Nujijọ danuwiwa tonudidọ tọn debọdo-dego lẹ wẹ to núgbà to aihọn lọ mẹ.

•   To Mexique, tonudọtọ he ze yinkọ dai na vòbibla 39 plipli wẹ yin hùhù to ojlẹ vòbibla tọn 2023-2024 tọn mẹ, agayiyi hlọnhuhu tọn ehe sẹhundaga taun, gọna danuwiwa tonudidọ tọn devo lẹ he gbàhundona mẹlẹ bosọ fẹayihasẹna yé sọn vòbibla lọ ji.

•   Nujijọ danuwiwa tonudidọ tọn susu wẹ sọ gbànú to Europe to agọe, bọ e pò pẹẹde na agbagogán Slovaquie tọn ni yin hùhù to 15 mai 2024.

•   Nujijọ de he sọ dán États-Unis wẹ yindọ togán hoho otò lọ tọn Donald Trump ko diblayin hùhù to 13 juillet 2024.

 Naegbọn danuwiwa tonudidọ tọn do sù sọmọ? Be e na wá doalọte to gbèdopo ya? Etẹwẹ Biblu dọ?

 Biblu ko dọdai dọ to ojlẹ mítọn mẹ, ehe e ylọdọ “azán godo tọn lẹ,” mẹsusu wẹ na tindo pọndohlan he na yidogọna danuwiwa po kinklan po.

•   “To azán godo tọn lẹ mẹ, ojlẹ awusinyẹn tọn he vẹawu nado pehẹ lẹ na wá tin. Na gbẹtọ lẹ na yin, . . . mayọndagbenọ, nugbomadọtọ, . . . gbigbọ gbekọndopọ tọn matindotọ, . . . kanylantọ, . . . mẹdehiatọ, tasinyẹntọ, mẹhe nọ gbọn kikla dali yigo.”—2 Timoti 3:1-4.

 Biblu sọ dọ dọdai dọ nujijọ hunyanhunyan tọn lẹ kavi gufinfọn gọna bẹwlu tonudidọ tọn na dohiagona ojlẹ mítọn. (Luku 21:9, nudọnamẹ odò tọn) Amọ́, danuwiwa tonudidọ tọn po kinklan po ma na nọ aimẹ kakadoi.

 Biblu basi zẹẹmẹ dọ Jiwheyẹwhe na yí gandudu olọn mẹ tọn etọn titi do diọtẹnna gandudu gbẹtọvi tọn lẹpo.

•   ‘Jiwheyẹwhe olọn tọn na ze ahọluduta de dai he na gídí ahọluduta [devo] ehe lẹpo bo na hẹn yé wá opodo, bọ ewọ kẹdẹ wẹ na nọte kakadoi.’—Daniẹli 2:44.

 Na nugbo tọn, Ahọluduta Jiwheyẹwhe tọn na kọ̀n gbẹtọ lẹ dopọ bo nasọ hẹn jijọho wá lẹdo aihọn pé.

•   Jesu Klisti he yin gandutọ etọn yin yiylọdọ “Ahọvi Jijọho tọn,” podọ e nasọ hẹn ẹn diun dọ “jijọho etọn ma na wá vivọnu gbede.”—Isaia 9:6, 7.

•   Etlẹ yin to alọnu din, mẹjidugando etọn lẹ to nuplọn dolehe yé gán nọ jijọho mẹ do ji. Taidi kọdetọn de, Biblu dọmọ: “Yé na yí ohí yetọn lẹ do tùn glepọnu Podọ owhán yetọn lẹ do tùn agbogọdọẹ. Akọta de ma na ze ohí daga do akọta devo ji, Mọ yé ma nasọ plọn awhànfunfun ba.”—Isaia 2:3, 4.

 Nado yọ́n nususu dogọ, hia hosọ lọ“Etẹwẹ Ahọluduta Jiwheyẹwhe Tọn Na Wà?” bosọ pọ́n video lọ Etẹwẹ Ahọluduta Jiwheyẹwhe Tọn Yin?