To 2023, mẹhe nọ penukundo agbasalilo go lẹ mọdọ ṣokẹdẹninọ lẹzun azọ̀n sinsinyẹn de he yé dona yawu mọ pọngbọ na. Be ehe gán pà yé ya?

•    Vivek Murthy, he yin ogán Dotozọ́nwatọ lẹpo tọn to États-Unis dọ dọ “owùnu daho de wẹ ṣokẹdẹninọ po mẹde kinklandovo po yin na agbasalilo mítọn.” Amọ́, e yidogọ dọ: “E gán pà mí nado duto e ji.” Gbọnna? “Gbọn onú kleunkleun delẹ wiwà dali egbesọegbesọ nado jihọntọn hẹ mẹdevo lẹ dogọ.” a

 E ma yin whenue mí klan míde dovo kẹdẹ wẹ mí gán tindo numọtolanmẹ ṣokẹdẹninọ tọn. Mẹdelẹ gán tindo numọtolanmẹ ṣokẹdẹninọ tọn eyin mẹsusu tlẹ lẹdo yé. Mahopọnna nudepope he wutu mí do to ṣokẹdẹ, Biblu gán gọalọna mí. E bẹ ayinamẹ yọ́n-na-yizan lẹ hẹn he gán gọalọna mí nado vẹ́ hẹ họntọn mítọn lẹ dogọ bo diahi hẹ ṣokẹdẹninọ.

 Nọ dọhodopọ hẹmẹ ganji. Gbọnvona numọtolanmẹ towe lẹ didọ tọ́n, a sọ dona nọ dotoai po sọwhiwhe po. Lehe a to ojlo dohia to mẹdevo lẹ mẹ sọ, mọ wẹ haṣinṣan towe hẹ yé na sinyẹn deji do niyẹn.

•    Ayinamẹ Biblu tọn: ‘Mì ma nọ ze ayidonugo do ale mẹdetiti tọn mìtọn lẹ kẹdẹ ji, ṣigba do ale mẹdevo lẹ tọn ji ga.’—Filipinu lẹ 2:4.

 Nọ jihọntọn hẹ mẹsusu dogọ. Wleawufo nado jihọntọn hẹ mẹhe yin mẹho na we kavi whè hú we lẹ, kavi mẹhe wá sọn aṣa kavi akọ̀ devo mẹ lẹ.

•    Ayinamẹ Biblu tọn: “Mì hùn ahun mìtọn lẹ donuvo.”—2 Kọlintinu lẹ 6:13.

 Nado mọ nudọnamẹ lẹ dogọ gando lehe mí gán jihọntọn vivẹ́ lẹ do go, hia hosọ lọ “Comment combler notre besoin d’amitié.”