Etẹwẹ nọ wá ayiha mẹ na we eyin a sè hogbe lọ “apokalipsi”? Vlavo a nọ lẹndọ nude wẹ he na hẹnnugble gbọn ogbẹ̀ lọ blebu mẹ, bo tlẹ gán hù nuhe togbẹ̀ to ogbẹ̀ lọ mẹ lẹpo. Mẹdelẹ nọ lẹndọ onú mọnkọ de wẹ na wá jọ do ogbẹ̀ lọ go, podọ yé nọ lẹn mọ titengbe eyin yé hia linlinwe lẹ bo mọ nuhe to odò ehelẹ nkọ:

•   “Awhàn he yè nọ yí bọmbu do fùn—e yọnbayi taun dọ awhàn mọnkọ de ni wá aimẹ. E gán yindọ gbẹtọ lẹ lọsu wẹ na bayi tito etọn, e gán sọ wá aimẹ gbọn kosọ dali kavi gbemanọpọ kleun de poun wẹ na fọ́n ẹn dote.”—Bulletin of the Atomic Scientists.

•   “To owhe ao he wayi lẹ mẹ, yujẹhọn sinsinyẹn, zungbo he jimiyọ́n, akúdido, yozò he nọ zọ́n bọ aṣápán nọ diọ sinmẹ zun wewe, yozò sinsinyẹn po tọ̀gbamẹ he ma ko jọ pọ́n lẹ po wẹ jọ lẹdo aihọn pé.”—National Geographic.

•   “Owẹ̀n wunmẹ he to Aflika lẹ hẹnnugble taun hugan owhe he wayi lẹ tọn.”—The Associated Press.

 Be nude na wá và aigba lọ sudo wẹ ya? Etẹwẹ Biblu dọ gandego?

 Lala. Ohó Jiwheyẹwhe tọn Biblu, na mí jide dọ aigba na nọ aimẹ kakadoi. (Yẹwhehodọtọ 1:4) Jiwheyẹwhe ma na và aigba he e dá lọ sudo, amọ́ e na hù “mẹhe to aigba husudo lẹ.”—Osọhia 11:18.

 Biblu dohia dọ, “aihọn” he na wá vivọnu wẹ aihọn gbẹtọ he ma nọ setonuna Jiwheyẹwhe bo nọ wà nue jlo yé lẹ tọn. Jiwheyẹwhe na và “aihọn omẹ jijọ-madi-Jiwheyẹwhe tọn lẹ tọn” dile e wà do to ojlẹ Noa tọn mẹ.—2 Pita 2:5; 3:7.

 1 Johanu 2:17 dọ dọ, “aihọn to jujuyi po ojlo etọn po.” Wefọ ehe dohia dọ gbẹtọ he to nuylankan wà bo ma lẹnvọjọ lẹ wẹ Jiwheyẹwhe na và sudo, e ma yin planẹti mítọn aigba ehe.

 Biblu ma dọ whenue ogbẹ̀ lọ na vọ̀ taun na mí. (Matiu 24:36) Amọ́, e dohia dọ opodo lọ ko sẹpọ. Biblu dọ dọ nuhe to odò ehelẹ na jọ whẹpo opodo lọ nado wá:

•   Nudelẹ taidi awhàn, núdùdù whèdomẹ, azọ̀nylankan po aigba sisọsisọ sinsinyẹn lẹ po na jọ “sọn fide jẹ fide.”—Matiu 24:3, 7, 14; Luku 21:10, 11; Osọhia 6:1-8.

•   Gbẹtọ lẹ na nọ ví do yede tọn kẹdẹ mẹ taun. Di apajlẹ, yé na lẹzun ‘wanyina akuẹtọ, mayọndagbenọ podọ wazẹjlẹgonọ.’—2 Timoti 3:1-5.

 Mẹsusu wẹ kọngbedopọ dọ opodo lọ ko sẹpọ, na sọn 1914 gbọ́n, nuhe to jijọ to aihọn lọ mẹ lẹ sọgbe po nuhe Biblu dọ e na wá jọ lẹ po. Eyin a jlo na mọ nudọnamẹ lẹ dogọ, pọ́n hosọ lọ lẹ “Que révèle la chronologie de la Bible sur l’année 1914?” po Etẹwẹ Yin Ohia “Azán Godo Tọn lẹ,” Kavi ‘Ojlẹ Opodo Tọn’ lọ Tọn? po.

 To Biblu mẹ, hogbe Glẹkigbe dowhenu tọn he yin lilẹdo “apokalipsi” nọ zẹẹmẹdo “hunhundonuvo” kavi “didehia.” Hogbe enẹ nọ saba dlẹnalọdo nudọnamẹ he to nuglọ didehia. Biblu sọ dọho gando “osọhia [kavi apokalipsi] Oklunọ Jesu tọn” go, he wá aimẹ whenue Jesu yin didohia taidi mẹhe tindo huhlọn lọ nado de nuylankan he to aigba ji lẹpo sẹ̀ bo suahọ mẹhe sẹ̀n Jiwheyẹwhe lẹ.—2 Tẹsalonikanu lẹ 1:6, 7; 1 Pita 1:7, 13.

 Owe godo tọn he to Biblu mẹ nọ yin yiylọdọ Apokalipsi kavi Osọhia, na nuhe na jọ to sọgodo lẹ wẹ e bẹhẹn wutu. Owe lọ bẹ wẹndagbe po owẹ̀n todido tọn de po hẹn. (Osọhia 1:3) E sọ dohia dọ Jiwheyẹwhe na de mawadodo lẹpo sẹ̀ bo na diọ aigba zun paladisi de. To ojlẹ enẹ mẹ, gbẹtọ lẹ ma nasọ mọ awufiẹsa kavi jiya, mọ mẹde ma nasọ kú ba.—Osọhia 21:3, 4.

 Be a jlo na plọnnu dogọ gando opagbe dagbedagbe Biblu tọn ehelẹ go ya? Kunnudetọ Jehovah tọn lẹ do tito Biblu pinplọn tọn vọnu de he gán gọalọna we. Be e na jlo we dọ a ni dọho hẹ yé to egbé ya?