Lẹdo aihọn pé, ahizi he ahọluzọnwatọ lẹ nọ hò nọ hẹn kọdetọn ylankan lẹ wá. a Di apajlẹ, to ojlẹ azọ̀nylankan COVID-19 tọn mẹ, susu to ahọluzọnwatọ he to otò voovo lẹ mẹ wẹ yè dowhẹ dọ yé jẹ adọkun na yé bẹ akuẹ he yé dona zan do goalọna mẹlẹ nado pehẹ azọ̀nylankan lọ lẹ dù. Ahizi enẹ zọ́n bọ gbẹtọ lẹ ma mọ nukunpedomẹgo dotowhé tọn he jẹ yí, podọ mẹsusu wẹ jiya bosọ kú na enẹ tọn wutu.

 Ahizi tohọluduta lẹ tọn ko gbọn kámẹ-gòmẹ. David Cameron he yin agbagogán Royaume-Uni tọn dai dọ dọ: “Ahizi taidi ayẹyẹ-dọ́ daho de he mẹ otò lẹpo ján do.”

 Etomọṣo, mí gbẹ́ gán deji dọ ahizi tohọluduta tọn lẹpo na wá doalọte. Etẹwutu mí do dọmọ? Pọ́n nue Biblu dọ Jiwheyẹwhe na wà lẹ.

 Biblu bẹ hogbe Jiwheyẹwhe tọn ehelẹ hẹn dọmọ: “Na yẹn, Jehovah, yiwanna whẹdida dodo; n’gbẹwanna ajo po mawadodo po.” b (Isaia 61:8) Jiwheyẹwhe nọ mọ eyin gbẹtọ lẹ to yaji na ahizi mẹdevo lẹ tọn wutu. (Howhinwhẹn lẹ 14:31) E dopà dọ: “Na yè to kọgbidina mẹhe to yaji lẹ wutu, . . . yẹn na fọ́n bo yinuwa.”— Salmu lẹ 12:5.

 Etẹwẹ Jiwheyẹwhe na wà? Kakati nado vọ́ gandudu he ko tin lẹ jlado, e na yí gandudu olọn mẹ tọn etọn he nọ yin “Ahọluduta Jiwheyẹwhe tọn” do diọtẹnna yé. (Malku 1:14, 15; Matiu 6:10) Biblu dọ dọ: “Jiwheyẹwhe olọn tọn na ze ahọluduta de dai he . . . na gídí ahọluduta ehe lẹpo bo na hẹn yé wá opodo, bọ ewọ kẹdẹ wẹ na nọte kakadoi.” (Daniẹli 2:44) Enẹ dohia dọ Jiwheyẹwhe na doalọtena ahizi he mí nọ mọ to egbé lẹ.

 Nawẹ mí wagbọn do yọnẹn dọ Ahọluduta Jiwheyẹwhe tọn ma na wá hò ahizi? Pọ́n nue bọdego lẹ.

1.  1. Huhlọn. Jiwheyẹwhe Ganhunupotọ lọ dè wẹ Ahọluduta lọ nọ mọ huhlọn yí sọn.—Osọhia 11:15.

    Nuhewutu ehe do yin nujọnu: Gandudu gbẹtọvi lẹ tọn nọ ganjẹ akuẹ he yé nọ mọ sọn tòvi lẹ si go whẹpo nude nido yin wiwà. Ehe nọ saba hẹn alọgodo-kuẹ yíyí, ajojijẹ po walọ ylankan devo lẹ po wá. Amọ́, Jiwheyẹwhe Ganhunupotọ lọ wẹ nọ nọgodona Ahọluduta etọn, enẹwutu e na penugo nado na mẹhe ji e to gandu do lẹ nuhe sin hudo yé do to whelẹponu.—Salmu lẹ 145:16.

2.  2. Gandutọ. Jiwheyẹwhe ko de Jesu Klisti taidi Gandutọ Ahọluduta lọ tọn.—Daniẹli 7:13, 14.

    Nuhewutu ehe do yin nujọnu: Gandutọ he tlẹ yọ́n hugan lẹ gán yin nuyiwadeji nado wà nuylankan. (Yẹwhehodọtọ 7:20) Amọ́ Jesu uwọ gbọnvo, e ko dohia dọ mẹde ma gán yí alọgodo-kuẹ do họ̀ emi. (Matiu 4:8-11) Humọ, e nọ do owanyi hia mẹhe ji e to gandu do lẹ to whelẹponu, podọ owanyi ehe nọ whàn ẹn nado hò dagbemẹninọ yetọn pọ́n.—Salmu lẹ 72:12-14.

3.  3. Osẹ́n lẹ. Osẹ́n Ahọluduta Jiwheyẹwhe tọn lẹ tọn pé bosọ nọ namẹ ayajẹ.—Salmu lẹ 19:7, 8.

    Nuhewutu ehe do yin nujọnu: Gbẹtọvi lẹ nọ saba dosẹ́n he gẹdẹ bo vẹawu nado yìn lẹ kavi dọ yé ni ṣì osẹ́n lọ do, podọ ehelẹ gán hẹn ahizi hihò wá. Amọ́, osẹ́n Jiwheyẹwhe tọn uwọ yọ́n bosọ nọ wà dagbe namẹ. (Isaia 48:17, 18) Podọ, osẹ́n ehelẹ ma gando nue mẹde nọ wà lẹ kẹdẹ go, ṣigba e sọ gando nue nọ whànmẹ nado yinuwa go. (Matiu 22:37, 39) Jiwheyẹwhe nọ mọ nue to ahun mítọn mẹ, podọ e na dike bọ osẹ́n lọ lẹ na yin dido po mẹtọnhopọn po.—Jelemia 17:10.

 Mí jlo dọ a ni plọnnu dogọ gando opagbe Biblu tọn he dọ gandudu he ma nọ hò ahizi na tin to sọgodo go.

•   Hia hosọ lọ “Ahọluduta Jiwheyẹwhe Tọn—Gandudu de He Ma Nọ Hò Ahizi” nado mọ whẹwhinwhẹn atọ̀n devo he wutu Ahọluduta Jiwheyẹwhe tọn ma na hò ahizi gbede.

•   Pọ́n video lọ Etẹwẹ Ahọluduta Jiwheyẹwhe Tọn Yin? nado plọnnu dogọ gando Ahọluduta Jiwheyẹwhe tọn go gọna nue e na wà na aigba.

•   Tẹ́n tito Biblu pinplọn tọn vọnu mítọn pọ́n nado mọ lehe a gán mọaleyi sọn opagbe Biblu tọn lẹ mẹ do.