Mẹsusu wẹ to nuhà gando lehe gbẹtọvi lẹ to aigba po nuhe to e ji lẹ po hẹngble do go. Mẹhe nọ basi dodinnanu do ninọmẹ lẹdo tọn ji delẹ dohia dọ onú voovo he gbẹtọvi lẹ nọ detọ́n ko zọ́n bọ nutogbẹ̀ lẹ to bubusẹ bọ ninọmẹ planẹti lọ tọn to yinylan deji hugan gbede pọ́n.

 Be gbẹtọvi lẹ na hù aigba sudo wẹ ya? Kavi be e na wá jọ bọ yé na nọgbẹ̀ to aliho de mẹ bọ nuyiwa yetọn ma na hù aigba po nuhe to e ji lẹ po sudo ba wẹ ya?

 Weyọnẹntọ susu wẹ kudeji dọ gbẹtọvi lẹ gán basi hihọ́na aigba bo na nọgbẹ̀ to aliho de mẹ bọ nuyiwa yetọn lẹ ma na hù i sudo. Dodinnanu-basitọ delẹ yigbe dọ, eyin e na pà gbẹtọvi lẹ bọ yé na jla aigba lọ do, be diọdo susu wẹ dona yin bibasi to fisusu podọ to ojlẹ dopolọ mẹ. Diọdo mọnkọ lẹ bẹ dehe bọdego ehelẹ hẹn:

•   Gbẹtọ lẹ dona vọ́ ylọ aliho he mẹ yé nọ penukundo aigba, zungbo, ogbà po ohù po go te dọ nujọnu.

•   Yé dona yí aliho glelilẹ tọn devo lẹ zan bosọ diọ nue yé nọ zan do nọ mọ miyọ́n lẹtliki tọn kavi nue nọ na huhlọn mọnkọ devo lẹ.

•   Yé dona diọda nado nọ dù núdùdù he mẹ omá po jinukun po sù te hugan lẹ bo nọ dù olàn po whèvi po do jlẹkaji, enẹ na zọ́n bọ yè ma na nọ hẹn núdùdù susu gú.

•   Yé dona yọnẹn dọ e ma yin lehe yè bẹ adọkunnu lẹ pli sọ wẹ nọ zọ́n bọ yè nọ zan gbẹzan dagbe.

 Etẹ a lẹn? Be e sọgbe nado donukun dọ tohọluduta lẹ, azọ́nwhé dahodaho lẹ po gbẹtọ lẹ po na kọngbedopọ hugan gbede pọ́n nado hẹn diọdo enẹlẹ yọnbasi ya? Kavi be a lẹndọ ehe ma na yọnbasi na gbẹtọ lẹ yin nukunkẹnnọ, ṣejannabinọ bo masọ nọ lẹnnupọndo sọgodo ji wutu wẹ ya?—2 Timoti 3:1-5.

 Biblu hẹn mí deji dọ ogbẹ̀ lọ mẹ na wá yọ́n. E dọ nuhewutu kanvinván gbẹtọvi lẹ tọn nado jla aigba do ma gán pà yé, bosọ dọhodo diọdo titengbe he dona yin bibasi lẹ ji. Podọ e sọ dọ lehe diọdo enẹ na wá aimẹ do na mí.

 Nuhewutu kanvinván gbẹtọvi lẹ tọn kẹdẹ ma gán jla ogbẹ̀ lọ mẹ do. Jehovah a Jiwheyẹwhe dá aigba bo deazọ́nna gbẹtọvi lẹ nado penukundego. (Jenẹsisi 1:28; 2:15) Eyin yé na wazọ́n ehe ganji, yé dona nọ dín ayinamẹ sọn Mẹdatọ yetọn dè bosọ nọ setonuna nuhe e dọ lẹ. (Howhinwhẹn lẹ 20:24) Amọ́ kakati yé nido wàmọ, yé gbẹ́ Jehovah dai bo de nado nọ jlòkoko. (Yẹwhehodọtọ 7:29) Gbẹtọvi lẹ ma do nugopipe lọ nado jla aigba do Jiwheyẹwhe mẹ vò, podọ vọjlado depope he yé tlẹ bayi ma na pà yé kaka de.—Howhinwhẹn lẹ 21:30; Jelemia 10:23.

 Diọdo he dona yin bibayi. Ojlo Jiwheyẹwhe tọn wẹ nado hẹnalọdotena mẹhe to aigba husudo lẹ. (Osọhia 11:18) E ma na vọ́ nuhe jẹdò to gandudu lẹ po gbẹtọvi he to aigba hẹngble lẹ po go jlado; e na de yé sẹ̀ wẹ. (Osọhia 21:1) Enẹ wẹ zọ́n bọ Jehovah do dọmọ: “Pọ́n! Yẹn to nulẹpo hẹn zun yọyọ.”—Osọhia 21:5.

 Lehe diọdo enẹ na wá aimẹ do. Jehovah na yí gandudu olọn mẹ tọn etọn, yèdọ Ahọluduta Jiwheyẹwhe tọn do diọtẹnna gandudu gbẹtọvi tọn lẹ. Gandudu enẹ, he to anademẹ Jesu Klisti tọn glọ wẹ na dugán do aigba lọ blebu ji.—Daniẹli 2:44; Matiu 6:10.

 Ahọluduta Jiwheyẹwhe tọn na plọn gbẹtọvi lẹ nado nọ nọgbẹ̀ sọgbe hẹ nubiọtomẹsi dodo tọn Jiwheyẹwhe tọn lẹ. Eyin gbẹtọvi lẹ yọ́n nuhe Mẹdatọ yetọn jlo dọ yé ni nọ wà lẹ bosọ nọ setonuna nuhe e dọ lẹ, yé na penugo nado nọgbẹ̀ to aliho de mẹ bọ nuyiwa yetọn ma na hù aigba sudo. (Isaia 11:9) Biblu dohia dọ gbẹtọ lẹ na duvivi ogbẹ̀ dagbe de tọn to gandudu Jiwheyẹwhe tọn glọ bọ mẹde ma nasọ hẹnnugble to aigba go ba. E na wà nuhe bọdego ehelẹ:

•   E na hẹn núdùdù tin-to-aimẹ na mẹlẹpo.—Salmu lẹ 72:16.

•   E na jla nulẹ do bọ onú jọwamọ tọn lẹ na gọ̀ jẹ dehe yé te dai.—Isaia 35:1, 2, 6, 7.

•   E na hẹn ẹn diun dọ gbẹtọvi lẹ na nọ penukundo kanlin lẹ go, podọ kanlin lẹ ma na gbleawuna gbẹtọ lẹ ba.—Isaia 11:6-8; Hosea 2:18.

•   E na doalọtena nugbajẹmẹji jọwamọ tọn lẹ.—Malku 4:37-41.

 A gán donukun dọ Ahọluduta Jiwheyẹwhe tọn na hẹn diọdo ehelẹ wá to madẹnmẹ. Eyin a jlo na mọ nudọnamẹ susu dogọ, hia hosọ lọ “Whetẹnu Wẹ Ahọluduta lọ Na Dugán Do Aigba Ji?”