Eyin Azọ́n Gbledo We—Ayinamẹ Biblu Tọn He Gán Gọalọna We Lẹ

MÌ HÒ (video kavi hoyidokanji lọ)

Eyin azọ́n gbledo we, e gán yinuwado ninọmẹ akuẹzinzan tọn towe, dagbemẹninọ whẹndo towe tọn, numọtolanmẹ towe po ayiha towe po ji. Ayinamẹ dagbe Biblu tọn he to odò ehelẹ gán gọalọna we nado pehẹ ninọmẹ lọ.

Dọ numọtolanmẹ towe na mẹdevo lẹ.

Nuhe Biblu dọ: “Họntọn nugbo nọ yiwannamẹ to whelẹponu.”—Howhinwhẹn lẹ 17:17.

Eyin azọ́n gbledo we, e gán nọ hẹn we blawu, a gán gblehomẹ, apọ̀ gán ṣì we, podọ a tlẹ gán lẹndọ emi ma yọ́n azọ́n wẹ sin. Amọ́ eyin a dọ numọtolanmẹ towe tọ́n na whẹndo kavi họntọn vivẹ́ towe lẹ, yé gán dọ kavi wà nude he na vọ́ huhlọn na we. Yé tlẹ gán na we ayinamẹ dagbe he na gọalọna we nado mọ azọ́n yọyọ de.
Ma do lẹnpọn na dewe gbau blo.

Nuhe Biblu dọ: “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ.”—Matiu 6:34.

Nugbo wẹ dọ Biblu na mí tuli nado nọ bayi tito lẹ hlan sọgodo. (Howhinwhẹn lẹ 21:5) Amọ́, e sọ na mí ayinamẹ nado dapana magbọjẹ kavi lẹnpọn zẹjlẹgo gando sọgodo go. Mí nọ saba hanú gando nuhe sọgan nọma jọ pọ́n gbede lẹ go. Enẹwutu, e pọnte nado nọ ze ayiha do nuhe a gán wà to azán dopodopo ji lẹ ji.

Biblu sọ na ayinamẹ nuyọnẹn tọn lẹ gando lehe a gán pehẹ apọ̀ he gán to ṣiṣi we todin lẹ go do. Hia hosọ lọ “Vò sọn Lẹnpọn Si” nado plọnnu dogọ.
Bayi diọdo he jẹ lẹ gando tito akuẹzinzan tọn towe go.

Nuhe Biblu dọ: “Yẹn ko plọn . . . lehe yẹn sọgan tindo susugege do tọn podọ lehe yẹn sọgan nọ ohẹ́n mẹ do tọn.”—Filipinu lẹ 4:12.

Bayi diọdo sọgbe hẹ ninọmẹ towe dintọn. Ehe na biọ dọ a ni diọ lehe a nọ zan akuẹ do, na a nikaa zan akuẹ zẹ̀ nue a do go. Nọ aṣeji ma nado duahọ he ma yin dandan tọn lẹ.—Howhinwhẹn lẹ 22:7.

Hia hosọ lọ “Lehe A Gán Dowéna Akuẹ Do” nado mọ ayinamẹ lẹ dogọ gando lehe a gán bayi diọdo lẹ sọgbe hẹ ninọmẹ akuẹzinzan tọn towe dintọn do go.
Nọ zan whenu towe po nuyọnẹn po.

Nuhe Biblu dọ: “Mì nọ yí nuyọnẹn do to. . . whenu mìtọn zan to aliho dagbe hugan mẹ.”—Kolosinu lẹ 4:5.

Eyin a ma tlẹ sọ do tito tangan de na azọ́nmẹ yìyì, ma dovọ́na lehe a nọ zan whenu towe do dai blo. Mọwiwa na gọalọna we nado nọ nọ̀ titoji to gbẹzan towe mẹ bọ homẹ nasọ nọ hùn we gando dewe go.
Diọda sọgbe hẹ ninọmẹ towe dintọn.

Nuhe Biblu dọ: “Ale tin to azọ́n sinsinyẹn wunmẹ lẹpo mẹ.”—Howhinwhẹn lẹ 14:23.

Nọ wleawufo nado wazọ́n he gbọnvona dehe a wà dai. E gán biọ dọ a ni wazọ́n he demẹpò kavi dehe ma na na akuẹ sọ dehe a nọ wà dai.
Tẹdo tito towe go.

Nuhe Biblu dọ: “Do okún towe to afọnnu, podọ a dike alọ towe gbọjẹ kakajẹ whèjai blo; na hiẹ ma yọ́n dehe na tindo kọdetọn dagbe.”—Yẹwhehodọtọ 11:6.

Ma jo azọ́n dindin do blo. Nọ dọna mẹlẹ dọ emi to azọ́n dín. Dọho hẹ hẹnnumẹ, mẹyinyọnẹn, azọ́nwatọgbẹ́ dai tọn lẹ po kọmẹnu towe lẹ po. Nọ pọ́n fie yè to azọ́nwatọ dín te lẹ, ajọjijla he dohia dọ yè to azọ́nwatọ dín lẹ gọna nọtẹn Intẹnẹt tọn azọ́nwhè he to azọ́nwatọ dín lẹ tọn. Yọnẹn dọ yè gán kanhose we to fie a dín azọ́n yì lẹ, podọ e gán sọ biọ dọ a ni kanwe hlan azọ́nwhè susu whẹpo do mọ azọ́n.