Hogbe wangbẹnamẹ tọn lẹ, danuwiwa, nuvẹun po akọ̀-ṣinṣinyan po tọn lẹ ji wẹ linlin lẹ nọ dọhodo hugan.

•    “Awhàn he to yìyì to Israël po Gaza po ṣẹnṣẹn gọna nuyiwadomẹji mẹhe nọ nọgodona danuwiwa po wangbẹnamẹ po lẹ tọn ko zọ́n bọ hogbe wangbẹnamẹ tọn lẹ ko jideji taun to nọtẹn gbẹdido intẹnẹt ji tọn lẹ ji.”—The New York Times, 15 novembre, 2023.

•    “Sọn 7 octobre, wangbẹnamẹ, hogbe whánsọmẹ tọn lẹ po danuwiwa na nuvẹun wutu po ko jideji taun lẹdo aihọn pé”—Wẹ Dennis Francis he yin ogán Assemblée Générale des Nations Unies tọn dọ, to 3 novembre 2023.

 Hogbe wangbẹnamẹ tọn lẹ, danuwiwa po awhàn po ma yin nuyọyọ de. Nado dọ hójọhó, Biblu basi zẹẹmẹ mẹdelẹ tọn to hohowhenu he “nọ [wleawuna] hogbe whánsọmẹ tọn yetọn lẹ taidi ogába lẹ” podọ yé sọ nọ funawhàn bo nọ doalọ to danuwiwa mẹ. (Salmu lẹ 64:3; 120:7; 140:1) Etomọṣo, Biblu basi zẹẹmẹ dọ wangbẹnamẹ he mọ mí te to egbehe lẹ tindo zẹẹmẹ vonọtaun de.

 Biblu na whẹwhinwhẹ́n awe delẹ he wutu wangbẹna do gbayipe to egbehe.

1.  1. E dọ dọdai dọ ojlẹ de na wá bọ “owanyi suhugan gbẹtọ lẹ tọn na miọn.” (Matiu 24:12) Kakati gbẹtọ lẹ nido nọ do owanyi hia, walọ he na zọ́n bọ wangbẹnamẹ na jideji lẹ wẹ yé na nọ dohia.—2 Timoti 3:1-5.

2.  2. Wangbẹnamẹ sinsinyẹn he to aihọn lọ mẹ to egbehe do nuyiwadomẹji ylankan Satani Lẹgba tọn hia. Biblu dọ dọ “aihọn lọ pete tin to huhlọn mẹylankan lọ tọn glọ.”—1 Johanu 5:19; Osọhia 12:9, 12.

 Etomọṣo, Biblu sọ dohia dọ to madẹnmẹ Jiwheyẹwhe na de nuhe nọ hẹn wangbẹnamẹ wá lẹpo sẹ̀. Humọ, e na sọ vọ́ nuhe wangbẹna ko hẹngble lẹpo jlado. Biblu dopagbe dọ:

•    Jiwheyẹwhe “nasọ súnsún dasin lẹpo sẹ̀ sọn nukun yetọn mẹ, okú ma nasọ tin ba, mọjanwẹ aluẹmẹninọ kavi avi kavi awufiẹsa ma nasọ tin ba. Onú hoho lẹ ko juwayi.”—Osọhia 21:4.