MÌ NỌ TO AṢEJI!
Akuẹ Liva Susu lẹ Yiyizan Na Awhàn—Kọdetọn Tẹlẹ Wẹ E to Hinhẹnwa?
Akuẹ he nọ yin yiyizan na awhàn nọ sù taun.
“Lẹdo aihọn pé, akuẹ he nọ yin yiyizan na awhàn voovo he to yìyì to alọnu lẹ ko yì nudi dọla liva 2 200.”—Sọgbe linlin The Washington Post tọn to 13 février 2024.
Nuhe nọ yin hinhẹngú lẹ hugan akuẹ. Lẹnnupọndo apajlẹ dopo poun ji, enẹ wẹ: Awhàn he to yìyì to Ukraine.
Awhànfuntọ lẹ. Sọgbe hẹ sọhayinanú delẹ, diblayi awhànfuntọ 500 000 wẹ ko yin hùhù kavi gbleawu sọn whenue gbọ́n awhàn lọ bẹjẹeji to owhe awe die.
Tòvi lẹ. Sọgbe hẹ linlin he ONU na, hugan gbẹtọ 28 000 wẹ ko kú kavi gbleawu. Etomọṣo, omẹ nukundeji ONU tọn de dọ dọ: “E na vẹawu taun nado dọ omẹ nẹmu he awhàn ehe ko hẹnnugble na.” a
Yajiji he awhàn ehe po hunyanhunyan he tin lẹdo aihọn pé lẹ po ko hẹnwa mayọnjlẹ.
Gbẹtọ livi 114. To septembre 2023, ehe wẹ sọha mẹhe to dandannu glọ nado sẹtẹn na awhàn kavi danuwiwa wutu lẹdo aihọn pé lẹ tọn.
Gbẹtọ livi 783. Ehe wẹ sọha mẹhe to oyà núdùdù whèdomẹ tọn ji lẹ tọn. “Hunyanhunyan wẹ zọ́n bọ mẹsusu do to oyà núdùdù whèdomẹ tọn ji, na 70 to kanweko ji mẹhe huvẹ to hùhù lẹdo aihọn pé lẹ tọn wẹ nọ nọ̀ fihe awhàn po danuwiwa po to núgbà te lẹ.”—Programme alimentaire mondial.
Be awhàn na wá doalọte gbèdopo ya? Be todido tin dọ jijọho na wá tin gbede ya? Be núdùdù planplan he aigba nọ detọ́n lẹ na wá pemẹnu to gbèdopo bọ huvẹ po ohẹ́n po ma nasọ tin ba ya? Etẹ Biblu dọ?
Ojlẹ awhàn tọn de
Biblu dọ dọdai dọ awhàn na gbayipe, bo yí awhàn jlẹdo osọ́-kùntọ de go to linlẹn de mẹ.
“Osọ́ devo he tindo sinmẹ miyọ́nnọ de tọ́njẹgbonu, yè sọ nagbè mẹhe sinai to e ji nado de jijọho sẹ̀ sọn aigba ji, na yé nido nọ hù ode awetọ, ohí daho de sọ yin nina ẹn.”—Osọhia 6:4.
Osọ́-kùntọ awe devo lẹ hodo osọ́-kùntọ ehe, podọ to linlẹn de mẹ, yé nọtena huvẹ po okú po na azọ̀nylankan kavi nudevo lẹ wutu. (Osọhia 6:5-8) Nado plọnnu dogọ gando dọdai Biblu tọn ehe go gọna lehe e to hẹndi mọ to ojlẹ mítọn mẹ do, hia hosọ lọ “Osọ́-Kùntọ Ẹnẹ lọ lẹ—Mẹnu Wẹ Yé Yin?”
Sọgodo jijọho tọn de
To madẹnmẹ, nuhe aigba nọ detọ́n lẹ ma nasọ yin yiyizan nado nọgodona awhàn ba. Amọ́, e ma yin vivẹnudido gbẹtọvi lẹ tọn wẹ na hẹn ehe yọnbasi. Biblu dọ dọ:
Jiwheyẹwhe na hẹn ‘awhàn wá opodo lẹdo aigba pé.’—Salmu lẹ 46:9.
Jiwheyẹwhe na vọ́ nuhe awhàn ko hẹngble lẹpo jlado. “Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—Osọhia 21:4.
Jiwheyẹwhe na hẹn ẹn diun dọ gbẹtọvi lẹpo tin to jijọho mẹ. “Omẹ ṣie lẹ na nọ nọ̀ lẹdo jijọho tọn de mẹ, to fininọ he tindo hihọ́ lẹ podọ to gbọjẹtẹn he vò fẹẹ lẹ mẹ.”—Isaia 32:18.
Sọgbe hẹ dọdai Biblu tọn, awhàn po nujijọ devo he mí to mimọ to egbehe lẹ po dohia dọ ojlẹ jijọho tọn ehe ko sẹpọ.
Nawẹ Jiwheyẹwhe na hẹn sọgodo jijọho tọn ehe wá gbọn? E na wàmọ gbọn gandudu olọn mẹ tọn etọn kavi Ahọluduta etọn gblamẹ. (Matiu 6:10) Nado plọnnu gando nuhe Ahọluduta ehe yin po ale he e na hẹnwa na we lẹ po go, pọ́n video kleun ehe Etẹwẹ Ahọluduta Jiwheyẹwhe Tọn Yin?
a Miroslav Jenca, alọgọtọ wekantọ daho ONU tọn to Europe, to 6 décembre 2023.
A Gán Sọ Pọ́n Hosọ Ehelẹ
GBLỌNDO NA KANBIỌ SINAI DO BIBLU JI LẸ
Jijọho to Aigba Ji—Nawẹ E Na Wá Gbọn?
Plọnnu gando lehe Jiwheyẹwhe dopagbe nado hẹn jijọho wá aihọn mẹ gbọn Ahọluduta etọn gblamẹ do go.
HOSỌ DEVO LẸ
Todido Tin Dọ Osọ Na Yọ́n
Naegbọn opagbe he to Biblu mẹ lẹ gbọnvo taun na opà he gbẹtọvi lẹ nọ do gọna nue yé nọ dọ dọ e na wá jọ lẹ?
NUPLỌNMẸ TANGAN BIBLU TỌN LẸ
Naegbọn Jiwheyẹwhe Do Jotẹnna Yajiji?
Mẹsusu wẹ nọ kanse dọ naegbọn wangbẹna po yajiji po do gọ́ gbẹ̀mẹ sọmọ. Gblọndo he Biblu na na kanbiọ enẹ hẹn pekọ wá namẹ bosọ miọnhomẹnamẹ taun.
ZẸẸMẸ WEFỌ BIBLU TỌN LẸ TỌN
Zẹẹmẹ Osọhia 21:4 Tọn—“Jiwheyẹwhe Nasọ Súnsún Dasin Lẹpo Sẹ̀”
Wefọ ehe bẹ opagbe jiawu de hẹn gando sọgodo go.
YỌ́N MÍ DOGỌ
Biọ Dọ Kunnudetọ de Ni Wá Dla We Pọ́n
Dọhodo kanbiọ sinai do Biblu ji de ji, kavi plọnnu dogọ gando Kunnudetọ Jehovah tọn lẹ go.
