Kunnudetọ Jehovah tọn lẹ nọ hò yisenọ hatọ yetọn lẹ tọn pọ́n taun. (1 Pita 2:17) Susu mítọn wẹ nọ do numọtolanmẹ mẹ’yọnnu Tannis he nọ nọ̀ Kenya tọn nkọ. E dọ: “N’nọ yiwanna nado yọ́n lee nulẹ to yìyì do na mẹ’sunnu po mẹ’yọnnu ṣie lẹ po lẹdo aihọn pé.” Nawẹ Tannis po Kunnudetọ livi susu devo lẹ po nọ yọ́n nuhe to jijọ lẹ gbọn? Sọn 2013 gbọ́n, wẹ adà lọ Linlin-Họsa he to jw.org ji ko to alọgọna mí nado yọ́n lee nulẹ to yìyì do.

 Linlin-Họsa lọ nọ bẹ linlin he gando Kunnudetọ Jehovah tọn lẹ go hẹn bo nọ dọhodo hosọ delẹ ji taidi Biblu didetọn, azọ́n kọgbọ tọn, azọ́n họ̀gbigbá tọn gọna nujijọ ayidego tọn devo lẹ. E nọ na mí linlin gando mẹ’sunnu po mẹ’yọnnu mítọn lẹ po go he yè sú do gànmẹ na yise yetọn wutu lẹ. Linlin-Họsa lọ sọ nọ bẹ numimọ tulinamẹ tọn lẹ he gando azọ́n kunnudide tọn po hùnwhẹ Oflin tọn po go hẹn. Mẹnu lẹ wẹ nọ bayi dodinnanu do linlin ehelẹ ji, podọ nawẹ yé nọ wleawuna linlin lọ lẹ gbọn?

 Linlin-Họsa He to Tatọ́-Tẹnnọ wẹ nọ penukundo Linlin-Họsa he to Intẹnẹt ji lọ go. Azọ́nwatẹn he to Tatọ́-tẹnnọ mítọn ehe nọ wazọ́n to anademẹ Wedegbẹ́ Anadenanutọ tọn Hagbẹ Anademẹtọ lọ tọn glọ. Mẹ’sunnu po mẹ’yọnnu 100 linlán po wẹ nọ wazọ́n to Linlin-Họsa he to Tatọ́-Tẹnnọ, podọ susu yetọn wẹ nọ wazọ́n sọn olá, omẹ ehelẹ bẹ wekantọ lẹ, dodinnanu bayitọ lẹ, mẹhe nọ wazọ́n do yẹdide ji lẹ po lẹdogbedevomẹ-basitọ lẹ po hẹn. Mẹdevo lẹ nọ dọho hẹ ahọlu-zọ́nwatọ lẹ, mẹplọntọ lẹ po linlin-zọ́nwatọ lẹ po. Lẹdo aihọn pé, Linlin-Họsa He to Alahọ lẹ mẹ 80 linlán wẹ nọ gọalọna Linlin-Họsa He to Tatọ́-Tẹnnọ lọ.

 Linlin-Họsa He to Tatọ́-Tẹnnọ po Linlin-Họsa He to Alahọ lẹ mẹ po nọ wazọ́n dopọ pẹkipẹki nado wleawuna linlin lọ lẹ. Tlolo he mẹmẹsunnu mítọn lẹ mọdọ e jẹ dọ yé ni na linlin de, yé nọ bayi dodinnanu do e ji bo nọ bẹ nudọnamẹ dejidego lẹ pli. Ehe gán biọ dọ yé ni kanhose mẹlẹ bosọ dọho hẹ weyọnẹntọ lẹ. Eyin yé ko bẹ nugbo he gando whẹho lọ go lẹ pli godo, yé nọ kàn linlin lọ, nọ ṣinyankẹ́nna, nọ vọ́ ẹ hia bosọ nọ gọ́ yẹdide lẹ na, enẹgodo yé nọ do e hlan Wedegbẹ́ Anadenanutọ tọn na yé nido kẹalọyi.

 Numọtolanmẹ tẹwẹ sinsẹ̀n-basitọ hatọ lẹ nọ tindo gando Linlin-Họsa he to Intẹnẹt ji lọ go? Mẹ’yọnnu Cheryl he nọ nọ̀ Philippines dọ dọ, “Whẹpo n’nado bẹ nuwiwa azán dopodopo tọn jẹeji, n’nọ yiwanna nado nọ hianu gando Titobasinanu Jehovah tọn po omẹ etọn lẹ po go.”

 Wehiatọ mítọn susu lẹ wẹ dọ vogbingbọn he yé nọ mọ to Linlin-Họsa he to jw.org ji po linlin paa lẹ po mẹ. Tatiana he nọ nọ̀ Kazakhstan dọ dọ: “Homẹ ṣie nọ hùn dọ n’gán dejido linlin he to jw.org ji lẹ go. Yè gán dejidego na nuhe e bẹhẹn lẹ sọgbe.” Mẹ’yọnnu de to Mexique he nọ yin Alma dọ dọ: “Nudọnamẹ he to Linlin-Họsa lọ mẹ lẹ nọ namẹ tuli taun bo ma nọ gbahundonamẹ taidi linlin paa lẹ.”

 E ma yindọ yè gán dejido nuhe to Linlin-Họsa lọ mẹ lẹ go kẹdẹ poun wẹ gba; e sọ nọ hẹn yise mẹtọn lodo. Bernard he nọ nọ̀ Kenya dọ dọ: “Linlin-Họsa lọ ko gọalọna mi nado nọ mọ mẹ’sunnu po mẹ’yọnnu ṣie lẹ po di whẹndo ṣie mahopọnna fie yé nọ nọ̀. N’nọ penugo nado nọ slẹ yinkọ yetọn po adán he to gbigbó yé lẹ po to odẹ̀ ṣie lẹ mẹ.’’ Mẹ’yọnnu Bybron he uwọ lọsu nọ nọ̀ Kenya dọ dọ: “Whẹlẹponu wẹ e nọ jiawu na mi eyin n’mọ bọ hosọ de dọhodo Biblu he yin didetọn to ogbè devo mẹ ji! Hosọ ehelẹ nọ flin mi dọ Jehovah ma nọ homẹnukuntapọn.”

 Linlin he gando mẹ’sunnu he to pipehẹ homẹkẹn go lẹ lọsu gán na mí tuli taun. Jackline he nọ nọ̀ Kenya dọ dọ, “Ayihamẹlinlẹnpọn do adọgbigbo yetọn ji ko hẹn yise ṣie lodo taun. N’nọ tẹnpọn to whelẹponu nado plọnnu sọn nuhe gọalọna yé nado doakọnnanu mẹ. N’ko mọ lehe nue mẹlẹ nọ pọnhlan di ‘numadinu’ lẹ taidi dẹ̀hiho, Biblu hihia po hànjiji po ko yí adà titengbe de wà nado hẹn yise mẹ’sunnu mítọn lẹ tọn lodo do.”

 Mẹ’yọnnu Beatriz he nọ nọ̀ Costa Rica yọ́n pinpẹn linlin he nọ yin didetọn gando nugbajẹmẹji jọwamọ tọn lẹ go tọn. E dọ dọ: “Linlin-Họsa lọ ko gọalọna mi nado mọ lehe titobasinanu mítọn nọ penukundo nuhudo mẹ’sunnu mítọn lẹ tọn go do to niyaniya mẹ, podọ to aliho he sọgbe bosọ do owanyi hia de mẹ. Ehe zọ́n bọ n’kudeji dọ titobasinanu Jehovah tọn die.”

 E nọ vivi na mí taun nado nọ mọ linlin agọe tọn lẹ gando mẹ’sunnu mítọn lẹ go lẹdo aihọn pé. Eyin nunina he mì nọ bayi do azọ́n lẹdo aihọn pé tọn lọ tamẹ to donate.pr418.com ji tọn dẹ́n wẹ, ehe lẹpo ma na ko yọ́n bayi. Mí dọnudo mì na nunina alọtútlú tọn mìtọn lẹ.