Be Danuwiwa Na Doalọte Gbede Ya?
To whenue mẹlẹ ko wà danú to fide godo, jọwamọnu wẹ nado kanse míde dọ: ‘Be Mawu ka to mítọn dọ ya? Naegbọn onú ehelẹ do to jijọ? Be danuwiwa a na wá vọ̀ gbede ya? Nawẹ n’gán vò sọn sijọsijọ si gbọn?’ Biblu na gblọndo-jọ-gblọndo na kanbiọ enẹlẹ.
Etẹwẹ Mawu nọ lẹn gando danuwiwa go?
Jiwheyẹwhe gbẹwanna danuwiwa po sẹ́nhẹngba po. (Salmu lẹ 11:5; Howhinwhẹn lẹ 6:16, 17) Podọ, Jesu he yin afọzedaitọ Jiwheyẹwhe tọn gbẹnuna devi etọn lẹ whenue yé gbleawuna mẹde godo. (Matiu 26:50-52) Mẹdelẹ nọ dọ dọ oyín Jiwheyẹwhe tọn mẹ wẹ emi to danú wà te, amọ́ ewọ ma yigbena nuyiwa mọnkọtọn. Nado dọ hójọhó, e ma tlẹ nọ dotó odẹ̀ danuwatọ lẹ tọn.—Isaia 1:15.
Jiwheyẹwhe to mẹhe to yaji lẹpo tọn dọ, kakajẹ mẹhe yè wadanu do lẹ ji. (Salmu lẹ 31:7; 1 Pita 5:7) Biblu sọ dohia dọ Mawu na de danuwiwa lẹpo sẹ̀.—Isaia 60:18.
Adọ̀ danuwiwa tọn
Biblu dọ onú tangan he nọ hẹn danuwiwa wá: “Gbẹtọ ko dugán do gbẹtọ ji na awugble etọn.” (Yẹwhehodọtọ 8:9) To whenuho gblamẹ, omẹ klogán-klogán lẹ ko yí danuwiwa do gbidikọna mẹdevo lẹ. Podọ, mẹhe yè wà danú do lẹ lọsu ko yí danuwiwa do yiavùnlọna yede.—Yẹwhehodọtọ 7:7.
Whenue danuwiwa na busẹ
Jiwheyẹwhe dopà dọ emi na de obu po danuwiwa po sẹ̀ bo na hẹn jijọho wá aigba ji. (Isaia 32:18; Mika 4:3, 4) Ewọ na:
De adọ̀ danuwiwa tọn sẹ̀. Jiwheyẹwhe na yí gandudu etọn do diọtẹnna gandudu gbẹtọvi lẹ tọn lẹdo aihọn pé. Jesu Klisti he yin Ahọlu to ahọluduta enẹ mẹ na yí homẹdagbe do yinuwa hẹ mẹlẹpo, podọ e na de kọgbidinamẹ po danuwiwa po sẹ̀. (Salmu lẹ 72:2, 14) To ojlẹ enẹ mẹ, mẹde ma nasọ wadanu ba. Gbẹtọ lẹ “nasọ nọ mọ awuvivi susu to jijọho susugege mẹ.”—Salmu lẹ 37:10, 11.
Jla nuhe danuwiwa ko hẹngble lẹpo do. Jiwheyẹwhe na jla nuhe danuwiwa ko hẹngble to gbẹtọ lẹ go do, vlavo to agbasa-liho kavi to numọtolanmẹ-liho. (Isaia 65:17; Osọhia 21:3, 4) E tlẹ sọ dopà dọ emi na fọ́n oṣiọ lẹ bọ yé na gọwá ogbẹ̀ to aigba ji to jijọho mẹ.—Johanu 5:28, 29.
Biblu na mí whẹwhinwhẹ́n dagbe lẹ he wutu mí gán yise dọ Jiwheyẹwhe na yinuwa to madẹnmẹ. Amọ́, e gán nọ paṣa we dọ, ‘Naegbọn Jiwheyẹwhe ma ko doalọtena danuwiwa kakajẹ din?’ A na mọ gblọndo kanbiọ enẹ tọn to video lọ Naegbọn Jiwheyẹwhe Do Jotẹnna Yajiji? mẹ.
a Hogbe lọ “danuwiwa” nọ saba zẹẹmẹdo obu yiyizan, titengbe do tòvi lẹ ji, nado gbàhundona yé po yanwle lọ po nado hẹn diọdo de wá to tonudidọ mẹ, to sinsẹ̀n mẹ kavi nado jla nude do to lẹdo tangan de mẹ. Etomọṣo, nuyiwa tangan delẹ tin he mẹdelẹ ma nọ yigbe dọ yè ni ylọdọ danuwiwa.
A Gán Sọ Pọ́n Hosọ Ehelẹ
HOSỌ DEVO LẸ
Lehe A Gán Duto Nuhiha Ji Do
Ayinamẹ nuyọnẹn tọn po wefọ Biblu tọn tẹlẹ po wẹ gán gọalọna we nado de nuhiha he ma yin dandan tọn lẹ pò?
HOSỌ DEVO LẸ
Todido Tin Dọ Osọ Na Yọ́n
Naegbọn opagbe he to Biblu mẹ lẹ gbọnvo taun na opà he gbẹtọvi lẹ nọ do gọna nue yé nọ dọ dọ e na wá jọ lẹ?
GBLỌNDO NA KANBIỌ SINAI DO BIBLU JI LẸ
Etẹwẹ Ahọluduta Jiwheyẹwhe Tọn Yin?
Lẹnnupọndo nuhewutu gandudu Jiwheyẹwhe tọn yiaga hú gandudu he pò lẹpo ji.
ATỌ̀HỌ̀-NUHIHỌ́ LỌ TỌN
Dagbe Tẹwẹ Ahọluduta Jiwheyẹwhe Tọn Na Wà?
Jesu yọnẹn dọ Ahọluduta Jiwheyẹwhe tọn kẹdẹ wẹ gán didẹ nuhahun gbẹtọvi lẹ tọn. Etẹwẹ Ahọluduta lọ ko wà nado hẹn mí deji dọ e na jla nulẹ do?
HOSỌ DEVO LẸ
Be Whẹdida Dodo Na Wá Tin to Aihọn mẹ Gbede Ya?
Biblu dohia dọ Jiwheyẹwhe nọ dawhẹ dodo, na gbẹtọvi lẹpo wẹ sọzẹn to nukun etọn mẹ.
NUPLỌNMẸ TANGAN BIBLU TỌN LẸ
Naegbọn Jiwheyẹwhe Do Jotẹnna Yajiji?
Mẹsusu wẹ nọ kanse dọ naegbọn wangbẹna po yajiji po do gọ́ gbẹ̀mẹ sọmọ. Gblọndo he Biblu na na kanbiọ enẹ hẹn pekọ wá namẹ bosọ miọnhomẹnamẹ taun.
