To janvier 2021, Hagbẹ Anademẹtọ lọ de owe Biblu pinplọn tọn yọyọ de tọ́n he hosọ etọn yin Duvivi Ogbẹ̀ Tọn Kakadoi! a Etẹwẹ yin numọtolanmẹ towe whenue owe ehe yin didetọn? Matthew he wá sọn Canada dọ dọ: “E vivi na mi taun! Podọ ayajẹ ṣie to jijideji dile hodidọ lẹ po video lẹ po to zẹẹmẹ nuhewutu owe ehe do yin didetọn tọn bayi gọna lehe omẹ voovo lẹ ko tẹ́n owe lọ zinzan pọ́n do. N’to jejeji nado mọ owe lọ podọ nado jẹ yíyí i zan ji.”

 Owe Duvivi Ogbẹ̀ Tọn Kakadoi! bẹ aliho yọyọ de nado nọ deanana plọnmẹ Biblu lẹ hẹn. Amọ́, e ma yin vogbingbọn enẹ kẹdẹ wẹ to owe yọyọ ehe po owe nupinplọn tọn he mí ko zan wayi lẹ po mẹ. Eyin Duvivi Ogbẹ̀ Tọn Kakadoi! he yè zinjẹgbonu wẹ a nọ zan, a na ko doayi e go dọ e gbọnvo taun. Mí ni pọ́n lehe owe lọ yin awuwlena do nado yọ́n nuhewutu owe lọ do gbọnvo.

 Wema titli. Naegbọn mí dona zan wema titli? Owe Duvivi Ogbẹ̀ Tọn Kakadoi! bẹ yẹdide 600 linlán he tindo sinmẹ voovo hẹn, ehe yí donu 10 do hugan owe Biblu Plọn Mí tọn! Owe yọyọ lọ sọ do tẹnmẹ vọ́tọ lẹ he ji nukinkan po yẹdide lẹ po ma tin te to weda dopodopo ji. Onú awe ehelẹ bẹ avùnnukundiọsọmẹnu de hẹn: Eyin wema de fẹdẹ́, a gán mọ yẹdide he to adà awetọ wema lọ tọn ji. Nado duto nuhahun ehe ji, mẹmẹsunnu he nọ wazọ́n to Azọ́nwatẹn Wezinjẹgbonu Lẹdo Aihọn Pé tọn to Wallkill, New York to États-Unis lẹ tẹ́n wema voovo ẹnẹ delẹ pọ́n, ehe mí to zinzan to wezintẹn mítọn lẹ to alọnu. Wedegbẹ́ Wekinkan tọn Hagbẹ Anademẹtọ lọ tọn gbeje wema ehelẹ dopodopo pọ́n bo wá de dehe yè ma na mọ nukinkan kavi yẹdide he to adà awetọ etọn ji sọmọ. Nugbo wẹ dọ wema ehe vẹahi taun hugan wema he mí nọ zan do zín suhugan owe mítọn lẹ tọn jẹgbonu, amọ́ e na gọalọna Biblu plọntọ de nado hia weda owe lọ Duvivi Ogbẹ̀ Tọn Kakadoi! tọn dopodopo bọ yẹdide he to adà awetọ ji lẹ ma na fẹayihasẹna ẹn.

 Wepa de he gbọnvo. Wepa owe yọyọ lọ tọn gbọnvona owe mítọn devo lẹ tọn, na nue yè tlẹ́ do e go (plastifier) gbọnvo taun wutu. Kakati nado bayi i do lehe mí nọ saba bayi wepa owe mítọn lẹ tọn do, nuhe yè tlẹ́ do wepa owe yọyọ lọ tọn go zọ́n bọ yè gán yawu doayi yẹdide he to e ji go. Aliho he mẹ yè bayi i te ehe na zọ́n bọ wepa owe lọ tọn ma na yawu wló eyin yè tlẹ zan ẹn whlasusu. Nuyizan he yè tlẹ́ do wepa owe yọyọ lọ tọn ehe go yí whla atọ́n do vẹahi hugan dehe mí nọ saba zan. Enẹwutu, alahọ voovo lẹ wazọ́n alọ to alọ mẹ nado mọ nuyizan he yé na tlẹ́ do wepa lọ ji he ma na vẹkuẹ gbau.

 Naegbọn mí do de azọ́nwanu he na biọ akuẹzinzan sọmọ? Mẹmẹsunnu de he nọ wazọ́n to Azọ́nwatẹn Wezinjẹgbonu Lẹdo Aihọn Pé tọn dọ dọ: “Ojlo mítọn wẹ yindọ yè ni yí owe ehe zan ganji, enẹwutu mí jlo dọ owe lọ ni gbẹ́ yọ́npọ́n eyin yè tlẹ zan ẹn whlasusu.” Eduardo he nọ wazọ́n to wezintẹn to alahọ Brésil tọn mẹ dọ dọ: “Homẹ mítọn hùn nado mọ lehe titobasinanu Jehovah tọn yí azọ́nwanu dagbe lẹ zan nado bayi owe he yọnwhanpẹ bo ma na yawu gble ehe do bo ka sọ yí nunina lẹ zan po nuyọnẹn po.”

 To mars 2021, mí jẹ owe lọ Duvivi Ogbẹ̀ Tọn Kakadoi! zinjẹgbonu ji. Ojlẹ azọ̀nylankan COVID-19 tọn mẹ wẹ, enẹwutu mí pehẹ avùnnukundiọsọmẹnu delẹ. Na Bẹtẹli ko yin súsú wutu, azọ́nwatẹn wezinzin tọn ma gán mọ alọgọ mẹhe nọ tlọ́n whégbè nado wá wazọ́n to Bẹtẹli lẹ tọn, mọjanwẹ yè ma gán sọ bayi oylọna mẹmẹsunnu lẹ nado wá sẹ̀n to Bẹtẹli do niyẹn. Enẹwutu, azọ́nwatẹn wezinzin tọn delẹ ma do azọ́nwatọ he pé, podọ delẹ yin súsú na ojlẹ de na osẹ́n he aṣẹpatọ lẹ do wutu.

 Nawẹ mí duto nuhahun ehelẹ ji gbọn? Whenue azọ́nwatẹn wezinzin tọn lẹ gọ̀ azọ́n bẹ, mí deazọ́nna mẹmẹsunnu gọna mẹmẹyọnnu he to azọ́nwatẹn devo lẹ to Bẹtẹli nado gọalọ to wezintẹn na ojlẹ de. Joel he nọ wazọ́n to Azọ́nwatẹn Wezinjẹgbonu Lẹdo Aihọn Pé tọn dọ dọ: “Gbigbọ mẹde-yido-sanvọ́ tọn po ojlo yetọn nado plọn nuyọyọ lẹ po zọ́n bọ mí yawu wazọ́n he yin dandan tọn lẹ.”

 Mahopọnna avùnnukundiọsọmẹnu lẹ, mí penugo nado zín owe Duvivi Ogbẹ̀ Tọn Kakadoi! livi susu jẹgbonu. Nado zín owe ehe tọ́n, mí do hudo azọ́nwanu voovo lẹ tọn taidi, panu fẹ́dẹ́fẹ́dẹ́ wezinzin tọn, nuyizan he yè na tlẹ́ do wepa owe lọ tọn ji (plastifier), wema, wesin wekinkan tọn po gọmu he yè nado tlẹ́ owe lọ po. To osun atọ́n poun godo he mí jẹ owe lọ zín ji, mí ko zan dọla Amelika tọn livi awe e lán 300 (nudi 1 360 450 000F CFA) do azọ́nwanu kẹdẹ tamẹ. Nado de akuẹzinzan pò, sọha owe lọ tọn he agun lẹ do hudo etọn kẹdẹ wẹ mí zinjẹgbonu.

 Numọtolanmẹ tẹwẹ mẹplọntọ lẹ po nuplọntọ lẹ po tindo gando owe Biblu pinplọn tọn yọyọ ehe go? Mẹmẹsunnu de he nọ yin Paul bo nọ nọ̀ Australie dọ dọ: “Owe Duvivi Ogbẹ̀ Tọn Kakadoi! yọ́n-na-yizan taun bọ n’nọ to jejeji nado yí i zan do deanana plọnmẹ Biblu lẹ. Aliho he mẹ owe lọ yin awuwlena te zọ́n bọ e nọ dọ̀n ayidonugo mẹtọn bo ka sọ yọ́n na hodọdopọ taun. E bẹ nudọnamẹ he họnwun lẹ, kanbiọ he nọ jẹ ahun mẹ lẹ gọna video, yẹdide, apotin po yanwle nuplọntọ lọ tọn lẹ po hẹn. Anazọ́n dagbedagbe de wẹ he nọ whàn mi nado hẹn mẹpinplọn ṣie pọnte dogọ.”

 Biblu plọntọ de to États-Unis dọ dọ: “N’yiwanna owe yọyọ lọ taun. Yẹdide he to e mẹ lẹ nọ gọalọna mi nado mọnukunnujẹ nuagokun tangan lẹ mẹ. Video lọ lẹ nọ jẹ ahun ṣie mẹ, ehe nọ whàn mi nado yinuwa.” Biblu plọntọ ehe nọ plọnnu whla awe to osẹ dopo mẹ bosọ nọ wá opli lẹ to gbesisọ mẹ.

 Mí na gbẹ́ zín owe Duvivi Ogbẹ̀ Tọn Kakadoi! livi susu jẹgbonu to ogbè susu devo lẹ mẹ. Na nugbo tọn, Hagbẹ Anademẹtọ lọ ko nagbè dọ owe ehe ni yin zinzinjẹgbonu to ogbè 710 mẹ, ehe yí 340 do hugan ogbè he mẹ yè zín owe Biblu Plọn Mí do!

 Nawẹ mí nọ mọ akuẹ he mí nado zín owe lẹ jẹgbonu gbọn? Nunina he mí nọ bayi do azọ́n lẹdo aihọn pé tọn lọ tamẹ wẹ, bọ susu etọn nọ yin bibayi gbọn donate.pr418.com ji. Mí yiwanna gbigbọ alọtútlú tọn mìtọn taun, ehe nọ zọ́n bọ mí nọ zín owe Biblu pinplọn tọn lẹ jẹgbonu na mẹhe jlo na plọnnu gando Jehovah go bo “duvivi ogbẹ̀ tọn kakadoi” lẹ.—Salmu lẹ 22:26.