Nuhiha zẹjlẹgo gán hẹnnugble na we to agbasa-liho podọ to numọtolanmẹ-liho. Etlẹ gán sọ hẹn nuhahun sinsinyẹn wá hugan nuhewutu a do to nuhà.

•  Ma nọ dotó linlin ylankan lẹ hugan blo. E ma yin dandan dọ a ni yọ́n nulẹpo gando nuylankan he jọ de go. Eyin a nọ pọ́n, hia kavi dotó nususu gando nuylankan he jọ de go, obu na nọ di we taun bọ a ma nasọ do todido de.

   Ayinamẹ Biblu Tọn: “Ayiha he jẹflumẹ nọ hẹnmẹ gbọjọ.”—Howhinwhẹn lẹ 17:22.

   “E bọawu nado nọ pọ́n linlin he nọ hẹnmẹ jọsi lẹ to Intẹnẹt ji whẹwhẹ, amọ́ ehe ma nọ wà dagbe de namẹ. Eyin n’ma dotó linlin susu, nuhiha ṣie nọ depò taun.”—John.

   Lẹnnupọndo ehe ji: Be a nọ to jejeji nado sè linlin agọe tọn lẹ wẹ ya?

•  Nọ bayi tito de bo nọ hodo e to gbesisọ mẹ. Tẹnpọn bo de whenu de he a na nọ fọ́n, dùnú, wà whégbè-zọ́n towe lẹ bosọ nọ yihọ te. Eyin a do tito de nado nọ wazọ́n towe lẹ, e na gọalọna we nado de nuhiha pò.

   Ayinamẹ Biblu Tọn: “Tito mẹhe nọ dovivẹnu tọn lẹ nọ tindo kọdetọn dagbe dandan.”—Howhinwhẹn lẹ 21:5.

   “Whenue azọ̀n COVID-19 tọn bẹjẹeji, n’dovọ́na tito ṣie lẹ petepete bo wá pò na ayidedai kẹdẹ. N’jlo na zan whenu ṣie po nuyọnẹn po, enẹwutu n’bayi tito de gando azọ́n he n’dona wà egbesọegbesọ lẹ go.”—Joseph.

   Lẹnnupọndo ehe ji: Be a do tito de he a nọ pọ́n to vivọnu azán dopodopo tọn nado yọnẹn eyin a jẹ yanwle towe lẹ kọ̀n ya?

•  Nọ ze ayiha do nudagbe lẹ ji. Eyin a nọ to nulẹnpọn do nuhe a dona ko wà to ojlẹ de mẹ wayi lẹ ji kavi do nuylankan he na jọ to sọgodo lẹ ji, nuhiha towe na fọ́n bo to susudeji poun wẹ. Kakatimọ, nọ lẹnnupọndo onú awe kavi atọ̀n he mẹ a gán dopẹ́ te lẹ ji.

   Ayinamẹ Biblu Tọn: ‘Mì nọ dopẹ́.’—Kolosinu lẹ 3:15.

   “Biblu hihia gọalọna mi bọ n’ma nọ lẹnnupọn do linlin agọ̀ lẹ ji bosọ gọalọna mi nado nọ ze ayiha do nudagbe lẹ ji. Enẹ gán di nutata de, amọ́ e nọ wà dagbe namẹ!”—Lisa.

   Lẹnnupọndo ehe ji: Be a nọ ze ayiha do nuylankan he to jijọ to gbẹzan towe mẹ lẹ ji mapote bo nọ dovọ́na nudagbe he to jijọ lẹ wẹ ya?

•  Nọ ze ayiha do mẹdevo lẹ ji. Eyin a nọ to nuhà whẹwhẹ, a na nọ jlo nado nọ dewe ṣo. Kakatimọ, nọ ze ayiha do lehe a gán gọalọna mẹhe to hudo mẹ lẹ do ji.

   Ayinamẹ Biblu Tọn: “[Mì] ma nọ ze ayidonugo do ale mẹdetiti tọn mìtọn lẹ kẹdẹ ji, ṣigba do ale mẹdevo lẹ tọn ji ga.”—Filipinu lẹ 2:4.

   “N’nọ do ayajẹ eyin n’gọalọna mẹdevo lẹ. N’nọ mọdọ n’to nuhe na zọ́n bọ yé na do ayajẹ wà na yé podọ to ojlẹ dopolọ mẹ, e nọ zọ́n bọ nuhiha ṣie nọ depò. Nado dọ hójọhó, n’ma tlẹ sọ nọ mọ whenu de nado hanú ba.”—Maria.

   Lẹnnupọndo ehe ji: To mẹyinyọnẹn towe lẹ mẹ, mẹnu lẹ to yé mẹ wẹ do hudo taun, podọ etẹ a gán wà nado gọalọna yé?

•  Nọ penukundo agbasa towe go. Nọ daihun lanmẹyiya tọn ganji bosọ nọ gbọjẹ. Nọ dù núdùdù hunsindagbe tọn lẹ. Eyin a nọ penukundo agbasalilo towe go, a ma na nọ to nuhà mapote, podọ a na nọ mọdọ nulẹ na wá pọnte.

   Ayinamẹ Biblu Tọn: “Agbasa yiyizan yin alenu.”—1 Timoti 4:8.

   “Yẹn po visunnu ṣie po ma gán sọ wanu susu to kọho dile mí na ko jlo do, enẹwutu mí bayi tito aihundida lanmẹyiya tọn delẹ he mí na nọ dà to họmẹ whẹwhẹ. Ehe ko gọalọna mí nado do ayajẹ dogọ bọ mí sọ nọ fahomẹ hẹ ode awetọ.”—Catherine.

   Lẹnnupọndo ehe ji: Be a dona dù núdùdù hunsindagbe tọn susu bosọ nọ daihun lanmẹyiya tọn nado tindo agbasalilo dagbe wẹ ya?

 Gbọnvona ayinamẹ he ji mí dọhodo ehelẹ yíyí-do-yizan mẹ nado de nuhiha pò, mẹsusu wẹ ko mọaleyi to whenue yé plọnnu do opagbe jidenamẹ tọn he to Biblu mẹ lẹ ji he gando sọgodo dagbe de go. Pọ́n hosọ lọ “Dagbe Tẹwẹ Ahọluduta Jiwheyẹwhe Tọn Na Wà?”