LEHE NUNINA MÌTỌN LẸ NỌ YIN YIYIZAN DO
Awuwiwlena Video Tito-to-whinnu Plidopọ Daho 2020 tọn “Nọ Jaya Whepoponu”! Tọn Lẹ
10 AOÛT 2020
Video plidopọ daho tọn lẹ jẹ ahun mítọn mẹ bo hẹn nukunnumọjẹnumẹ mítọn gando Owe-wiwe lẹ go họnwun dogọ. Plidopọ Daho 2020 tọn ‘Nọ Jaya Whepoponu’! bẹ video 114 hẹn, ehe bẹ hodidọ 43 he Hagbẹ Anademẹtọ lọ gọna alọgọtọ yetọn lẹ na lẹ hẹn. Be a’o lẹnnupọndo vivẹnudido po akuẹzinzan he e biọ nado wleawuna yé lẹ po ji ya?
Nudi mẹ’sunnu po mẹ’yọnnu mítọn 900 po lẹdo aihọn pé wẹ yí whenu po azọ́nyinyọnẹn yetọn po zan nado gọalọ to video lọ lẹ bibayi whenu. To lẹndopọ mẹ, yé zan nudi gànhiho 100 000 to nudi owhe awe gblamẹ do azọ́n lọ tamẹ. Ehe bẹ gànhiho 70 000 he hudo etọn tin nado dotana video nukunwhiwhe 76 tọn lọ Nẹhemia: “Ayajẹ Jehovah Tọn Wẹ Figangan Mìtọn” hẹn ga.
Dile mì gán’o mọ do, e biọ akuẹzinzan taun nado wleawu nú dandan tọn delẹ tọn na mẹdezejotọ ojlo dagbenọ ehelẹ, taidi azọ́nwanu lẹ, gọna fie yé na nọ nado dotana azọ́n lọ.
“Ojlo Wedegbẹ́ Mẹpinplọn tọn Hagbẹ Anademẹtọ lọ tọn wẹ nado do aṣa po lẹdo voovo lẹ po hia to video mítọn lẹ mẹ. Gbọnmọ dali, mí na dohia nugbo dọ whẹndo mẹ’sunnu tọn lẹdo aihọn pé tọn de wẹ mí,” wẹ Jared Gossman, he to Azọ́nwatẹn Video tọn dọ. “Nado jẹ yanwle enẹ kọ̀n, pipli 24 to otò voovo 11 mẹ wẹ wazọ́n dopọ do tito lọ ji. Vivẹnudido lẹdo aihọn pé ehe n’kọ nọ biọ akuẹ po tito dagbe po taun.”
Susu to video mítọn lẹ mẹ sọ nọ biọ azọ́nwanu po nọtẹn vonọtaun lẹ po. Di apajlẹ, nọtẹn he yin yiyizan na Nẹhemia: “Ayajẹ Jehovah Tọn Wẹ Figangan Mìtọn” lẹ yin gbigbá do Mt. Ebo sẹpọ Patterson, New York, to États-Unis. Nado yí nunina lẹ zan ganji bo ka bayi video lọ na e nido sọgbe to whenuho-liho, mẹ’sunnu lẹ wleawuna adó yẹblẹ tọn lẹ he di adó Jelusalẹm hoho lọ tọn lẹ pẹẹ. Dopodopo yetọn lẹ yiji na mẹtlu ṣidopo bo yin bibayi po atin po bọ yè wá sásẹ̀ndo na e nido di zannu lẹ pẹẹ. “Adó” enẹlẹ gán yin yiyizan nado bayi nupinpọn susu, ehe de nuyizan he hudo tin na lẹ pò taun. Etomọṣo, dọla Amelika tọn nudi 100 000 kavi 56 200 000 Franc CFA wẹ yè yizan na nuyizan nupinpọn-do-plọnnu lọ tọn lẹ kẹdẹ. a
Ehelẹ yinyọnẹn yidogọna pinpẹn-nutọn mítọn na tito-to-whinnu plidopọ daho whe ehe tọn. Mí deji dọ vivẹnu he e biọ nado wleawuna tito ehe na dekọtọn do pipà daho de mẹ lẹdo aihọn pé hlan Jehovah. Mì wanu na nunina alọtútlú tọn mìtọn lẹ he mì yí donate.pr418.com po aliho nunina tọn devo lẹ po do basi do azọ́n lẹdo aihọn pé lọ tamẹ.
a Nuyizan lẹ na Nẹhemia: “Ayajẹ Jehovah Tọn Wẹ Figangan Mìtọn” yin awuwlena jẹnukọnna azọ̀n COVID-19 tọn. To whenẹnu, osẹ́n láninọ na ode awetọ tọn ma’o yin dido.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Fie Wẹ Kunnudetọ Jehovah Tọn lẹ Nọ Mọ Akuẹ te Nado Wà Azọ́n Yetọn Lẹ?
Pọ́n lehe azọ́n yẹwhehodidọ lẹdo aihọn pé tọn mítọn fọ́n bo to nukọnyi do mahopọnna dọ akuẹ kavi mado-ao ma nọ yin ṣinṣinyan.
YỌ́N MÍ DOGỌ
Yì Plidopọ Daho 2024 tọn lọ—“Lá Wẹndagbe Lọ!”
Mí yí zohunhun do bayi oylọna we nado yì plidopọ azán atọ̀n tọn owhe ehe tọn he Kunnudetọ Jehovah tọn lẹ wleawu etọn.
LEHE NUNINA MÌTỌN LẸ NỌ YIN YIYIZAN DO
Plidopọ Daho 2020 Tọn ‘Nọ Jaya Whepoponu’! Lilẹdogbedevomẹ
Nawẹ hodidọ, nupinpọn-do-plọnnu po ohàn lẹ po yawu yin lilẹdo ogbè 500 linlán mẹ gbọn?
