To dimanche 20 novembre 2022, ONU dotana opli he basi yé te gando ninọmẹ aimẹ tọn he nọ diọ lẹ go. Yé kọngbedopọ nado yí akuẹ do nọgodona otò he ma jẹ adọkun bo to yaji na ninọmẹ aimẹ tọn he nọ diọ lẹ wutu. Amọ́, mẹsusu wẹ mọdọ enẹ ma na doalọtena ninọmẹ aimẹ tọn lẹ ma nado diọ.

•    To 19 novembre 2022, António Guterres he yin wekantọ daho ONU tọn dọ dọ, “Homẹ ṣie hùn dọ mí basi dide nado de akuẹ de dovo nado nọ gọalọna mẹhe ninọmẹ aimẹ tọn to nuhẹngblena lẹ. Amọ́, e họnwun dọ enẹ ma na didẹ nuhahun lọ pete . . . Gẹ́gẹ́ ji wẹ planẹti mítọn te bọ yè dona yinuwa to niyaniya mẹ.”

•    To 20 novembre 2022, Mary Robinson he yin togán Irlande tọn podọ Nukọntọ Na Jlọjẹ Gbẹtọvi lẹ Tọn Na ONU to ojlẹ de mẹ wayi, dọ to opli lọ tẹnmẹ dọ, “Whedepopenu wẹ ninọmẹ aimẹ tọn lẹ gán diọ bo hẹnnugble to aihọn lọ mẹ.”

 Jọja lẹ to nuhà taun gando nuhe na jọ do planẹti mítọn go to sọgodo ji. Amọ́, be akọta lẹ gán wazọ́n dopọ nado hẹn opà he yé do di bo doalọtena ninọmẹ aimẹ tọn he nọ diọ lẹ ya? Etẹ Biblu dọ gandego?

 Biblu dohia dọ mahopọnna azọ́n sinsinyẹn po vivẹnudido akọta lẹ tọn po, nudepope he yé wà nado doalọtena ninọmẹ aimẹ tọn he nọ hẹnnugble lẹ na do dogbó. Pọ́n whẹwhinwhẹ́n awe delẹ he wutu mí dọ mọ:

•    “Nuhe gbán ma sọgan yin jijlọ.”—Yẹwhehodọtọ 1:15.

   Zẹẹmẹ: Nugopipe tohọluduta lẹ tọn do dogbó, na gbẹtọvi lẹ ma yin didá nado deanana yenọzo. (Jelemia 10:23) Eyin akọta lẹ tlẹ penugo bo wazọ́n dopọ, e ma na pà yé nado didẹ nuhahun aihọn lọ tọn lẹ, mahopọnna vivẹnudido yetọn lẹ.

•    “Na gbẹtọ lẹ na yin wanyina mẹdetiti tọ́, wanyina akuẹtọ, . . . gbigbọ gbekọndopọ tọn matindotọ.”—2 Timoti 3:2, 3.

   Zẹẹmẹ: Biblu hẹn ẹn họnwun dọ to ojlẹ mítọn mẹ gbẹtọ lẹ na yin ṣejannabinọ bo ma na jlo na wazọ́n dopọ bo hẹn ale wá na mẹlẹpo.

 E ma yin opà he aṣẹpatọ lẹ nọ do wẹ na zọ́n bọ planẹti mítọn nado yọ́n to sọgodo. Jiwheyẹwhe ko de Gandutọ aihọn tọn he pegan de, enẹ wẹ Jesu Klisti. Biblu dọ gandego dọ:

•    “Huhlọn gandudu tọn na tin to abọ́ etọn ji. Ewọ na nọ yin yiylọdọ Ayinamẹtọ Jiawu, Jiwheyẹwhe Huhlọnnọ, Otọ́ Madopodo, Ahọvi Jijọho tọn.”—Isaia 9:6.

 Jesu wẹ yin Ahọlu Ahọluduta Jiwheyẹwhe tọn, yèdọ gandudu de he to olọn mẹ. (Matiu 6:10) E tindo huhlọn, nuyọnẹn po ojlo lọ po nado penukundo planẹti mítọn po mẹhe to e ji lẹ po go. (Salmu lẹ 72:12, 16) To gandudu etọn glọ, gandudu olọn mẹ tọn enẹ na doalọtena “mẹhe to aigba husudo lẹ” bo nasọ jla ninọmẹ planẹti lọ tọn do.—Osọhia 11:18; Isaia 35:1, 7.

 Eyin a jlo na plọnnu dogọ gando pọngbọ tẹgbẹ tọn na ninọmẹ aimẹ tọn he nọ diọ bo nọ hẹnnugble lẹ go, hia hosọ lọ “Etẹ Biblu Dọ Gando Ninọmẹ Aimẹ Tọn He Nọ Diọ lẹ po Sọgodo Mítọn po Go?”