LEHE NUNINA MÌTỌN LẸ NỌ YIN YIYIZAN DO
Azọ́nwanu Pẹvi De He Nọ Namẹ Núdùdù Gbigbọmẹ Tọn
1er SEPTEMBRE 2020
Kunnudetọ Jehovah tọn lẹ nọ mọ núdùdù gbigbọmẹ tọn yí gbọn intẹnẹt ji todin hú gbede pọn. Ṣigba, to fisusu lẹdo aihọn pé, akuẹ nọ whèdo mẹ’sunnu mítọn lẹ nado yì intẹnẹt ji. Mẹdevo lẹ to lẹdo he mẹ Intẹnẹt ma nọ wazọ́n ganji te lẹ, podọ to fidelẹ e ma tlẹ nọ wazọ́n paali.
Etomọṣo, mẹ’sunnu po mẹ’yọnnu mítọn lẹ po nọ yí owe mítọn lẹ do nuyizan lẹtliki tọn yetọn lẹ ji todin eyin yé ma tlẹ gán yì intẹnẹt ji! Nawẹ enẹ yọnbasi gbọn?
JW Box yin nuyizan pẹvi de he yè wleawuna na agun he to fie e nọ vẹawu nado mọ Intẹnẹt te lẹ. E bẹ azọnwanu de he nọ namẹ wifi he yin hihọ̀ sọn azọnwhé de hẹn, aplikasiọn he Azọ́nwatẹn Ọdinatẹẹ tọn to Bẹtẹli wleawuna, gọna owe po video he to jw.org ji lẹ po. Nuyizan JW Box dopodopo nọ họ̀ nudi 40 000 FCFA linlán.
To Plitẹnhọ Ahọluduta tọn mẹ, mẹ’sunnu po mẹ’yọnnu lẹ po nọ yí alokan yetọn do yì wifi JW Box tọn ji nado yí owe po video lẹ po. Mẹhe alokan yetọn lẹ tlẹ’o dohó kavi ma dohuhlọn sọmọ lẹ lọsu sọgan wamọ. Amọ́, eyin agun de ma gán yì intẹnẹt ji lo, nawẹ nuyọyọ lẹ na wá JW Box lọ ji gbọn? Alahọ nọ do clé USB he dopo nọ họ̀ 2 000 FCFA linlán hlan sọn jlẹ de mẹ jẹ devo mẹ po nuyọyọ he to jw.org ji lẹ po na yè nido yí clé lọ do bẹ nuyọyọ ehelẹ do JW Box lọ ji.
Nawẹ JW Box ko gọalọna mẹ’sunnu mítọn lẹ gbọn? Nathan Adruandra, tatọ́ whẹndo tọn de to République Démocratique du Congo, dọ: “N’to dindin nado yí video lọ lẹ ‘Jehovah E, . . . Hiẹ Go Wẹ Yẹn Dejido’ po Mì Flin Asi Lọti Tọn po e ma pọ́. Amọ́, e ma pà mi gbede, bọ n’gbọ bo honuplá. Todin, n’gán yí video enẹlẹ do alokan ṣie ji, podọ enẹ nọ gọalọna mí mẹjitọ lẹ nado plọnnu vi mítọn lẹ to aliho dagbe hugan mẹ.”
Mẹ’sunnu de he nọ gọalọna agun lẹ to Nigeria nado yọn lee yè na zan JW Box do dọ: “Mẹ’sunnu lẹ mọdọ nunina vonọtaun de wẹ JW Box yin sọn Jehovah dè. E vivi na yé susu dọ yé gán nọ yí owe po video lẹ po din po awubibọ po sọn Azọ́nwanu Mẹpinplọn tọn mítọn mẹ.”
JW Box 1 700 linlán wẹ’o yin didohlan mẹ’sunnu mítọn lẹ to Aflika, Océanie, po Amérique du Sud po, podọ mí sọ to tito bayi nado do susu devo lẹ hlan agun lẹ. Fie wẹ akuẹ he mí do hudo etọn na tito ehe nọ wá sọn? Nunina lẹ na azọ́n lẹdo aihọn pé tọn lẹ mẹ wẹ, ehe bẹ dehe nọ yin bibasi to donate.pr418.com ji lẹ hẹn. Mì wanu na alọtútlú mìtọn.
A Gán Sọ Pọ́n Hosọ Ehelẹ
KANBIỌ HE MẸSUSU NỌ KANSE LẸ
Fie Wẹ Kunnudetọ Jehovah Tọn lẹ Nọ Mọ Akuẹ te Nado Wà Azọ́n Yetọn Lẹ?
Pọ́n lehe azọ́n yẹwhehodidọ lẹdo aihọn pé tọn mítọn fọ́n bo to nukọnyi do mahopọnna dọ akuẹ kavi mado-ao ma nọ yin ṣinṣinyan.
LEHE NUNINA MÌTỌN LẸ NỌ YIN YIYIZAN DO
Televiziọn JW Gbọn Satellite Ji Nọ Jẹ Fie Intẹnẹt Ma Nọ Wazọ́n Te Lẹ
Nawẹ mẹmẹsunnu lẹ to Aflika nọ pọ́n Televiziọn JW gbọn, eyin yé ma do Intẹnẹt?
