Zekalia 1:1-21
1 To osun ṣinatọ̀ntọ owhe awetọ Daliusi tọn mẹ,+ ohó Jehovah tọn wá yẹwhegán Zekalia,*+ visunnu Belekia he yin visunnu Ido tọn dè dọmọ:
2 “Jehovah gblehomẹ sinsinyẹn do otọ́ mìtọn lẹ go.+
3 “Dọna yé dọ, ‘Nuhe Jehovah awhànpa lẹ tọn dọ die: “‘Mì lẹkọwa dè e,’ wẹ Jehovah awhànpa lẹ tọn dọ, ‘yẹn nasọ lẹkọ do mì dè,’+ wẹ Jehovah awhànpa lẹ tọn dọ.”’
4 “‘Mì yinuwa di otọ́ mìtọn lẹ blo, mẹhe go yẹwhegán hohowhenu tọn lẹ dọ gando dọmọ: “Nuhe Jehovah awhànpa lẹ tọn dọ die, ‘Mì jaale bo lẹkọ sọn aliho ylankan mìtọn lẹ ji bo jo walọ ylankan mìtọn lẹ do.’”’+
“‘Ṣigba, yé ma dotoai, mọ yé masọ na mi ayidonugo depope,’+ wẹ Jehovah dọ.
5 “‘Todin, fie wẹ otọ́ mìtọn lẹ te? Podọ be yẹwhegán lẹ nọgbẹ̀ kakadoi wẹ ya?
6 Ṣigba, ohó ṣie lẹ podọ gbedide ṣie lẹ he n’na devizọnwatọ ṣie he yin yẹwhegán lẹ mọ hẹndi do otọ́ mìtọn lẹ go, kavi e ma yin mọ wẹ?’+ Enẹwutu wẹ yé do lẹkọwa dè e bo dọmọ: ‘Jehovah awhànpa lẹ tọn ko yinuwa hẹ mí sọgbe hẹ aliho mítọn lẹ po walọ mítọn lẹ po, kẹdẹdile e ko magbe nado wà do.’”+
7 To azán 24tọ osun 11tọ tọn, enẹ wẹ osun Ṣebati* tọn, to owhe awetọ Daliusi tọn mẹ,+ ohó Jehovah tọn wá yẹwhegán Zekalia, visunnu Belekia he yin visunnu Ido tọn dè dọmọ:
8 “N’mọ numimọ de to zánmẹ. Dawe de to osọ́ vẹẹ de ji bo ṣite guun to atin mitile tọn lẹ ṣẹnṣẹn to agbàdo lọ mẹ; podọ osọ́ vẹẹ, vẹẹ-wlanwlan po wewe lẹ po to godona ẹn.”
9 Enẹwutu, n’dọmọ: “Mẹnu lẹ die, oklunọ ṣie?”
Angẹli he to hodọ hẹ mi lọ gblọn dọmọ: “N’na do mẹhe yé yin hia we.”
10 Whenẹnu wẹ dawe he ṣite guun to atin mitile tọn lẹ ṣẹnṣẹn lọ dọmọ: “Mẹhe Jehovah ko dohlan nado yì dánpe gbọn aigba ji lẹ wẹ.”
11 Yé sọ dọna angẹli Jehovah tọn he ṣite to atin mitile tọn lẹ ṣẹnṣẹn lọ dọmọ: “Mí ko dánpe gbọn aigba lọ ji, podọ pọ́n! aigba lọ pete wẹ to whii bo vò.”+
12 Enẹwutu, angẹli Jehovah tọn dọmọ: “Jehovah awhànpa lẹ tọn E, nawẹ e na dẹnsọ bọ hiẹ na to lẹblanu towe tẹ̀ Jelusalẹm po tòdaho Juda tọn lẹ po,+ ehe go hiẹ ko gblehomẹ do sinsinyẹn sọn owhe 70 die gbọ́n?”+
13 Jehovah yí homẹdagbe po hogbe homẹmiọnnamẹ tọn lẹ po do gblọnhona angẹli he to hodọ hẹ mi.
14 Enẹgodo, angẹli he to hodọ hẹ mi lọ dọna mi dọmọ: “Dawhá dọ, ‘Nuhe Jehovah awhànpa lẹ tọn dọ die: “Zohunhun daho de wẹ n’tindo gando Jelusalẹm po Ziọni po go.+
15 N’to homẹgble sinsinyẹn do akọta he tin to vivomẹ lọ lẹ go,+ na homẹgble vude wẹ n’tindo dai,+ ṣigba yewlẹ wẹ hẹn nugbajẹmẹji lọ sinyẹn deji.”’+
16 “Enẹwutu, nuhe Jehovah dọ die: ‘“Yẹn na lẹkọ do Jelusalẹm dè po lẹblanu+ po bọ ohọ̀ ṣie titi na yin gbigbá do e mẹ,”+ wẹ Jehovah awhànpa lẹ tọn dọ, “podọ nujlẹkàn de na yin dindlẹn do Jelusalẹm ji.”’+
17 “Hiẹ nisọ vọ́ dawhá dọ, ‘Nuhe Jehovah awhànpa lẹ tọn dọ die: “Nudagbe lẹ na gọ́ tòdaho ṣie lẹ mẹ whladopo dogọ; podọ Jehovah nasọ vọ́ homẹmiọnna Ziọni+ bo nasọ vọ́ Jelusalẹm de whladopo dogọ.”’”+
18 Whenẹnu wẹ n’pọ́n aga bo mọ azò ẹnẹ.+
19 Enẹwutu, n’kanse angẹli he to hodọ hẹ mi dọmọ: “Etẹwẹ ehelẹ?” Ewọ gblọn dọmọ: “Azò he vúnvún Juda,+ Islaeli+ po Jelusalẹm po pé lẹ wẹ.”+
20 Enẹgodo, Jehovah do anazọ́nwatọ ẹnẹ hia mi.
21 Yẹn sọ kanse dọmọ: “Etẹwẹ ehelẹ ja wiwà gbé?”
Ewọ sọ dọmọ: “Azò ehelẹ wẹ vúnvún Juda pé sọmọ bọ mẹdepope ma penugo nado ze ota daga. Amọ́, anazọ́nwatọ ehelẹ wẹ na wá nado zìn azò akọta he ze azò yetọn lẹ daga sọta aigba Juda tọn nado vúnvún in pé lẹ dai.”
