•    “To États-Unis, nudi mado-awe mẹhe ko whẹ́n mẹho lẹ tọn wẹ nọ jiya ṣokẹdẹninọ tọn, podọ na taun tọn jọja he to gblagbla owhe 18 jẹ 25 tọn mẹ lẹ wẹ nọ jiya etọn hugan.”—Sọgbe hẹ zinjẹgbonu 2023 tọn owe lọ Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community tọn.

•    “[Pipli He Nọ Penukundo Agbasalilo Go Lẹdo Aihọn Pé] ko lá dọ Pipli de He Nọ Penukundo Whẹho Pọninọ Tọn lẹ Go na yin awuwlena, po yanwle lọ po nado nọ gọalọna gbẹtọ lẹ nado duto numọtolanmẹ ṣokẹdẹninọ tọn he gán do azọ̀n yé lẹ ji, bo ze pọninọ daga bosọ yawu dín pọngbọ lẹ, na mẹlẹ to otò lẹpo mẹ etlẹ yin to otò wamọnọ tọn lẹ mẹ, na yé nido duto ṣokẹdẹninọ ji.”—Sọgbe hẹ nuhe Pipli He Nọ Penukundo Agbasalilo Go Lẹdo Aihọn Pé dọ to 15 novembre 2023.

 Biblu bẹ ayinamẹ yọ́n-na-yizan lẹ hẹn he nọ gọalọna mí nado jihọntọn dagbe lẹ.

 Ma nọ wà nuhe na zọ́n bọ a na nọ klan dewe dovo lẹ gbau blo. Nuwiwa mọnkọ lẹ bẹ nọtẹn gbẹdido Intẹnẹt ji tọn lẹ ji yìyì zẹjlẹgo hẹn. Enẹwutu, nọ dín dotẹnmẹ hundote lẹ nado bẹ hodọdopọ jẹeji hẹ mẹlẹ nukun sọ nukun bo jihọntọn nugbo lẹ.

•    Nunọwhinnusẹ́n Biblu tọn: “Họntọn nugbo nọ yiwannamẹ to whelẹponu, podọ nọvisunnu he go yè sọgan dejido to ojlẹ ayimajai tọn lẹ mẹ wẹ ewọ.”—Howhinwhẹn lẹ 17:17.

 Nọ dín dotẹnmẹ lẹ nado gọalọna mẹdevo lẹ. Gbọnvona dọ dagbewiwa na mẹdevo lẹ nọ zọ́n bọ haṣinṣan he mí tindo hẹ yé nọ lodo, e sọ nọ wà dagbe na mí to numọtolanmẹ-liho.

•    Nunọwhinnusẹ́n Biblu tọn: “Ayajẹ sù to nunamẹ mẹ hú to mimọyi mẹ.”—Owalọ lẹ 20:35.

 Yì nọtẹn Intẹnẹt tọn mítọn ji nado mọ nudọnamẹ he yọ́n-na-yizan lẹ sọn Biblu mẹ gando lehe a gán jihọntọn dagbe lẹ do go.