LEHE NUNINA MÌTỌN LẸ NỌ YIN YIYIZAN DO

Azọ́nwatẹn Lẹdogbedevomẹ Tọn lẹ Nọ Hẹn Ale Wá Na Mẹsusu

MÌ HÒ (video kavi hoyidokanji lọ)

1^er MARS 2021

Kandeko linlán to kanweko ji lẹdogbedevomẹtọ mítọn he nọ wazọ́n na whenu-gigọ́ lẹ tọn ma nọ wazọ́n sọn alahọ mẹ, amọ́ sọn azọ́nwatẹn lẹdogbedevomẹ tọn he to olá lẹ mẹ. Naegbọn tito ehe nọ hẹn ale wá sọmọ? Azọ́nwanu telẹ sin hudo wẹ lẹdogbedevomẹtọ lẹ do nado wazọ́n sọn olá? Podọ kọdetọn tẹwẹ nọtẹn he mẹ yé nọ wazọ́n sọn nọ tindo do azọ́n yetọn ji?

Azọ́nwatẹn lẹdogbedevomẹ tọn he ma to Bẹtẹli lẹ nọ zọ́n bọ lẹdogbedevomẹtọ lẹ nọ nọ̀ mẹ’e nọ do ogbè yetọn susu lẹ ṣẹnṣẹn. Karin, lẹdogbedevomẹtọ Allemagne-gbè paa tọn de dọ dọ: “Sọn whenue mí sẹtẹn wá azọ́nwatẹn mítọn to Cuauhtémoc, Chihuahua, to Mexique, whelẹponu wẹ mí nọ do Allemagne-gbè paa—hẹ lẹdogbedevomẹtọ-gbẹ́ lẹ, to lizọnyizọn lọ mẹ, podọ whenue mí jei nú họ̀ gbé. Mí nọ to ogbè mítọn do whepoponu. Oló hoho he mí masọ sè pọ́n lẹ wẹ mí nọ sè din, mí sọ nọ to hogbe yọyọ lẹ plọn.”

James, he to azọ́nwa hẹ pipli lẹdogbedevomẹtọ Frafra-gbè tọn to Ghana, yigbe dọ whedelẹnu emi nọ jẹdò gbẹdido hẹ whẹndo Bẹtẹli tọn to alahọ mẹ. Amọ́ e yidogọ dọ: “N’yiwanna azọ́nwiwa sọn olá fi. Kunnudide do ogbè lẹdo lọ tọn mẹ gọna lee mẹlẹ to alọkẹyi wẹndagbe lọ do nọ vivi na mi taun.”

Nawẹ mẹ’sunnu mítọn lẹ nọ bayi dide fie yé na do azọ́nwatẹn mọnkọ ai do tọn gbọn? “Dopo to nuhahun he mí nọ pehẹ lẹ mẹ wẹ yindọ to lẹdo delẹ mẹ, miyọ́n lẹtliki tọn, osin po Intẹnẹt dagbe he yè do hudo etọn po nado mọ nue na yin lilẹ́dogbedevomẹ lẹ yí ma nọ tin whepoponu,” wẹ Joseph, he nọ wazọ́n hẹ Azọ́nwatẹn Họ̀gbigbá Lẹdo Aihọn Pé Tọn to Warwick, New York, États-Unis dọ. “Enẹwutu, eyin mí jlo na do azọ́nwatẹn mọnkọ ai, fisusu he ogbè lọ nọ yin dido te ji wẹ mí nọ lẹnnupọndo.”

To paa mẹ, fihe nọ yá bosọ nọ de akuẹzinzan pò nado do azọ́nwatẹn de ai wẹ Plitẹnhọ Plidopọ tọn, Plitẹnhọ Ahọluduta tọn, kavi owhé mẹdehlan lẹ tọn de gbè, fie lẹdogbedevomẹtọ lọ lẹ na nọ wá wazọ́n te. Eyin ohọ̀ mọnkọ de ma tin, yè nọ nagbe mẹ’sunnu lẹ nado họ̀ ohọ̀ po azọ́nwatẹn de po fie lẹdogbedevomẹtọ lẹ gán nọ nọ̀ bo nọ wazọ́n te. Eyin nuhudo pipli lẹdogbedevomẹ tọn lọ tọn lẹ diọ, ohọ̀ enẹlẹ nọ yin sisà bọ akuẹ lọ nọ yin zinzan na nue hudo etọn tin hugan lẹ.

Azọ́nwanu He Azọ́n lọ Nọ Biọ Lẹ

To owhe sinsẹ̀nzọn tọn 2020 tọn gblamẹ, dọla Amelika tọn livi 13 wẹ mí zan do azọ́nwatẹn enẹ lẹpo go. Pipli he to azọ́nwatẹn mítọn mẹ lẹ do hudo ọdinatẹẹ, tito ọdinatẹẹ ji tọn vonọtaun delẹ, azọ́nwanu hoyidokanji tọn, Intẹnẹt, gọna nuflinflin devo lẹ tọn. Tito ọdinatẹẹ ji tọn paa de he mẹdopo gán zan nọ họ̀ dọla Amelika tọn 750. Tito ọdinatẹẹ ji tọn he nọ yin hihọ̀ lẹ gọna Watchtower Translation System sọ nọ to ọdinatẹẹ lọ lẹ ji ga, yèdọ tito de he nọ gọalọna lẹdogbedevomẹtọ lẹ nado wazọ́n yetọn ganji.

Lẹdogbedevomẹtọ lẹ sọ nọ mọ azọ́nwanu hoyidokanji tọn yí ga, ehe na hẹn ẹn bọawuna yé nado yí nulẹ do kanji to azọ́nwatẹn lọ. Azọ́nwanu enẹlẹ wá yọ́n-na-yizan taun whenue COVID-19 bẹ, na lẹdogbedevomẹtọ susu gán hẹn yé yì whégbè bo zindonukọn to azọ́n yetọn mẹ.

Mẹdezejotọ he to lẹdo lọ mẹ lẹ nọ saba gọalọ nado gbeje nue yin lilẹdogbedevomẹ lẹ pọ́n bo penukundo azọ́nwatẹn lọ go. Cirstin, he to azọ́nwatẹn Afrikaans-gbè tọn he to Cape Town, Afrique du sud dọ dọ: “Wẹnlatọ podọ gbehosọnalitọ whepoponu tọn susu wẹ mọ dotẹnmẹ nado zan nugopipe yetọn tofi.”

Mẹdezejotọ enẹlẹ nọ duvivi lẹblanulọkẹyi lọ tọn. Mẹ’yọnnu de he nọ gọalọ to azọ́nwatẹn enẹ dopo dọ dọ “ayiha mẹtọn nọ jai tofi.” Mẹ’sunnu po mẹ’yọnnu delẹ po sọ nọ zan gbè yetọn nado bayi hoyidokanji lẹ. Juana, he nọ bayi lẹdogbedevomẹ do Totonac-gbè mẹ to ayimatẹn Veracruz tọn mẹ to Mexique dọmọ: “Din he mí sẹpọ tòdaho he mẹ gbè mítọn nọ yin dido te lẹ, e bọawu nado mọ mẹ’sunnu po mẹ’yọnnu po susu dogọ nado yí owe po video mítọn lẹ po do kanji.”

Amọ́ be azọ́nwatẹn ehelẹ yidogọna lẹdogbedevomẹ lẹ ya? Susu to wehiatọ fọtọ́n susu mítọn lẹ mẹ yigbe dọ mọwẹ. Cédric, he nọ wazọ́n hẹ pipli lẹdogbedevomẹtọ Kongo-gbè tọn lẹ to République démocratique du Congo dọmọ: “Mẹ’sunnu po mẹ’yọnnu po delẹ nọ ylọ lẹdogbedevomẹ mítọn lẹ dọ ‘Kongo-gbè Watch Tower tọn,’ na nue mí nọ kàn lẹ nọ gbọnvona lee Kongo-gbè nọ yin dido te to paa mẹ wutu. Amọ́ din, yé nọ dọ dọ owe mítọn lẹ nọ yin lilẹdo Kongo-gbè alọnu tọn mẹ, yèdọ po hogbe paa he mẹlẹ nọ zan egbesọegbesọ le po.”

Nudopolọ wẹ Andile, he nọ wazọ́n to pipli Xhosa-gbè tọn mẹ, sè to Afrique du sud. E dọ “Mẹsusu wẹ dọ dọ lẹdogbedevomẹ lọ diọ taun. Jọja he nọ hia Atọ̀họ̀ do Glẹnsigbe mẹ dai lẹ lọsu jẹ hihia ji do Xhosa-gbè mẹ. Yé yiwanna lee linlẹn lẹ nọ tọ́n to jọwamọ-liho to Lẹdogbedevomẹ Aihọn Yọyọ Tọn he yin vivọjlado lọ mẹ.”

Nunina sọn ojlo mẹ wá na azọ́n lẹdo aihọn pé tọn lọ he bẹ nunina he nọ yin bibasi gbọn donate.pr418.com ji lẹ hẹn wẹ nọ yin yiyizan nado do azọ́nwatẹn lẹdogbedevomẹ tọn de ai, penukundego, bosọ họ̀ azọ́nwanu lẹ demẹ.

Jaale, nuhe nọ hònú lọ ma penugo nado hò e.Yí Video Ehe sọn Nọtẹn Ehe Ji

A Gán Sọ Pọ́n Hosọ Ehelẹ

KANBIỌ HE MẸSUSU NỌ KANSE LẸ

https://cms-imgp.jw-cdn.org/img/p/502500207/univ/art/502500207_univ_sqr_xl.jpg

hdu hosọ 10

Kunnudetọ Jehovah Tọn Lẹ

Azọ́nwatẹn Lẹdogbedevomẹ Tọn lẹ Nọ Hẹn Ale Wá Na Mẹsusu

Azọ́nwanu He Azọ́n lọ Nọ Biọ Lẹ

A Gán Sọ Pọ́n Hosọ Ehelẹ

Fie Wẹ Kunnudetọ Jehovah Tọn lẹ Nọ Mọ Akuẹ te Nado Wà Azọ́n Yetọn Lẹ?

Plidopọ Daho 2020 Tọn ‘Nọ Jaya Whepoponu’! Lilẹdogbedevomẹ