Awhàn he to yìyì to Ukraine, gọna kọdetọn he ninọmẹ aimẹ tọn he to didiọ lẹ nọ hẹnwa lẹ zọ́n bọ núdùdù susu ma tin-to-aimẹ lẹdo aihọn pé ba. Ehe yin nugbo to otò he to nukunhun lẹ mẹ, fie e to awuvẹ na mẹsusu nado mọ núdùdù he pemẹnu te.

•   “Awhàn, ninọmẹ aimẹ tọn he to didiọ gọna ahivivẹ amì, miyọ́n lẹtliki tọn po onú mọnkọ devo lẹ po tọn zọ́n bọ núdùdù ma nọ yin awuwlena bo masọ nọ yin mimá pé dile e jẹ do.”—António Guterres, Wekantọ Daho ONU tọn to 17 juillet 2023.

•   “Na otò Russie tọn masọ kọngbedopọ dọ jinukun lẹ ni nọ yin bibẹsọn Ukraine yì otò devo lẹ mẹ wutu, weyọnẹntọ lẹ mọdọ ehe na zọ́n bọ núdùdù nasọ hán dogọ lẹdo aihọn pé bosọ vẹahi taun to otò wamọnọ tọn lẹ mẹ, titengbe to agewaji Aflika tọn podọ to otò he to ṣẹnṣẹn whèzẹtẹn tọn lẹ mẹ.”—Sọgbe hẹ nuhe Atalayar.com dohia to 23 juillet 2023.

 Pọ́n nuhe Biblu dọ gando whèdomẹ núdùdù tọn po sọgodo po go.

•   Jesu ko dọ jẹnukọn dọmọ: ‘Akọta na fọ́n do akọta ji podọ ahọluduta do ahọluduta ji, bọ núdùdù whèdomẹ nasọ tin.’—Matiu 24:7.

•   Owe Osọhia tọn dọhodo osọ́-kùntọ ẹnẹ delẹ ji to yẹhiadonu-liho. Dopo to osọ́-kùntọ enẹlẹ mẹ nọtena awhàn. Dehe bọdego nọtena huvẹ, yèdọ ojlẹ de he mẹ núdùdù ma na tin bo nasọ vẹahi taun te. “Yẹn sọ mọ, podọ pọ́n! osọ́ yuu de, bọ mẹhe sinai to e ji tindo nujlẹgàn ovi awenọ de to alọ etọn mẹ. Yẹn sọ sè nuhe taidi ogbè de . . . dọmọ: ‘Nujlẹnu likun tọn dopo na denali dopo, podọ nujlẹnu balekun tọn atọ̀n na denali dopo.’”—Osọhia 6:5, 6.

 Dọdai Biblu tọn he gando whèdomẹ núdùdù tọn go ehe to hẹndi mọ todin to ojlẹ he Biblu ylọdọ “azán godo tọn lẹ” mẹ. (2 Timoti 3:1) Nado plọnnu dogọ gando “azán godo tọn lẹ” po osọ́-kùntọ ẹnẹ he yin nùdego to owe Osọhia tọn mẹ lẹ po go, pọ́n video lọ Ninọmẹ Aihọn Tọn Diọ sọn 1914 podọ hia hosọ lọ “Osọ́-Kùntọ Ẹnẹ lọ lẹ—Mẹnu Wẹ Yé Yin?”

•   Ayinamẹ yọ́n-na-yizan he to Biblu mẹ lẹ gán gọalọna mí nado pehẹ ninọmẹ sinsinyẹn lẹ, ehe bẹ ahivivẹ núdùdù tọn kavi núdùdù whèdomẹ hẹn. Pọ́n apajlẹ delẹ to hosọ lọ “Lehe A Gán Dowéna Akuẹ Do mẹ.”

•   Biblu sọ na mí todido dọ nulẹ na wá pọnte. E dopà dọ ojlẹ de na wá whenue “jinukun susugege na tin to aigba ji” bọ mẹlẹpo na tindo núdùdù susu nado dù. (Salmu lẹ 72:16) Nado plọnnu dogọ gando todido sọgodo tọn ehe go gọna nuhewutu a gán dejidego, hia hosọ lọ “Todido Tin Dọ Osọ Na Yọ́n.”