Dile awhàn he to yìyì to Ukraine dohia do, susu nukọntọ sinsẹ̀n he nọ ylọ yede dọ Klistiani lẹ tọn wẹ to tulina mẹlẹ nado nọgodona awhàn. Pọ́n lehe sinsẹ̀ngán lẹ nọgodona awhàn lọ to awà awe lẹpo ji do:

•   “Mí pà mì bosọ dọnudo mì taun, mì awhànfuntọ mítọn lẹpo he to avùnho do ota Ukraine tọn mẹ nado whlẹn mí sọn mẹhe to ogbé mítọn yàn lẹ si . . . Mì to ahun mítọn mẹ, mí sọ to dẹ̀ho do ota mìtọn mẹ vẹkuvẹku bosọ to godona mì to whelẹponu.”—Nuhe Épiphane I Kiev tọn dọ niyẹn, dile linlin The Jerusalem Post tọn to 16 mars 2022 dohia do.

•   “Sinsẹ̀ngán Ṣọṣi Orthodoxe Russie tọn bayi sinsẹ̀n vonọtaun de do ota awhànfuntọ Russie tọn lẹpo tọn mẹ to Sẹgbe bo na yé tuli nado yiavùnlọna otò yetọn ‘to whenuena e yindọ tòvi Russie tọn lẹ kẹdẹ wẹ gán wamọ’ dile Moscou na zindonukọn to awhàn he fùn e te to Ukraine mẹ.”—Linlin Reuters tọn to 3 avril 2022.

 Be e jẹ dọ Klistiani lẹ ni nọ doalọ to awhàn mẹ wẹ ya? Etẹ Biblu dọ gandego?

 Biblu dohia dọ mẹhe nọ setonuna Jesu Klisti nugbonugbo lẹ ma nọ doalọ to awhàn mẹ.

•   “Gọ̀ ohí towe do otẹn etọn mẹ, na mẹhe ze ohí do mẹdevo ji lẹpo wẹ na dọ̀n gbọn ohí dali.”—Matiu 26:52.

   Be mẹhe nọ yí alọ na awhàn kavi nọ fùnawhàn to tonusena nuhe Jesu dọ lẹ nugbonugbo ya?

•   “Gbedide yọyọ de wẹ yẹn to nina mì dọ, mì ni yiwanna ode awetọ; kẹdẹdile yẹn ko yiwanna mì do, dọ mìlọsu ni yiwanna ode awetọ. Gbọn ehe dali wẹ mẹlẹpo na yọnẹn dọ devi ṣie lẹ wẹ mì yin—eyin mì tindo owanyi to mìde ṣẹnṣẹn.”—Johanu 13:34, 35.

   Be mẹhe nọ nọgodona awhàn gán dọ dọ emi to owanyi he nkọ Jesu dọ dọ yè na do yọ́n devi kavi hodotọ emitọn lẹ dohia ya?

 Eyin a jlo na plọnnu dogọ, hia hosọ lọ “Peut-on concilier guerre et christianisme?”

 Be e yọnbasi dọ Klistiani lẹ ni gọ̀n awhàn ma fùn to egbehe ya? Gbau. Biblu ko dọ jẹnukọn dọ to ojlẹ mítọn mẹ, enẹ wẹ “azán godo tọn lẹ” mẹ, gbẹtọ lẹ sọn akọta lẹpo mẹ ma nasọ “plọn awhànfunfun ba,” ehe ka sọgbe hẹ nuhe Jesu plọnmẹ lẹ.—Isaia 2:2, 4, nudọnamẹ odò tọn.

•   Eyin a jlo na yọ́n nudevo lẹ dogọ, hia hosọ Atọ̀họ̀-Nuhihọ́ lọ Tọn “La guerre : qu’en pense Dieu?” Hosọ debọdo-dego de wẹ.

 To madẹnmẹ, Jehovah, a yèdọ “Jiwheyẹwhe jijọho tọn,” na yí gandudu etọn he to olọn mẹ zan nado whlẹn gbẹtọ lẹ “sọn kọgbidinamẹ po danuwiwa po” si.—Filipinu lẹ 4:9; Salmu lẹ 72:14.

•   Eyin a jlo na yọ́n lehe enẹ na yì do, pọ́n video lọ Etẹwẹ Ahọluduta Jiwheyẹwhe Tọn Yin?