To Agbàwhinwhlẹn Olympique Tọn 2024 tọn whenu, nudi gbẹtọ liva atọ́n wẹ na pọ́n agbàwhlẹntọ he wá sọn otò 206 mẹ dile yé na to alọdo to aihundida lọ lẹ mẹ. Thomas Bach, he yin azinponọ Wedegbẹ́ Agbàwhinwhlẹn Olympique Tọn Lẹdo Aihọn Pé dọ dọ: “Mí to alọ do to nuwiwa de mẹ he nọ kọ̀n aihọn lọ dopọ to jijọho mẹ. Mì gbọ mí ni duvivi gbigbọ aihundida Olympique tọn ehe tọn to jijọho mẹ, dile mí to ponọ taidi pipli gbẹtọvi lẹ tọn dopo gee lọ he yin kinkọndopọ, mahopọnna vogbingbọn mítọn lẹpo.”

 Be Agbàwhinwhlẹn Olympique tọn lẹ gán gọalọna mí nado jẹ yanwle he yiaga tlala mọnkọ lẹ kọ̀n ya? Be todido tin dọ mí na tindo jijọho po pọninọ nujọnu tọn po ya?

 Agbàwhinwhlẹn Olympique tọn owhe ehe tọn ma yin aihundida lanmẹyiya tọn lẹ poun. Aihundida lọ lẹ zinnudo whẹho paa gọna tonudidọ tọn he nọ klan gbẹtọvi lẹ ji. Delẹ to yé mẹ wẹ jlọjẹ gbẹtọvi lẹ tọn lẹ, akọ̀-ṣinṣinyan, wangbẹnamẹ sinsẹ̀n tọn, po whẹho zẹ́nmasọ tọn lẹ po.

 Aihundida Olympique tọn taidi ehe nkọ lẹ he nọ bẹ gbẹtọ he wá sọn ofi voovo lẹ hẹn nọ zọ́n bọ mẹlẹ nọ deayidai. Amọ́, nujijọ ehelẹ sọ nọ tá hinhọ́n do pọndohlan po nuyiwa he nọ klan gbẹtọvi lẹ po ji bo tlẹ sọ nọ yidogọna yé, kakati yé ni hẹn jijọho po pọninọ he nọ dẹn-to-aimẹ po wá.

 Biblu ko dọ dọdai walọyizan he na zọ́n bọ e na vẹawuna gbẹtọvi lẹ nado nọpọ́ to egbehe lẹ tọn. (2 Timoti 3:1-5) Nado plọnnu dogọ gando dọdai Biblu tọn ehe go, hia hosọ lọ “La Bible a-​t-​elle prédit la mentalité et la conduite des gens de notre époque?”

 Biblu namẹ todido nujọnu tọn de dọ jijọho po pọninọ po na tin lẹdo aihọn pé. E dopà dọ gbẹtọvi he to aigba ji lẹpo na yin kinkọndopọ to gandudu olọn mẹ tọn de glọ, enẹ wẹ “Ahọluduta Jiwheyẹwhe tọn.”—Luku 4:43; Matiu 6:10.

 Ahọlu Ahọluduta enẹ tọn, yèdọ Jesu Klisti na hẹn jijọho wá lẹdo aihọn pé. Biblu dọmọ:

•    “Dodonọ na vùn, bọ jijọho na sudeji.”—Salmu lẹ 72:7.

•    “Ewọ na nọ whlẹn wamọnọ he to awhádo na alọgọ . . . E na nọ whlẹn yé sọn kọgbidinamẹ po danuwiwa po mẹ.”—Salmu lẹ 72:12, 14.

 Etlẹ yin to egbehe, nuplọnmẹ Jesu tọn lẹ ko kọ̀n gbẹtọ livi susu lẹ dopọ to otò 239 mẹ. Taidi Klistiani lẹ, Kunnudetọ Jehovah tọn lẹ ko plọn nado nọ nọ̀ jijọho mẹ. Nado mọ nuhe gọalọna yé, hia zinjẹgbonu Atọ̀họ̀-Nuhihọ́ lọ Tọn he hosọ etọn yin “A Gán Gbawhàn Wangbẹna Tọn!”