To 19 mai 2022, Pipli He Nọ Penukundo Whẹho Hihọ́ Tọn lẹ Go Na Plidopọ Akọta lẹ Tọn mọ nudọnamẹ yí sọn ahọluzọnwatọ klogán-klogán 75 linlán dè, ehe dohia dọ “azọ́nylankan COVID-19 po ninọmẹ aimẹ tọn he nọ diọ lẹ po ko to núdùdù whèdomẹ hẹnwa lẹdo aihọn pé, podọ awhàn he to yìyì to Ukraine na zọ́n bọ huvẹ na tọ́n” to fisusu. To ojlẹ vude godo, linlinwe de sọ dọ dọ “awhàn lọ jlo na dọ̀n aihọn lọ biọ núdùdù whèdomẹ sinsinyẹn mẹ bo na yidogọna nuhahun he ko to ote dai lẹ.” (Linlinwe The Economist) Biblu dọ dọdai dọ núdùdù whèdomẹ na tin to ojlẹ mítọn mẹ, amọ́ e sọ dọ lehe mí gán doakọnna do ga.

•    Jesu dọ dọdai dọ: ‘Akọta na fọ́n do akọta ji podọ ahọluduta do ahọluduta ji, bọ núdùdù whèdomẹ na tin.’—Matiu 24:7.

•    Owe Biblu tọn he nọ yin Osọhia sọ dọhodo osọ́-kùntọ yẹhiadonu tọn ẹnẹ delẹ ji. Dopo to osọ́-kùntọ enẹlẹ mẹ nọtena awhàn. Osọ́-kùntọ he bọdego nọtena núdùdù whèdomẹ, ehe na jọ to whenue núdùdù na hán bo na vẹahi taun. ‘Yẹn sọ mọ osọ́ yuu de, bọ mẹhe sinai to e ji tindo nujlẹgàn ovi awenọ de to alọ etọn mẹ. Yẹn sọ sè nuhe taidi ogbè de dọmọ: “Nujlẹnu likun tọn dopo na denali dopo, podọ nujlẹnu balekun tọn atọ̀n na denali dopo.”’—Osọhia 6:5, 6.

 Núdùdù whèdomẹ he go dọdai Biblu tọn enẹlẹ donù to hẹndi mọ to alọnu, to ojlẹ he Biblu ylọdọ “azán godo tọn lẹ” mẹ. (2 Timoti 3:1) Eyin a jlo na plọnnu dogọ gando “azán godo tọn lẹ” po osọ́-kùntọ ẹnẹ he owe Osọhia tọn dọhodeji lẹ po go, pọ́n video lọ Ninọmẹ Aihọn Tọn Diọ sọn 1914, podọ a gán sọ hia hosọ lọ Osọ́-Kùntọ Ẹnẹ lọ lẹ—Mẹnu Wẹ Yé Yin?

•    Biblu bẹ ayinamẹ dagbe lẹ hẹn, he gán gọalọna mí nado pehẹ ninọmẹ sinsinyẹn lẹ, kakajẹ ahivivẹ núdùdù tọn kavi núdùdù whèdomẹ lọsu ji. Pọ́n ayinamẹ delẹ to hosọ lọ “Lehe A Gán Dowéna Akuẹ Do” mẹ.

•    Biblu sọ na mí todido dọ nulẹ na wá pọnte. E dopagbe ojlẹ de tọn to whenue “jinukun susugege na tin to aigba ji” bọ núdùdù susu na tin na mẹlẹpo. (Salmu lẹ 72:16) Eyin a jlo na plọnnu dogọ gando opagbe Biblu tọn na sọgodo go po nuhewutu a gán dejidego po, hia hosọ lọ “Une espérance réelle pour des jours meilleurs.”