Mí nọ to jejeji to osun dopodopo mẹ, nado pọ́n tito gbigbọmẹ tọn po video Televiziọn JW tọn he nọ plọnnumẹ taun lẹ po. Etomọṣo, mẹmẹsunnu mítọn susu to Aflika ma sọgan mọ tito enẹlẹ yí gbọn intẹnẹt ji. Etẹwutu?

 Intẹnẹt ma’o jẹ fisusu to Aflika. Podọ to fie e tin-to-aimẹ te lẹ, e ma nọ wazọ́n sọmọ bosọ nọ vẹahi taun. Di apajlẹ, nado yí tito Televiziọn JW tọn osun dopo gee tọn, to Intẹnẹt satẹn de, nugopọntọ lẹdo tọn de to Madagascar dona sú dọla 16 (nudi 9 000 FCFA), ehe hugan azọnkuẹ osẹ dopo tọn na mẹdelẹ! a

 Mahopọnna nuhahun enẹlẹ, gbẹtọ livi susu lẹ wẹ sọgan duvivi JW Televiziọn tọn to Aflika eyin yé ma tlẹ zan Intẹnẹt. Gbọnna?

 Sọn 2017, Televiziọn JW gbọn satellite ji ko tin-to-aimẹ to fi voovo lẹ to Aflika. Yè gán pọ́n televiziọn enẹ vọnu, to azán lẹpo ji madoalọte, to ogbè 16 mẹ.

 Nado jẹ yanwle enẹ kọ̀n Kunnudetọ Jehovah tọn lẹ haya adà de to satellite ji nado nọ do tito voovo lẹ hia. Satellite he mí haya lọ nọ wazọ́n to otò 35 delẹ mẹ to Aflika. Mí dona sú dọla 12 000 linlán (6.6 millions FCFA) to osun dopodopo mẹ. Sọn jlẹ de mẹ jẹ devo mẹ, mí nọ sú akuẹ devo lẹ nado do nujijọ vonọtaun lẹ hia gbọn okàn awetọ devo ji. Tito enẹ nọ gọalọna gbẹtọ fọtọ́n susu nado duvivi plidopọ po tito vonọtaun dlapọn alahọ tọn lẹ po tọn.

 Mẹsusu, ehe bẹ mẹhe ma yin Kunnudetọ lẹ hẹn, nọ pọ́n tito JW tọn lẹ to owhé yetọn lẹ gbè to televiziọn ji. Etomọṣo, e nọ vẹawuna delẹ to mẹ’sunnu mítọn lẹ mẹ nado họ̀ azọ́nwanu he hudo etọn tin nado pọ́n tito lọ lẹ gbọn satellite ji. Nado gọalọna yé, azọ́nwanu delẹ yin awuwlena do Plitẹnhọ Ahọluduta tọn 3 670 linlán mẹ na mẹmẹsunnu po mẹmẹyọnnu lẹ po nido sọgan nọ pọ́n tito Televiziọn JW tọn to finẹ. Yè dona zan nudi dọla 70 (38 850 FCFA) nado họ̀ azọ́nwanu lọ lẹ bo ze yé yì na mẹmẹsunnu lẹ, eyin Plitẹnhọ Ahọluduta tọn lọ ko tindo televiziọn kavi projecteur de. Eyin e ma yinmọ, e gán biọ diblayi dọla 530 (294 150 FCFA) na yè nido họ̀ azọ́nwanu lọ lẹ.

 Mẹmẹsunnu po mẹmẹyọnnu mítọn lẹ po nọ yọ́n pinpẹn tito enẹ tọn taun. Mẹho de to Cameroun dọ dọ: “Na whẹndo mítọn, e taidi manna to danfafa ji nkọ.” Odebode, mẹmẹsunnu Nigeria-nu de dọ dọ: “Whẹndo mítọn nọ nọpọ́ do pọ́n televiziọn lọ whla atọ̀n to sẹmẹ. Visunnu ṣie atọ̀n lẹ nọ to jejeji na jlẹ enẹlẹ. Yé tlẹ nọ biọ dọ mí ni tá televiziọn JW na yé to jlẹ devo lẹ mẹ.” Rose sọn Nigeria, dọ dọ: “E vivi na mi dọ kakati nado nọ pọ́n linlin lẹ to whelẹponu, n’gán nọ pọ́n televiziọn JW gbọn satellite ji todin. Eyin n’pọ́n linlin aihọn tọn lẹ, nue n’nọ mọ lẹ nọ yawu hẹn apọṣi mi bọ ahun ṣie nọ gbàdo. Amọ́ Televiziọn JW nọ namẹ tuli bo ma nọ gbahundonamẹ! N’yiwanna taun. Dona daho de wẹ sọn Jehovah dè.”

 Nugopọntọ lẹdo tọn de to Mozambique na linlin dọ to lẹdo etọn mẹ, azọ́nwanu he hudo etọn tin nado pọ́n televiziọn gbọn satellite ji lẹ yin zizedo Plitẹnhọ Ahọluduta tọn susu mẹ. Mẹmẹsunnu he to agun enẹlẹ mẹ lẹ nọ wá opli lẹ ganhiho dopo kavi humọ jẹnukọn nado pọ́n Televiziọn JW gbọn satellite ji.

 Na plidopọ vonọtaun 2019 tọn he yin bibayi to Johannesburg, Afrique du Sud, hodidọ tangan lẹpo, ehe bẹ dehe dopo to Hagbẹ Anademẹtọ lọ mẹ na lẹ hẹn, wẹ yin didohia to ofi voovo 9 devo lẹ gbọn satellite ji to televiziọn JW ji. Sphumelele, he nọ wazọ́n to Azọ́nwatẹn Televiziọn tọn to alahọ Afrique du Sud tọn mẹ dọ dọ: “Eyin dai wẹ, mí na’o do hodidọ lọ lẹ hia gbọn Intẹnẹt ji. Amọ́ Intẹnẹt lọ dona dohuhlọn taun, podọ e sọ nọ vẹahi. Televiziọn JW gbọn satellite ji pọnte taun, podọ e sọ wazọ́n ganji.”

 Nunina alọtútlú tọn mìtọn lẹ na azọ́n lẹdo aihọn pé tọn lọ wẹ zọ́n bọ mẹmẹsunnu po mẹmẹyọnnu susu po to Aflika sọgan pọ́n Televiziọn JW gbọn satellite ji. Mí yọ́n pinpẹn nunina he mì nọ basi gbọn aliho voovo he tin to donate.pr418.com ji lẹ gblamẹ tọn taun.