Etẹ Biblu Dọ Gando Núdùdù Whèdomẹ Azán Mítọn Gbè Tọn lẹ Go?

MÌ HÒ (video kavi hoyidokanji lọ)

“Huvẹ ma na tin ba.” Hogbe ehelẹ do yanwle gandutọ aihọn ehe tọn lẹ hia gando dopo to nuhahun titengbe he gbẹtọ lẹ to pipehẹ lẹ mẹ go, enẹ wẹ nado na núdùdù mẹlẹpo to aihọn lọ mẹ. a Amọ́ be aihọn lọ na wá vò sọn huvẹ si to gbèdopo ya? Etẹ Biblu dọ?

Biblu ko dọ dọdai núdùdù whèdomẹ he to núgbà to egbehe lẹ tọn

Biblu dọ dọdai dọ núdùdù whèdomẹ na wá aimẹ to azán mítọn gbè, yèdọ azán de he e ylọ dọ “azán godo tọn lẹ.” (2 Timoti 3:1) E ma yin Jiwheyẹwhe wẹ zọ́n bọ núdùdù whèdomẹ mọnkọ lẹ do tin gba, amọ́ e ko na mí avase gando yé go. (Jakọbu 1:13) Doayi dọdai Biblu tọn awe ehelẹ go.

‘Núdùdù whèdomẹ na tin sọn fide jẹ fide.’ (Matiu 24:7) Dọdai Biblu tọn ehe dohia dọ huvẹ na gbayipe taun. E jẹna ayidego dọ pipli azọ́nwhé he nọ penukundo awuwiwlena núdùdù po mimá etọn po go lẹ na linlin dọmọ: “Vivẹnu he aihọn lọ to dido nado doalọtena huvẹ, wleawuna núdùdù he pemẹnu gọna núdùdù hunsindagbe tọn lẹ ma to pipà ẹ.” b Gbẹtọ livi susu lẹ to otò madosọha lẹ mẹ ma to núdùdù he yé do hudo etọn lẹ mọ. Taidi kọdetọn de, e blawu dọ susu yetọn lẹ wẹ nọ kú.

“Pọ́n! osọ́ yuu de, bọ mẹhe sinai to e ji tindo nujlẹgàn ovi awenọ de to alọ etọn mẹ.” (Osọhia 6:5) To dọdai ehe mẹ, osọ́ yẹhiadonu tọn lọ po kùnkùntọ etọn po nọtena huvẹ to azán godo tọn lẹ mẹ. c Nujlẹgàn he to alọ osọ́-kùntọ lọ tọn mẹ nọ yin yiyizan nado jlẹ núdùdù na mẹlẹpo nido mọ pẹẹde-pẹẹde. Dile osọ́-kùntọ ehe to yìyì, ogbè de to lilá dọ núdùdù lẹ na vẹahi taun bosọ na avase mẹlẹ ma nado dike núdùdù dandan tọn lẹ ni yin hinhẹngú. (Osọhia 6:6) Ehe do ninọmẹ núdùdù whèdomẹ tọn he tin to egbehe lọ hia to aliho he sọgbe mẹ, na gbẹtọ liva susu lẹ ma gán mọ kavi họ̀ núdùdù hunsindagbe tọn wutu.

Lehe núdùdù whèdomẹ na wá doalọte do

Dodinnanutọ lẹ dohia dọ aigba lọ nọ wleawuna núdùdù he hugan dehe pé nado na núdùdù gbẹtọ he to e ji lẹpo. Eyin mọ wẹ, naegbọn núdùdù whèdomẹ do tin? Podọ etẹ Biblu dọ dọ Mẹdatọ mítọn Jehovah d na wà nado didẹ nuhahun ehelẹ?

Nuhahun: Gandudu lẹ ma gán de ohẹ́n po zẹ́nmasọ to akuẹzinzan-liho he zọ́n bọ gbẹtọ lẹ nọ gbọṣi huvẹ lẹ sẹ̀ gba.

Pọngbọ: Gandudu pipé de, enẹ Ahọluduta Jiwheyẹwhe tọn na wá diọtẹnna gandudu gbẹtọvi mapenọ lẹ tọn. (Daniẹli 2:44; Matiu 6:10) To egbehe, hẹntọnọ susu wẹ e nọ vẹawuna nado họ̀ núdùdù, amọ́ to Ahọluduta Jiwheyẹwhe tọn glọ, e ma na yinmọ. Biblu dọ gando Jesu Klisti he yin Ahọlu Ahọluduta Jiwheyẹwhe tọn go dọmọ: “Ewọ na nọ whlẹn wamọnọ he to awhádo na alọgọ, gọna agbátọnọ po mẹdepope he ma tindo alọgọtọ po. . . . Jinukun susugege na tin to aigba ji; e na gọfla to osó lẹ ji aga.”—Salmu lẹ 72:12, 16.

Nuhahun: Awhàn lẹ nọ hẹn gbakija wá gọna nuhahun akuẹzinzan tọn, ehe nọ glọnalina núdùdù mimá kavi nọ doalọtena ẹn pete.

Pọngbọ: “[Jehovah] to awhàn hẹnwa opodo lẹdo aigba pé. E wẹ́n ogá bo sán owhán do flinflin; e yí miyọ́n do mẹ̀ awhàn-kẹkẹ lẹ.” (Salmu lẹ 46:9) Jiwheyẹwhe na và awhànfunnu po mẹhe nọ hẹn awhàn wá lẹ po. Taidi kọdetọn de, mẹlẹpo na penugo nado mọ núdùdù to hihọ́ mẹ podọ to gbesisọ mẹ. Biblu dopà dọ: “Dodonọ na vùn, bọ jijọho na sudeji.”—Salmu lẹ 72:7.

Nuhahun: Ninọmẹ aimẹ tọn he sinyẹn taun lẹ gọna nugbajẹmẹji jọwamọ tọn lẹ nọ hẹn jinukun lẹ gble bosọ nọ hù kanlinpa lẹ.

Pọngbọ: Jiwheyẹwhe na deanana huhlọn jọwamọ tọn aigba tọn lẹ, bo wleawuna ninọmẹ he na zọ́n bọ e na bọawu nado pọ̀ jinukun lẹ. Biblu dọmọ: “[Jehovah] nọ whiwhẹ yujẹhọn lọ; agbówhẹn ohù tọn lẹ nọ nabọẹ whii. . . . E nọ diọ danfafa zun osindò he gọ́ na ofán lẹ, podọ aigba-kló zun asisa osin tọn lẹ. E nọ hẹn mẹhe huvẹ to hùhù lẹ nado nọ nọ̀ finẹ . . . Yé nọ do jinukun po vẹngle lẹ po he nọ de sinsẹ́n dagbedagbe lẹ tọ́n.”—Salmu lẹ 107:29, 35-37.

Nuhahun: Nukunkẹnnọ po mẹhodutọ lẹ po nọ wleawuna núdùdù he ma yọ́n lẹ kavi nọ glọnalina núdùdù nado jẹ mẹhe do hudo etọn lẹ dè.

Pọngbọ: Ahọluduta Jiwheyẹwhe tọn na de gbẹtọ nugbomadọtọ po mẹhodutọ lẹ po sẹ̀ sọn aigba lọ ji. (Salmu lẹ 37:10, 11; Isaia 61:8) Biblu dọ gando Jehovah go dọ e yin “Mẹlọ he nọ dawhẹ dodo na mẹhe yè tafu lẹ, Mẹlọ he nọ na núdùdù mẹhe huvẹ to hùhù lẹ.”—Salmu lẹ 146:7.

Nuhahun: Mado-atọ̀n núdùdù he nọ yin awuwlena to aihọn lọ mẹ lẹ tọn wẹ nọ yin hinhẹngú kavi nọ bu to whemẹwhemẹ.

Pọngbọ: To Ahọluduta Jiwheyẹwhe tọn glọ, núdùdù he tin lẹ na yin nukunpedego ganji. Whenue Jesu to aigba ji, e hẹn ẹn diun dọ núdùdù depope ma yin hinhẹngú. Di apajlẹ, to gbèdopo, e na núdùdù gbẹtọgun he bẹ gbẹtọ 5 000 linlán hẹn de to azọ́njiawu-liho. To godo mẹ, e na anademẹ devi etọn lẹ dọmọ: “Mì bẹ dupò he pò lọ lẹ pli, na nudepope ni ma yin hinhẹngú blo.”—Johanu 6:5-13.

Na Ahọluduta Jiwheyẹwhe tọn na de nuhe nọ hẹn huvẹ wá lẹpo sẹ̀ wutu, gbẹtọvi lẹpo na duvivi núdùdù dagbe podọ hunsindagbe tọn lẹ tọn susugege. (Isaia 25:6) Nado yọ́n whenue Ahọluduta Jiwheyẹwhe tọn na wà ehe te, pọ́n hosọ lọ “Whetẹnu Wẹ Ahọluduta lọ Na Dugán Do Aigba Ji?”

a Tito Nukọnyiyi He Na Dẹn-to-Aimẹ Tọn Na 2030 he Otò he to Plidopọ Akọta lẹ tọn mẹ lẹ doalọ e mẹ to 2015.

b Linlin pọmẹ tọn de he titobasinanu he bọdego ehelẹ wleawuna, enẹ wẹ Ogbẹ́ Plidopọ Akọta lẹ Tọn He Nọ Penukundo Núdùdù po Glezọ́n po go, Fonds international de développement agricole, Ogbẹ́ Plidopọ Akọta lẹ Tọn He Nọ Penukundo Akuẹzinzan Do Ovi Lẹ Go (UNICEF), Programme alimentaire mondial, po Ogbẹ́ Plidopọ Akọta lẹ Tọn He Nọ Penukundo Agbasalilo Go po.

c Nado plọnnu dogọ gando osọ́-kùntọ ẹnẹ he owe Osọhia tọn donù e go lẹ go, pọ́n hosọ lọ “Osọ́-Kùntọ Ẹnẹ lọ lẹ—Mẹnu Wẹ Yé Yin?”

d Jehovah wẹ oyín Jiwheyẹwhe tọn. (Salmu lẹ 83:18) Pọ́n hosọ lọ “Mẹnu Wẹ Yin Jehovah?”