Lẹdo aihọn pé, akọta susu wẹ klan na tonudidọ wutu. Sọgbe hẹ dodinnanu he pipli de (Pew Research Center) bayi to 2022, “to otò 19 mẹ, 65 to kanweko ji mẹhe ko whẹ́n mẹho lẹ tọn wẹ yigbe dọ to otò emitọn mẹ gbemanọpọ sinsinyẹn tin to mẹhe nọ nọgodona tonudọgbẹ́ voovo lẹ ṣẹnṣẹn.”

 Be a ko doayi e go dọ whẹho tonudidọ tọn lẹ fọ́n bo to kinklan hẹnwa to lẹdo towe mẹ ya? Naegbọn e do yinmọ? Be pọngbọ de tin ya? Pọ́n nuhe Biblu dọ.

 Biblu dọ dọdai dọ to ojlẹ mítọn mẹ, enẹ wẹ “to azán godo tọn lẹ mẹ,” jijọ mẹsusu tọn na zọ́n bọ e na vẹawu dọ pọninọ ni tin.

•    “To azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin. Na gbẹtọ lẹ na yin wanyina mẹdetiti tọ́, . . . gbigbọ gbekọndopọ tọn matindotọ.”—2 Timoti 3:1-3.

 Dile etlẹ yindọ mẹsusu nọ wazọ́n sinsinyẹn na gandudu lẹ nido do kọdetọn dagbe, e ma nọ pà yé. Gbẹtọ lẹ nọ mọdọ e vẹawu kavi ma tlẹ yọnbasi nado wazọ́n dopọ do didẹ nuhahun lẹ, na linlẹn yetọn lẹ nọ gbọnvona yenọzo tọn wutu. Kọdetọn he enẹ nọ hẹnwa lẹ dohia dọ nuhe Biblu ko dọ sọn whenu dindẹn die yin nugbo.

•    “Gbẹtọ ko dugán do gbẹtọ ji na awugble etọn.”—Yẹwhehodọtọ 8:9.

 Amọ́, Biblu dọ nuhe na didẹ nuhahun lọ. E dopà gandudu de tọn, ehe gandutọ etọn do nugopipe lọ nado de yajiji gbẹtọvi lẹ tọn sẹ̀ pete.

 Biblu dohia dọ nukọntọ dopo akàn he pegan nado didẹ nuhahun gbẹtọvi lẹ tọn wẹ Jesu Klisti. Jesu tindo huhlọn, aṣẹpipa gọna ojlo lọ nado hẹn pọninọ po jijọho po gọwá na gbẹtọvi lẹpo.

•    “To azán etọn lẹ gbè, dodonọ na vùn, bọ jijọho na sudeji.”—Salmu 72:7.

•    “Akọta lẹpo na nọ sẹ̀n ẹn.”—Salmu 72:11.

 Jesu wẹ nukọntọ he jẹ lọ, na e nọ hò mẹlẹ tọn pọ́n bo nọ jlo na gọalọna yé, titengbe mẹhe yin nuyiwa hẹ to aliho agọ̀ mẹ lẹ.

•    “Ewọ na nọ whlẹn wamọnọ he to awhádo na alọgọ, gọna agbátọnọ po mẹdepope he ma tindo alọgọtọ po. Ewọ na nọ wàlẹblanuna agbátọnọ po wamọnọ po, bo nasọ nọ whlẹn ogbẹ̀ wamọnọ lẹ tọn gán. E na nọ whlẹn yé sọn kọgbidinamẹ po danuwiwa po mẹ.”—Salmu 72:12-14.

 Plọn nususu dogọ gando Ahọluduta Jiwheyẹwhe tọn go, yèdọ gandudu olọn mẹ tọn he Jesu yin nukọntọ na lọ. Gbadopọnna ale he gandudu etọn sọgan hẹnwa na we lẹ gọna lehe a gán nọgodona ẹn do.

•    Pọ́n video lọ Etẹwẹ Ahọluduta Jiwheyẹwhe Tọn Yin?

•    Hia hosọ lọ “Ahọluduta Jiwheyẹwhe Tọn—Gandudu de He Ma Nọ Hò Ahizi.”