Sọgbe hẹ linlin he ONU na:

•    Bẹsọn 7 octobre jẹ 23 octobre 2023, awhàn he to núgbà to Gaza po Israël po ṣẹnṣẹn ko hù gbẹtọ 6 400 linlán bọ gbẹtọ 15 200 linlán wẹ sọ gbleawu, ehe suhugan yetọn lẹ yin omẹ paa lẹ. Humọ, omẹ fọtọ́n kanweko susu lẹ wẹ to dandannu glọ nado jo owhé yetọn lẹ do na awhàn lọ wutu.

•    To 24 septembre 2023, awhàn he to yìyì to Russie po Ukraine po ko dekọtọn do okú omẹ paa 9 701 tọn mẹ bọ omẹ 17 748 wẹ ko sọ gbleawu to Ukraine.

 Todido tẹwẹ Biblu na mẹhe to yaji na awhàn wutu lẹ?

 Biblu dọ dọdai dọ Jiwheyẹwhe na hẹn ‘awhàn wá opodo lẹdo aigba pé.’ (Salmu lẹ 46:9) E na yí gandudu kavi ahọluduta olọn mẹ tọn de zan nado diọtẹnna gandudu gbẹtọvi tọn lẹpo. (Daniẹli 2:44) Ahọluduta Jiwheyẹwhe tọn na hẹn kọgbọ wá na gbẹtọvi lẹ.

 Pọ́n nuhe Jesu Klisti, he yin Ahọlu to Ahọluduta Jiwheyẹwhe tọn mẹ na wà lẹ:

•    “Ewọ na nọ whlẹn wamọnọ he to awhádo na alọgọ, gọna agbátọnọ po mẹdepope he ma tindo alọgọtọ po. Ewọ na nọ wàlẹblanuna agbátọnọ po wamọnọ po, bo nasọ nọ whlẹn ogbẹ̀ wamọnọ lẹ tọn gán. E na nọ whlẹn yé sọn kọgbidinamẹ po danuwiwa po mẹ.”—Salmu lẹ 72:12-14.

 Jiwheyẹwhe na yí Ahọluduta etọn zan nado hẹn pọngbọ wá na nuhahun gọna yajiji he awhàn po danuwiwa po ko hẹnwa lẹ.

•    “Ewọ nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—Osọhia 21:4.

 To madẹnmẹ, Ahọluduta Jiwheyẹwhe tọn na dádo whẹho aigba ji tọn lẹ mẹ. Biblu ko dọ dọdai dọ to ojlẹ mítọn mẹ, mí na sè “awhàn zingidi po awhàn linlin lẹ po.” (Matiu 24:6) Nujijọ ehelẹ po devo lẹ po to didohia dọ mí to gbẹnọ to “azán godo tọn” gandudu gbẹtọvi tọn lẹ tọn mẹ.—2 Timoti 3:1.