otọ́ etọn to aliho depope mẹ.’ Gbọnmọ dali, mìwlẹ ko hẹn ohó Jiwheyẹwhe tọn zun ovọ́, na aṣa mìtọn wutu.+
7 Mì yẹnuwatọ lẹ, Isaia ko gbọn gbesisọ dali dọ dọdai gando mì go to whenuena e dọ dọ:+
8 ‘Omẹ ehelẹ nọ yí nùflo yetọn lẹ do gbògbéna mi, ṣigba ahun yetọn dẹn do mi tlala.
9 Ovọ́ mẹ wẹ yé to sinsẹ̀n-basi hlan mi te, na gbedide gbẹtọ tọn lẹ wẹ yé nọ plọnmẹ taidi nuplọnmẹ lẹ.’”+
10 To whenẹnu, e ylọ gbẹtọgun lọ sẹpọ ede bo dọna yé dọmọ: “Mì dotoai bo mọnukunnujẹ zẹẹmẹ etọn mẹ:+
11 E ma yin nuhe biọ onù gbẹtọ tọn mẹ wẹ nọ hẹn ẹn flu gba, ṣigba nuhe tọ́njẹgbonu sọn onù etọn mẹ wẹ nọ hẹn ẹn flu.”+
12 Enẹgodo, devi lẹ wá bo dọna ẹn dọmọ: “Be hiẹ yọnẹn dọ Falesi lẹ dahli to whenuena yé sè nuhe a dọ ya?”+
13 E gblọn dọmọ: “Atin he Otọ́ ṣie olọn mẹ tọn ma do lẹpo wẹ na yin hinhọ̀nsẹ.
14 Mì jo yé do. Alihiamẹtọ nukuntọ́nnọ wẹ yé. Enẹwutu, eyin nukuntọ́nnọ do ali hia nukuntọ́nnọ, yé omẹ awe lẹ na jai do odò mẹ.”+
15 Pita gblọnna ẹn dọmọ: “Hẹn apajlẹ lọ họnwun na mí.”
16 To whenẹnu, e dọmọ: “Be mìlọsu ma ko mọnukunnujẹemẹ kakajẹ din wẹ?+
17 Be mì ma yọnẹn dọ nudepope he biọ onù mẹ wẹ nọ yì adọ̀mẹ bo nọ yin yinyẹ̀n jẹgbonu do adàdo mẹ ya?
18 Ṣigba, ahun mẹ wẹ nudepope he nọ tọ́njẹgbonu sọn onù mẹ nọ wá sọn, podọ onú enẹlẹ wẹ nọ hẹn gbẹtọ flu.+
19 Di apajlẹ, ahun mẹ wẹ linlẹn ylankan,+ hlọnhuhu, ayọdide, fẹnnuwiwa zanhẹmẹ tọn,* ajojijẹ, kunnudide lalo po nùzinzan lẹ po nọ wá sọn.
20 Onú ehelẹ wẹ nọ hẹn gbẹtọ flu; ṣigba nado yí alọ he ma yin kiklọ́* lẹ do dùnú ma nọ hẹn gbẹtọ flu gba.”
21 To whenue Jesu tọ́n sọn finẹ, e yì agbegbe Tile po Sidoni po tọn mẹ.+
22 Podọ pọ́n! nawe Fenikenu de, he wá sọn agbegbe enẹ ji, tọ́n wá bo dawhá dọmọ: “Wàlẹblanuna mi, Oklunọ, hiẹ Visunnu Davidi tọn. Gbigbọ aovi tọn to yasana viyọnnu ṣie sinsinyẹn.”+
23 Ṣigba, ewọ ma gblọn ohó de na ẹn. Enẹwutu, devi etọn lẹ wá bo jẹ vivẹ̀ ẹ ji dọmọ: “Dọna ẹn dọ e ni yì, na e to awhádo hodo mí mapote wutu.”
24 E gblọn dọmọ: “Yẹn ma yin didohlan mẹdevo depope adavo hlan lẹngbọ owhé Islaeli tọn he bu lẹ.”+
25 Ṣigba, nawe lọ wá bo litaina* ẹn bosọ dọmọ: “Oklunọ, gọalọna mi!”
26 E gblọn dọmọ: “E ma sọgbe nado yí akla ovi lẹ tọn bo dlan ẹn hlan avún pẹvi lẹ gba.”
27 Nawe lọ dọmọ: “Mọwẹ, Oklunọ, ṣigba avún pẹvi lẹ nọ dù jàjá he nọ flẹ sọn tafo klunọ yetọn tọn ji lẹ be.”+
28 To whenẹnu, Jesu gblọnna ẹn dọmọ: “Hiẹ yọnnu E, daho wẹ yise towe; na e ni yin wiwà hlan we kẹdẹdile hiẹ jlo do.” Podọ bẹsọn gànhiho enẹ mẹ, viyọnnu etọn yin azọ̀nhẹngbọna.
29 To whenue Jesu ko tọ́nyi sọn finẹ godo, e wá Ohù Galili tọn tó,+ podọ to whenuena e ko hẹji yì osó ji, e sinai to finẹ.
30 To whenẹnu, gbẹtọgun daho lẹ dọnsẹpọ ẹ, bo hẹn mẹhe yin sẹkunọ, klegbesatọ, nukuntọ́nnọ, unbọpẹnnọ, gọna mẹsusu devo lẹ wá, bo tẹ́ yé do afọ etọn kọ̀n, bọ ewọ hẹnazọ̀ngbọna yé.+
31 Enẹwutu, awuji gbẹtọgun lọ dile yé mọ unbọpẹnnọ lẹ to hodọ, klegbesatọ lẹ to yinyin hinhẹn jẹgangan, sẹkunọ lẹ to zọnlinzin, bọ nukuntọ́nnọ lẹ to numọ, yé sọ pagigona Jiwheyẹwhe Islaeli tọn.+
32 Ṣigba, Jesu ylọ devi etọn lẹ wá ede dè bo dọmọ: “Onú gbẹtọgun lọ tọn wàlẹblanuna mi,+ na e ko yì azán atọ̀n todin bọ yé ko tin to dè e bo ma tindo nude nado dù. N’masọ jlo nado do yé hlan adọ̀vọ,* na agbọ́ sọgan pé yé to aliji.”+
33 Ṣigba, devi lẹ dọna ẹn dọmọ: “Fie wẹ míwlẹ na hẹn akla susu sọmọ sọn to gblolo mẹ file nado gọ́ho na gbẹtọgun daho ehe nkọ?”+
34 Whenẹnu wẹ Jesu dọna yé dọmọ: “Akla nẹmu wẹ mì tindo?” Yé dọmọ: “Ṣinawe po whèvi flinflin vude po.”
35 Enẹwutu, to whenue e ko dọna gbẹtọgun lọ nado jagla do kọmẹ godo,
36 e yí akla ṣinawe po whèvi lọ lẹ po, podọ to whenue e ko dopẹ́ godo, e wẹ́n yé bo jẹ yíyí na devi lẹ ji, bọ devi lẹ má na gbẹtọgun lẹ.+
37 Podọ yemẹpo dù bo gọ́ho, yé sọ bẹ dupò lẹ pli, bọ e gọ́ ohà daho ṣinawe.+
38 Todin, sọha mẹhe dùnú lẹ tọn yin sunnu 4 000, mahia yọnnu lẹ po yọpọvu lẹ po.
39 To godo mẹ, to whenuena e ko do gbẹtọgun lẹ hlan, e biọ tọjihun mẹ bo wá agbegbe Magadani tọn ji.+
Nudọnamẹ Odò Tọn
^ Enẹ wẹ, klọ́ yede wé to aṣa-liho.
^ Kavi “vlẹ.”
^ Enẹ wẹ, ma yin kiklọ́we to aṣa-liho.
^ Kavi “dẹ́ do odò na.”
^ Kavi “to nùbibla mẹ.”
