Dile owhe 2023 to bibẹjẹeji, mímẹpo wẹ to nukundo nudagbe lẹ na míde, podọ na hagbẹ whẹndo tọn mítọn lẹ. Etẹwutu mí gán donukun nudagbe lẹ?

 Biblu bẹ wẹndagbe de hẹn. E dohia dọ azán kaka de ma pò to gbàn ji na nuhahun he mí to pipehẹ lẹ. Na nugbo tọn, Biblu “yin kinkandai na oplọn mítọn, na míwlẹ nido sọgan tindo todido gbọn . . . homẹmimiọn sọn Owe-wiwe lẹ mẹ gblamẹ.”—Lomunu lẹ 15:4.

•    Eyin a jlo na plọnnu dogọ do opagbe Biblu tọn lẹ ji, hia hosọ lọ “Une espérance réelle pour des jours meilleurs.”

 Todido he go Biblu donù gán taidi “húnsingàn de na ogbẹ̀ mítọn.” (Heblu lẹ 6:19, nudọnamẹ odò tọn.) Todido ehe gán hẹn mí lodo. E gán gọalọna mí nado nọ doakọnna nuhahun lẹ todin, nado nọ hẹn linlẹn dagbe go bosọ tindo ayajẹ he na dẹn-to-aimẹ de. Di apajlẹ:

•    Pọ́n lehe todido he Biblu nọ namẹ gọalọna dawe de he ko peve to ahàn sinsinyẹn nùnù mẹ do. Pọ́n video lọ Gbẹzan Ṣie Wá Ṣì Mi Pete.

•    Pọ́n lehe todido he Biblu nọ namẹ gán gọalọna mí whenue mẹvivẹ mítọn de kú do. Pọ́n video lọ Homẹmimiọn Na Mẹhe to Aluẹmẹ Lẹ.

 Mẹsusu wẹ nọ donukun dọ nudagbe lẹ ni jọ, amọ́ yé ma gán sọalọakọ́n dọ e na yinmọ dandan. Na opagbe Biblu tọn lẹ uwọ, e ma nọ yinmọ. Etẹwutu? Na Jehovah Jiwheyẹwhe a lọsu, yèdọ “mẹhe ma sọgan dolalo” wẹ do opà he to Biblu mẹ lẹ. (Titu 1:2) Jehovah kẹdẹ wẹ dohuhlọn nado hẹn opà etọn lẹpo di; e gán “wà nudepope he yọ́n to nukun etọn mẹ.”—Salmu lẹ 135:5, 6.

 Enẹwutu, mí to oylọ-bayina we nado plọnnu gando todido dejidego he to Biblu mẹ go. Eyin a “nọ yí sọwhiwhe do gbadopọnna Owe-wiwe lẹ,’’ a na hẹn jidide towe to todido ehe mẹ lodo dogọ. (Owalọ lẹ 17:11) Nado wàmọ, jaale bo tẹ́n tito Biblu pinplọn tọn vọnu mítọn pọ́n. Bẹ owhe 2023 jẹeji po todido lọ po dọ sọgodo na yọ́n!