Kunnudetọ Jehovah tọn lẹ to azọ́n susu wà nado gọalọna gbẹtọ lẹ to otò hugan 200 linlán mẹ. Amọ́, 35 poun to otò enẹlẹ mẹ wẹ nọ mọ nunina he pé yí nado penukundo akuẹzinzan yetọn lẹ go. Nawẹ yè nọ penukundo akuẹzinzan lẹ go do to fie nunina lẹ ma sù sọmọ te lẹ?

 Hagbẹ Anademẹtọ Kunnudetọ Jehovah tọn lẹ tọn nọ lẹnnupọndo nuhudo gbigbọmẹ tọn po azọ́n Kunnudetọ hatọ lẹ tọn lẹ po ji lẹdo aihọn pé. Tito sọwhiwhe tọn nọ yin bibayi na akuẹ he to aimẹ lẹ nido sọgan yin yiyizan to aliho dagbe mẹ. Eyin alahọ mọ nunina lẹ yí zẹ̀ nue sin hudo yè do nado penukundo azọ́n lẹdo de tọn lẹ go, lánkan lọ sọgan yin yiyizan to fie nunina lẹ ma sù te. Tito enẹ taidi dehe Klistiani dowhenu tọn lẹ basi nado gọalọna ode awetọ “gbọn [nulẹ] hinhẹn sọzẹn dali.” (2 Kọlintinu lẹ 8:14) Yé yí lánkan yetọn do sudo nuhe whèdo Klistiani devo he ma tindo alọnu sọmọ lẹ tọn.

 Etẹwẹ nọ yin numọtolanmẹ mẹ’sunnu mítọn he mọ lánkan he wá sọn alahọ devo lẹ mẹ yí lẹ tọn? To Tanzanie, di apajlẹ, fie gbẹtọ 50 linlán to kanweko ji ma nọ tindo 1 000F CFA to azán dopodopo ji te, akuẹ enẹlẹ yin yiyizan nado vọ́ Plitẹnhọ Ahọluduta tọn agun Mafinga tọn jlado. Agun lọ wlan dọ: “Sọn whenue yè vọ́ plitẹnhọ lọ jlado, mẹhe nọ wá pli lẹ jideji taun! Nù mítọn ma sù pẹ́ na alọtútlú he titobasinanu Jehovah tọn po mẹ’sunnu lẹ lẹdo aihọn pé po nọ dohia, ehe gọalọna mí nado tindo nọtẹn sinsẹn-bibasi tọn dagbedagbe ehe.”

 Delẹ to mẹ’sunnu mítọn lẹ mẹ to Sri Lanka jiya núdùdù whèdomẹ tọn na azọ̀nylankan COVID-19 tọn wutu. Imara Fernando po visunnu jọja etọn, Enosh po to yé mẹ. Amọ́, po nunina he mẹ’sunnu lẹ bayi sọn otò devo lẹ mẹ po, yé mọ alọgọ kọgbọ tọn he yé do hudo etọn yí. To kalti de he yé dohlan ji, yé wlan dọ: “Mí dọnudo mẹ’sunnu he do owanyi hia mí to ojlẹ sinsinyẹn ehe mẹ lẹ. E nọ vivi na mí taun dọ mí to whẹndo ehe mẹ, podọ odẹ̀ mítọn wẹ yindọ Jehovah ni gọalọna mẹ’sunnu mítọn lẹpo to azán godo tọn ehelẹ mẹ.”

 Mahopọnna fidepope he mẹ’sunnu po mẹ’yọnnu mítọn lẹ po te, yé nọ yin whinwhàn nado má nuhe yé tindo lẹ. Enosh, di apajlẹ, wleawuna apotin nunina tọn pẹvi de na ede, na ewọ lọsu nido sọgan nọ basi nunina nado gọalọna whẹndo he to hudo mẹ lẹ. Guadalupe Álvarez lọsu do gbigbọ alọtútlú tọn dopolọ hia. Mexico wẹ e nọ nọ̀, fie azọ́nkuẹ ma nọ sù paali te, podọ e tlẹ nọ vẹawu nado mọ azọ́n lọsu. Etomọṣo, e basi nunina he go e pé. E wlan dọ: “N’dopẹna Jehovah na dagbewà po owanyi nugbo etọn po wutu. N’yọnẹn dọ nunina ṣie lẹ na yin yiyidogọ mẹdevo lẹ tọn bo na yọn-na-yizan na mẹ’sunnu he to hudo mẹ lẹ.”

 Alahọ he nọ do akuẹ hlan fie hudo te lẹ nọ hunhomẹ nado wàmọ. Mẹ’sunnu Anthony Carvalho he to sinsẹn to Wedegbẹ́ Alahọ Brésil tọn mẹ dọ: “Na owhe susu lẹ, mí do hudo alọgọ otò devo lẹ tọn to akuẹzinzan-liho. Na alọgọ he yin nina mí wutu, mí tindo jideji jiawu de. Todin, nulẹ pọnte na mí, bọ mí tindo lẹblanulọkẹyi lọ nado gọalọna mẹdevo lẹ. Mẹ’sunnu mítọn lẹ nọ pọ́n nue yé sọgan wà nado gọalọ to azọ́n yẹwhehodidọ tọn he to yìyì lẹdo aihọn pé lọ mẹ dile devi Jesu tọn lẹ yí yede do sanvọ́ nado wà do.”

 Aliho dagbe hugan tẹ mẹ wẹ Kunnudetọ Jehovah tọn lẹ nọ gọalọna mẹ’sunnu po mẹ’yọnnu yetọn he to hudo mẹ lẹ po te? E ma yin gbọn akuẹ didohlan alahọ otò de tọn tlọlọ dali, amọ́ gbọn nunina lẹ bibasi nado nọgodona azọ́n lẹdo aihọn pé tọn lọ dali. Enẹ sọgan yin wiwà gbọn apotin agun tọn he go yè kàn “Azọ́n Ledo Aihọn Pé Tọn” do kavi gbọn donate.pr418.com yiyizan dali. Mí nọ yọ́n pinpẹn nunina enẹlẹ tọn susu.