To juillet po août 2020 po, whla tintan to whenuho mẹ, whẹndo mẹmẹsunnu tọn mítọn lẹdo aihọn pé na pọ́n tito plidopọ daho tọn dopolọ to ojlẹ dopolọ mẹ. Nado jẹ yanwle ehe kọ̀n, video hodidọ tọn lẹ dona yin lilẹdo ogbè 500 linlán mẹ. Desọn nugbo de mẹ, azọ́n ehe lẹpo na ko biọ owhe dopo kavi humọ nado wá tadona kọ̀n. Amọ́ na ninọmẹ he azọ́nylankan coronavirus tọn hẹnwa wutu, ojlẹ he lẹdogbedevomẹ-basitọ lẹ tindo nado lẹ́ video plidopọ daho 2020 tọn ‘Nọ Jaya Whepoponu’! tọn lẹpo dogbedevomẹ ma pé osun ẹnẹ.

 Azọ́nwatẹn He Nọ Deanana Lẹdogbedevomẹ po Azọ́nwatẹn Nuhihọ̀ Tọn to Tatọ́-Tẹnnọ Kunnudetọ Jehovah Tọn lẹ Tọn po gọalọ nado wazọ́n pligidi ehe dotana. Azọ́nwatẹn He Nọ Deanana Lẹdogbedevomẹ doayi e go dọ pipli lẹdogbedevomẹ tọn susu do hudo azọ́nwanu susu devo lẹ tọn nado wazọ́n lọ dotana, titengbe miklo dagbe lẹ. Azọ́nwatẹn Nuhihọ̀ Tọn to Tatọ́-Tẹnnọ bayi tito nado họ̀ miklo 1 000 bosọ hẹn ẹn diun dọ yé yin didohlan ofi voovo 200 linlán.

 Ma nado hẹn akuẹ gú, miklo lọ lẹ yin hihọ̀ dopọ ji, yin bibẹ yì ofi tangan de, bo wá yin didohlan lẹdogbedevomẹtọ he to fi voovo lẹ lẹdo aihọn pé. Na mí họ̀ miklo lọ lẹ dopọ ji wutu, dọla 170, enẹ wẹ nudi 95 000F CFA wẹ miklo dopodopo họ̀—gọna akuẹ didohlan tọn—yèdọ ehe dekuẹ pò taun yijlẹdo akuẹ jọnun dopodopo tọn go.

 Osun avril po mai 2020 po tọn gblamẹ wẹ Azọ́nwatẹn Nuhihọ̀ tọn dona họ̀ azọ́nwanu ehelẹ bosọ do yé hlan te—yèdọ ojlẹ he mẹ azọ́nwhé lẹ ma to azọ́nwa te sọmọ ba na azọ̀nylankan lọ wutu. Etomọṣo, jei vivọnu mai tọn, suhugan azọ́nwatẹn lẹdogbedevomẹ tọn lẹ, wekantọ alahọ tọn lẹ gọna nọtẹn lẹdogbedevomẹ tọn devo lẹ tọn ko mọ azọ́nwanu ehelẹ yí.

 Jay Swinney, nugopọntọ Azọ́nwatẹn Nuhihọ̀ Tọn to Tatọ́-Tẹnnọ dọmọ: “Azọ́nwadopọ dagbe de tin to azọ́nwatẹn Bẹtẹli tọn po azọ́nwhé voovo nusisà tọn lẹ po ṣẹnṣẹn to tito ehe blebu whenu. Gbigbọ Jehovah tọn kẹdẹ wẹ sọgan dona vivẹnudido pọmẹ tọn mítọn lẹ nado yawu wazọ́n ehe bosọ yí nunina mẹmẹsunnu mítọn lẹ tọn zan po nuyọnẹn po.”

 Nicholas Ahladis, he nọ wazọ́n hẹ Azọ́nwatẹn He Nọ Deanana Lẹdogbedevomẹ dọ dọ: “Lẹdogbedevomẹtọ he ko to họ̀nsudo to ojlẹ enẹ mẹ lẹ mọ tuli yí taun whenue yé mọ azọ́nwanu ehelẹ yí. Mahopọnna dọ yé to olá na lẹdogbedevomẹtọ-hatọ yetọn lẹ, yé sọgan wazọ́n dopọ hẹ yé po kọdetọn dagbe po nado lẹ́ hodidọ, nupinpọn-do-plọnnu po ohàn lẹ po do ogbè 500 linlán mẹ.”

 Tito ehe yin dopo to susu devo lẹ mẹ he yin bibasi nado wleawuna Plidopọ Daho 2020 Tọn ‘Nọ Jaya Whepoponu’ tọn ehe na whẹndo mẹmẹsunnu lẹ tọn mítọn lẹdo aihọn pé. Nunina alọtútlú tọn mìtọn gbọn donate.pr418.com ji podọ to aliho devo lẹ wẹ hẹn ẹn yọnbasi nado họ̀ azọ́nwanu dandan tọn ehelẹ.