“To madẹnmẹ, gbẹtọvi lẹ na pehẹ ninọmẹ aimẹ tọn he na ylan deji lẹ. Osin na gọ́ tòdaho tangan delẹ mẹ. Yozò sinsinyẹn he yè ma ko mọ pọ́n lẹ na tin. Yujẹhọn sinsinyẹn lẹ na wá aimẹ. Osin na hán to fisusu. Ogbé po kanlin livi wunmẹ susu lẹ po na busẹ. Ehe ma yin otàngblo kavi hójijlẹ. Weyọnẹntọ lẹ dọ dọ eyin nude ma yin wiwà . . . nuhe na jọ lẹ niyẹn.”—Nuhe António Guterres, he yin Wekantọ Daho ONU tọn dọ niyẹn, gando linlin he pipli de he nọ basi dodinnanu do ninọmẹ aimẹ tọn he nọ diọ lẹ ji na go, to 4 avril 2022.

 “Weyọnẹntọ lẹ to avase na dọ to owhe he ja lẹ mẹ, ninọmẹ aimẹ tọn he nọ diọ lẹ na hẹnnugble diblayin jẹ jipa dahodaho 423 [he to États-Unis] lẹpo mẹ, titengbe na yozò sinsinyẹn wutu. Nuylankan he gán jọ lẹ na taidi nugbajẹmẹji he mí nọ hia to Biblu mẹ lẹ: [enẹ wẹ] miyọ́n po otọ̀-gbàmẹ po na tin, osin-agó lẹ na yọ́, ohù na fọ́n yiaga, gọna yozò sinsinyẹn.”—Linlin he The New York Times na to hosọ de mẹ to 15 juin 2022. (“Flooding Chaos in Yellowstone, a Sign of Crises to Come.”)

 Be nuhahun he gando aigba he to yinyin hinhẹngble go gán wá mọ pọngbọ ya? Eyin mọ wẹ, mẹnu wẹ na hẹn pọngbọ lọ wá? Pọ́n nue Biblu dọ taun.

 Biblu dọ dọ Jiwheyẹwhe na “husudo mẹhe to aigba husudo lẹ.” (Osọhia 11:18) Mí mọ onú atọ̀n delẹ plọn sọn wefọ ehe mẹ:

1.  1. Nuyiwa gbẹtọvi lẹ tọn na hẹnnugble taun to aigba go.

2.  2. Aigba hinhẹngble na wá doalọte.

3.  3. Jiwheyẹwhe wẹ na didẹ nuhahun he gando aigba go lẹ, e ma yin gbẹtọvi lẹ.

 Biblu dọ dọ ‘aigba na gbọṣi aimẹ kakadoi.’ (Yẹwhehodọtọ 1:4) Gbẹtọvi lẹ na nọ e ji kakadoi.

•   “Dodonọ lẹ wẹ na dugu aigba tọn, yé nasọ nọgbẹ̀ to e ji kakadoi.”—Salmu lẹ 37:29.

 Aigba na wá yin vivọjlado pete.

•   “Danfafa po aigba-klo po na jẹaglin, bọ dankló na jaya bo na gbàsẹ́ di vounvoun gbémẹ tọn.”—Isaia 35:1.