Be a yin dopo to gbẹtọ livi susu he ninọmẹ aimẹ tọn he ylan lẹ ko hẹnnugble na lẹ mẹ ya? E ma yin aliho dopolọ mẹ wẹ ninọmẹ aimẹ tọn he ylan lẹ nọ hẹnnugble te. Yujẹhọn po jẹhọn-ahizi po nọ zọ́n bọ ohù nọ fọnadán bo nọ hẹnnugble, ehe nọ zọ́n bọ otọ̀ nọ gbà filẹ. Jikun sinsinyẹn gán zọ́n bọ aigba na sisọ, podọ yujẹhọn gán zọ́n bọ abì na gbòdlán bọ zungbo lẹ na yí miyọ́n. Akúdido, yozò sinsinyẹn po ninọmẹ aimẹ tọn he nọ ylan to fie osin-agó nọ ja te lẹ po gán sọ hẹnnugble taun.

 To awà susu ji to ogbẹ̀ lọ mẹ, ninọmẹ aimẹ tọn he nọ hẹnnugble taun lẹ nọ wá whẹwhẹ bosọ nọ hẹnnugble hugan dai tọn. Pipli de he nọ wazọ́n lẹdo aihọn pé bo nọ penukundomẹgo eyin onú ajiji de jọ dọ dọ: “Mẹhe adán nọ gbò eyin ninọmẹ aimẹ tọn he ylan lẹ hẹnnugble fọ́n bo to susudeji hugan dai tọn, na otọ̀ gbàmẹ, yujẹhọn po akúdido po nọ saba wá aimẹ whẹwhẹ wutu. Ehelẹ zọ́n bọ to whẹmẹwhemẹ mẹsusu nọ kú, mẹdevo lẹ ma nọ mọ nuhe sin hudo yé do, podọ gbẹtọ livi susu lẹ masọ nọ do adọtẹn ba.”

 Eyin onú ehelẹ jọ, gbẹtọ lẹ nọ jiya to agbasa mẹ podọ to numọtolanmẹ-liho. E ma nọ fá do yé paali, na yé masọ nọ do nude ba, yé masọ nọ do adọtẹn kavi na mẹvivẹ yetọn de kú wutu.

 Eyin ninọmẹ aimẹ tọn he ylan taun lẹ ko hẹnnugble na we, yọnẹn dọ Biblu gán gọalọna we nado pehẹ ẹ. Nuhe to e mẹ lẹ nọ miọnhomẹnamẹ, e nọ namẹ todido po ayinamẹ he nọ gọalọnamẹ lẹ po, podọ onú ehelẹ ko gọalọna gbẹtọ madosọha he ninọmẹ aimẹ tọn he ylan taun ko hẹnnugble na lẹ. (Lomunu lẹ 15:4) Biblu sọ na gblọndo na kanbiọ titengbe de he mẹsusu nọ kanse yede: Naegbọn Mawu do dike bọ onú ehe jọ—kavi yasana mi wẹ e ka te ya?

 Biblu plọn mí dọ, e ma yin Jiwheyẹwhe wẹ zọ́n bọ gbẹtọ lẹ do to yaji. E na mí jide dọ “Jiwheyẹwhe ma sọgan yin whiwhlepọn po nuylankan lẹ po, mọjanwẹ ewọ lọsu ma nọ whlé mẹdepope pọ́n to aliho enẹ mẹ.” (Jakọbu 1:13) Ehe dohia dọ e ma yin Jiwheyẹwhe wẹ to godona ninọmẹ aimẹ tọn he nọ hẹnnugble to egbé lẹ.

 Nugbo wẹ dọ Biblu donù ninọmẹ delẹ go he mẹ Jiwheyẹwhe yí ninọmẹ aimẹ tọn lẹ zan nado sayana mẹylankan lẹ te. Amọ́, ninọmẹ enẹlẹ gbọnvona ninọmẹ aimẹ tọn he nọ hẹnnugble to egbehe lẹ, na yè mọ nọ sèava whẹpo yé do nọ jọ, podọ mẹdagbe po mẹylankan lẹ po wẹ yé nọ hẹnnugble na. Ṣigba, Biblu dohia dọ Jiwheyẹwhe nọ bayi hihọ́na homẹvọnọ lẹ janwẹ, podọ e nọ na avase jẹnukọn bosọ nọ dọ nuhewutu e jlo na wà nude. Di apajlẹ, whẹpo Jiwheyẹwhe do hẹn Singigọ wá to ojlẹ Noa tọn mẹ, e dọ nuhewutu e jlo na wàmọ bo ka sọ na avase jẹnukọn, podọ e bayi hihọ́na Noa po whẹndo etọn po.—Jenẹsisi 6:13; 2 Pita 2:5.

 Eyin a jlo na yọ́n nususu dogọ gando lehe mí wagbọn do yọnẹn dọ e ma yin Jiwheyẹwhe wẹ to godona ninọmẹ aimẹ tọn he nọ hẹnnugble taun to egbehe lẹ go, pọ́n hosọ lọ “Etẹwẹ Biblu Dọ Gando Nugbajẹmẹji Jọwamọ Tọn lẹ Go?”

 Biblu dohia dọ Jehovah a Jiwheyẹwhe nọ hò metọn pọ́n podọ e nọ vẹawumẹ. Pọ́n wefọ he to odò bo gán miọnhomẹnamẹ ehelẹ.

•   Isaia 63:9: “To ayimajai yetọn lẹpo whenu, e nọ hẹn ayimajai wá na [Jiwheyẹwhe].”

   Zẹẹmẹ: E nọ vẹna Jehovah taun eyin e mọdọ gbẹtọ lẹ to yaji.

•   1 Pita 5:7: ‘E to towe hòpọn.’

   Zẹẹmẹ: Dagbemẹninọ towe nọ duahunmẹna Jehovah.

 Na Jehovah nọ hò mẹtọn pọ́n bosọ nọ veawumẹ wutu, e nọ jlo nado gọalọ. Biblu bẹ ayinamẹ dagbe etọn he gán miọnhomẹnamẹ lẹ hẹn bosọ namẹ jide dọ to sọgodo ninọmẹ aimẹ tọn he nọ hẹnnugble lẹ ma nasọ tin ba.—2 Kọlintinu lẹ 1:3, 4.

 Biblu dohia dọ opagbe Jehovah tọn wẹ yindọ “[a na] tindo sọgodo dagbe de po todido de po.” (Jelemia 29:11) E jlo dọ gbẹtọ lẹ ni duvivi ogbẹ̀ tọn to paladisi mẹ to aigba ji, e ma yindọ yé ni nọ to budi dọ otọ̀ gán gbà yé kavi dọ owhé yetọn ni jimiyọ́n kavi onú ylankan mọnkọ lẹ ni jọ do yé go.—Jenẹsisi 1:28; 2:15; Isaia 32:18.

 Jiwheyẹwhe na yí Ahọluduta etọn he to olọn mẹ bọ Jesu yin ahọlu etọn zan nado hẹn sọgodo dagbedagbe enẹ wá. (Matiu 6:10) Jesu do nuyọnẹn po huhlọn po nado doalọtena ninọmẹ aimẹ tọn he nọ diọ to ajiji mẹ bo nọ hẹnnugble lẹ. Whenue Jesu to aigba ji, e dohia dọ emi dohuhlọn do ninọmẹ aimẹ tọn he nọ hẹnnugble lẹ ji. (Malku 4:37-41) E na yí nuyọnẹn do dugán bo nasọ dohia dọ emi nọ mọnukunnujẹnumẹ, podọ e na plọn gbẹtọ lẹ nado nọ jla lẹdo yetọn lẹ mẹ do, na lẹdo lẹ mẹ nikaa gble. (Isaia 11:2) To gandudu Jesu tọn glọ, ninọmẹ aimẹ tọn he ylan lẹ ma nasọ hẹnnugble na mẹde gbede ba.

 A gán nọ kanse dewe dọ, ‘Whetẹnu wẹ Jesu na zan huhlọn etọn do doalọtena ninọmẹ aimẹ tọn he nọ hẹnnugble lẹ?’ Eyin a jlo na mọ gblọndo na kanbiọ enẹ, pọ́n hosọ lọ “Whetẹnu Wẹ Ahọluduta lọ Na Dugán Do Aigba Ji”

 Ayinamẹ Biblu tọn lẹ gán gọalọna we whẹpo ninọmẹ aimẹ tọn de nido hẹnnugble, whenue e to nuhẹngble, podọ whenue e ko hẹnnugble godo.

•   Whẹpo nido jọ: Wleawu nado yawu yinuwa.

   Nuhe Biblu dọ: “Zinzintọ nọ mọ owù hlan bo nọ whlá ede, ṣigba, wunvinọ nọ dlí biọ e mẹ bo nọ jiya kọdetọn etọn lẹ tọn.”—Howhinwhẹn lẹ 22:3.

   Zẹẹmẹ: Yọ́n nujijọ ylankan he gán jọ to lẹdo towe mẹ lẹ, na a nido yawu yinuwa bo bayi hihọ́na whẹndo towe.

   Numimọ: “Mí ko wleawu dote, enẹ wẹ zọ́n bọ mí do yawu họ̀n to gbeegbe zungbo jimiyọ́n. Saki he mí na ze do họ̀n lẹ lọsu ko to alọji. Amasin mítọn lẹ lọsu to alọji. Mí ko sọ tò avọ̀ mítọn lẹ do e mẹ. Mẹhe lẹdo mí lẹ to budi bo ma yọ́n nuhe yé na wà. Amọ́ na míwlẹ, nuhe sin hudo mí do lẹpo wẹ to alọji na mí, podọ enẹ vivi na mi taun.”—Tamara, he wá sọn Californie, États-Unis.

•   Whenue e to jijọ: Ze ayiha do nuhe yin nujọnu hugan lẹ ji.

   Nuhe Biblu dọ: “Eyin mẹde tlẹ tindo susugege, nutindo etọn lẹ ma nọ na ẹn ogbẹ̀.”—Luku 12:15.

   Zẹẹmẹ: Ogbẹ̀ họakuẹ hugan nuhe mí do lẹ.

   Numimọ: “Whẹnue Jẹhọn-ahizi he nọ yin Lawin b hẹn owhé mítọn gble, n’ma tlẹ yọ́n nue n’na wà taun. Amọ́, n’hodẹ̀ hlan Jehovah Jiwheyẹwhe. N’mọdọ nue mí do lẹ wẹ yì do mí poun, amọ́ mí gbẹ́ gán.”—Leslie he wá sọn, Philippines.

•   Whenue e ko jọ godo: Nọ dọ azán dopodopo tọn.

   Nuhe Biblu dọ: “Mì yin magbọjẹnọ na osọ he ja gbede blo, na osọ he ja na tindo magbọjẹ etọn titi lẹ.”—Matiu 6:34.

   Zẹẹmẹ: Ma nọ hanú gbau na nue gán jọ to nukọn mẹ lẹ blo

   Numimọ: “Nudide susu wẹ n’dona bayi to whenue Jẹhọn-ahizi Irma zọ́n bọ osin gbà ohọ̀ ṣie, podọ n’hanú taun. N’tẹnpọn nado hodo ayinamẹ Biblu tọn bo nọ dọ azán dopodopo tọn. N’wá mọdọ Jehovah gán gọalọna mi nado doakọnna ninọmẹ ṣie hugan nue n’lẹn.”—Sally, he wá sọn Florida, États-Unis.

 Eyin a jlo na mọ ayinamẹ dagbe susu dogọ, pọ́n hosọ lọ “Catastrophes: des mesures qui sauvent des vies.”