•    “To owhe ehe mẹ, Chine na linlin yozó sinsinyẹn gọna akúdido atọ̀ntọ he nkọ yé ma ko tindo to whenuho mẹ pọ́n tọn.”—Linlin The Guardian tọn to 7 septembre 2022.

•    “Na owhe atọ́n debọdo-dego, otò Aflika tọn delẹ na pehẹ akúdido sinsinyẹn.”—Linlin UN News tọn to 26 août 2022.

•    “Susu otò he to Europe lẹ tọn wẹ na pehẹ akúdido sinsinyẹn he nkọ ma ko wá aimẹ pọ́n sọn owhe 500 lẹ die, podọ e taidi dọ akúdido ehe wẹ na ylan hugan.”—Linlin BBC News tọn to 23 août 2022.

 Weyọnẹntọ susu wẹ dọ dọ akúdido mọnkọ lẹ na zindonukọn bo na tlẹ sọ to sinsinyẹn deji. Be todido de gbẹ́ tin na sọgodo dagbe de ya? Etẹ Biblu dọ gandego?

 Nuhe Biblu ko dọ gando azán mítọn go:

•    “Núdùdù whèdomẹ lẹ . . . na tin sọn fide jẹ fide.”—Luku 21:11.

 Akúdido nọ saba hẹn núdùdù whèdomẹ wá. Núdùdù whèdomẹ mọnkọ lẹ he nọ saba hẹn yajiji po okú po wá sọgbe hẹ nuhe Biblu ko dọ dọ e na jọ lẹ.—Osọhia 6:6, 8.

 Biblu dọ whẹwhinwhẹ́n tangan he wutu akúdido fọ́n bo to sinsinyẹn deji. Biblu dọ dọ:

•    “E ma tin to huhlọn mẹhe to zọnlinzin tọn mẹ nado deanana afọdide etọn lẹ.”—Jelemia 10:23.

 Ehe dohia dọ gbẹtọvi lẹ ma gán “deanana afọdide [yetọn] lẹ” kavi paṣẹ do yede ji bọ e na pà yé. Nudide ylankan yetọn lẹ wẹ nọ saba zọ́n bọ akú nọ do bọ osin sọ nọ hán.

•    Suhugan weyọnẹntọ lẹ tọn wẹ yigbe dọ nuyiwa gbẹtọvi lẹ tọn wẹ zọ́n bọ akú to dido gbọn fisusu to ogbẹ̀ lọ blebu mẹ.

•    Nuyiwa nukunkẹnnọ lẹ tọn po mẹhe ma nọ lẹnnupọndo sọgodo ji whẹpo do ze osẹ́n lẹ dai po tọn nọ zọ́n bọ yè nọ hù zungbo lẹ sudo, hẹn ogbẹ̀ lọ mẹ flu bo masọ nọ yí nuyọnẹn do zan onú jọwamọ tọn lẹ. Ehe lẹpo nọ zọ́n bọ mí nọ ba osin pò.

 Amọ́, Biblu na mí todido.

 Biblu dopà dọ Jiwheyẹwhe na jla nulẹ do bọ osin ma nasọ hán ba. Gbọnna?

1.  1. Jiwheyẹwhe na hù “mẹhe to aigba husudo lẹ.” (Osọhia 11:18) E na de mẹhe nọ zọ́n bọ mí nọ ba osin pò lẹ sẹ̀, enẹ wẹ mẹylankan po nukunkẹnnọ he to ogbẹ̀ lọ hẹngble lẹ po.—2 Timoti 3:1, 2.

2.  2. “Aigba-klo he gọ́ na yozò na lẹzun osindò he gọ́ na ofán lẹ.” (Isaia 35:1, 6, 7) Jiwheyẹwhe na jla nuhe akúdido ko hẹngble lẹ do bo na diọ aigba zun paladisi he gọ́ na osin susu de.

3.  3. “Hiẹ nọ penukundo aigba go, bo nọ hẹn ẹn dojó taun bọ e nọ de sinsẹ́n susugege tọ́n.” (Salmu lẹ 65:9) Jiwheyẹwhe na dona aigba sọmọ bọ núdùdù dagbedagbe susu po osin he wé po na tin na mẹlẹpo.