Kakajẹ 23 mai 2022, linlin he Pipli He Nọ Penukundo Agbasalilo Go Lẹdo Aihọn Pé (OMS) na wẹ yindọ COVID-19 ko hù gbẹtọ livi 6 linlán. Amọ́, to linlin he tọ́n to 5 mai 2022 de mẹ, OMS dohia dọ mẹhe azọ̀n lọ hù lẹ sù taun humọ. Linlin lọ dọ dọ to 2020 po 2021 po gblamẹ, “sọha mẹhe kú na azọ̀nylankan COVID-19 kavi na nuhe gandego wutu lẹ tọn” diblayi livi 15. Be Biblu dọ nude gando nugbajẹmẹji sinsinyẹn mọnkọ lẹ go ya?

•    Jesu dọ dọdai dọ azọ̀nylankan, kavi azọ̀n bẹplamẹ sinsinyẹn lẹ na tin to ojlẹ de he Biblu ylọdọ “azán godo tọn lẹ” mẹ.​—Luku 21:11; 2 Timoti 3:1.

 Dọdai he Jesu dọ ko to hẹndi mọ to alọnu din. Eyin a jlo na yọ́n nudevo lẹ dogọ, hia hosọ lọ “Etẹwẹ Yin Ohia ‘Azán Godo Tọn lẹ,’ Kavi ‘Ojlẹ Opodo Tọn’ lọ Tọn?”

•    “Jiwheyẹwhe homẹmimiọn lẹpo tọn . . . nọ miọnhomẹna mí to whlepọn mítọn lẹpo mẹ.”—2 Kọlintinu lẹ 1:3, 4.

 Owẹ̀n he to Biblu mẹ ko miọnhomẹna susu mẹhe mẹvivẹ de kú do lẹ tọn. Plọnnu dogọ to hosọ ehelẹ mẹ: “Akọndidona Awufiẹsa lọ—Nuhe A Gán Wà Todin“ po “Alọgọ Dagbe Hugan lọ Na Mẹhe Ṣiọ Kú Do Lẹ” po.

•    “Na Ahọluduta towe ni wá. Na ojlo towe ni yin wiwà, kẹdẹdi to olọn mẹ, mọdopolọ to aigba ji.”—Matiu 6:10.

 To madẹnmẹ, “Ahọluduta Jiwheyẹwhe tọn” na yinuwa bọ ‘mẹdepope to mẹhe nọ nọ̀ aigba lọ ji lẹ mẹ ma na dọ, “N’to azọ̀njẹ” ba.’ (Malku 1:14, 15; Isaia 33:24) Eyin a jlo na yọ́n nuhe gandudu olọn mẹ tọn ehe yin po nuhe e na wà po, pọ́n video lọ Etẹwẹ Ahọluduta Jiwheyẹwhe Tọn Yin?

 Mí jlo dọ a ni plọn nususu dogọ gando nuhe Biblu dọ lẹ go, na hiẹ po whẹndo towe po nido sọgan mọaleyi sọn ayinamẹ po opagbe dagbedagbe he to Biblu mẹ lẹ po mẹ.