Lẹdo aihọn pé, mẹsusu wẹ nọ jlo na dù omá po atin-sinsẹ́n lẹ po kẹdẹ.

•   “Na mẹdelẹ, omá po atin-sinsẹ́n lẹ po kẹdẹ dùdù yin aliho nulẹnpọn podọ gbẹninọ tọn de he nọ zọ́n bọ yé nọ wà nuhe go yé pé lẹpo nado dapana danuwiwa do kanlin lẹ go, kanlin lẹ dùdù, ayú yetọn yiyizan taidi avọ̀ kavi nudevo depope.”—The Vegan Society.

 Gbọnvona ojlo he yé nọ tindo to kanlin lẹ mẹ, mẹdelẹ nọ kẹalọyi aliho gbẹninọ tọn enẹ, na yé jlo na hẹn ninọmẹ aimẹ tọn po agbasalilo yetọn po pọnte kavi na whẹho sinsẹ̀n tọn lẹ wutu.

•   “Omá po atin-sinsẹ́n lẹ po kẹdẹ dùdù ma yin whẹho agbasalilo tọn poun, na mẹdelẹ nọ pọ́n ẹn hlan di whẹho nuyise tọn, nudide mẹdetiti tọn, kavi aliho de na mẹdopodopo nido hẹn ninọmẹ nulẹ tọn pọnte to ogbẹ̀ lọ mẹ.”—Britannica Academic.

 Be omá po atin-sinsẹ́n lẹ po kẹdẹ dùdù wẹ na hẹn sọgodo planẹti mítọn tọn pọnte ya? Etẹ Biblu dọ?

 Biblu dohia dọ Mẹdatọ mítọn Jehovah Jiwheyẹwhe, a nọ pọ́n gbẹtọvi lẹ hlan taidi mẹhe yiaga hugan kanlin lẹ podọ e na mí aṣẹpipa do kanlin lẹ ji. (Jenẹsisi 1:27, 28) To nukọn mẹ, Jiwheyẹwhe nagbè gbẹtọ lẹ nado dù kanlin lẹ. (Jenẹsisi 9:3) Amọ́, e ma kẹalọyi dọ mí ni nọ wà danú do kanlin lẹ go.—Howhinwhẹn lẹ 12:10.

 Sọgbe hẹ nuhe Biblu dọ, mẹdopodopo wẹ na de eyin e na nọ dù olàn kavi lala. b Nudide mítọn enẹ ma nọ dohia dọ mí họakuẹ to nukun Jiwheyẹwhe tọn mẹ hugan mẹdevo lẹ. (1 Kọlintinu lẹ 8:8) Mẹde ma dona nọ mọhodọdo nuhe mẹdevo lẹ de nado nọ dù lẹ go.—Lomunu lẹ 14:3.

 Biblu dohia dọ aliho gbẹninọ tọn mítọn ma gán de nuhahun he to gbẹ̀mẹ lẹ sẹ̀. Tonudidọ, pipli gbẹtọvi lẹ tọn po tito akuẹzinzan tọn aihọn ehe tọn lẹ po wẹ yin adọ̀ suhugan nuhahun he mí to pipehẹ to ogbẹ̀ lọ mẹ lẹ tọn, ehe mẹde ma gán jlado. Biblu dọmọ:

•   “Nuhe gbán ma sọgan yin jijlọ.”—Yẹwhehodọtọ 1:15.

 Mẹdatọ mítọn wẹ na didẹ nuhahun he pehẹ mí te lẹ. Biblu basi zẹẹmẹ nuhe e na wà lẹ tọn to yẹhiadonu-liho.

•   “Yẹn sọ mọ olọn yọyọ de po aigba yọyọ de po; na olọn hoho lọ po aigba hoho lọ po ko juwayi, ohù masọ tin ba.”—Osọhia 21:1.

 Jiwheyẹwhe na yí “olọn yọyọ de,” enẹ wẹ gandudu Ahọluduta olọn mẹ tọn etọn do diọtẹnna gandudu gbẹtọvi tọn lẹ kavi “olọn hoho lọ.” Ahọluduta etọn na de “aigba hoho lọ,” enẹ wẹ mẹylankan lẹ sẹ̀, bo dugán do “aigba yọyọ de” ji, kavi mẹhe nọ desọn ojlo mẹ bo nọ setonuna aṣẹpipa etọn lẹ ji.

 Gandudu Ahọluduta Jiwheyẹwhe tọn kẹdẹ glọ wẹ gbẹtọvi lẹ na plọn nado nọ nọgbẹ̀ to aihọn pipé de mẹ to pọmẹ hẹ kanlin lẹ te to jijọho mẹ bọ lẹdo lẹ ma nasọ yin hinhẹnflu ba.—Isaia 11:6-9.