LEHE NUNINA MÌTỌN LẸ NỌ YIN YIYIZAN DO

Tito Plidopọ Daho Tọn lẹ He Nọ Yin ‘Sisè Bosọ Nọ Yin Mimọ’

MÌ HÒ (video kavi hoyidokanji lọ)

1^er juillet 2024

E ko yì owhe 130 linlán todin he Kunnudetọ Jehovah tọn egbezangbe tọn lẹ nọ basi plidopọ daho lẹ to whemẹwhemẹ. To egbehe, tito-to-whinnu ehelẹ nọ bẹ hodidọ 40 linlán hẹn to pọmẹ hẹ nuhiho, hokansemẹ lẹ gọna video lẹ. Eyin tito lọ na hẹn ale wá na mẹplidopọ lẹ bosọ whàn yé, e dona yin ‘sisè bosọ yin mimọ’ hezeheze. (Luku 2:20) Nawẹ nunina mìtọn lẹ nọ yin yiyizan gbọn nado hẹn ẹn diun dọ mẹlẹpo gán mọaleyi sọn plidopọ daho ehelẹ mẹ, mahopọnna fihe yé nọ nọ̀?

Azọ́nwanu Gbèzeyiaga po Video po Tọn lẹ Nọ Yin Adàdiọna Sọgbe Hẹ Nọtẹn Dopodopo

To otò he hunnukun lẹ mẹ, bọlugbatẹn po nọtẹn gbangba tọn lẹ po ko nọ tindo azọ́nwanu gbèzeyiaga po video po tọn yetọn titi lẹ. Enẹwutu, whenue mí haya nọtẹn mọnkọ na plidopọ daho lẹ, naegbọn mí nọ saba yí azọ́nwanu mítọn titi lẹ zan? David, yèdọ mẹmẹsunnu de he to Azọ́nwatẹn Televiziọn Tọn Tatọ́-Tẹnnọ tọn dọmọ: “Ofi kleun de to nọtẹn he mí nọ haya lẹ mẹ wẹ tindo azọ́nwanu he na gọalọna mẹplidopọ lẹ nado dotoai po sọwhiwhe po na gànhiho ṣidopo linlán, yèdọ tito-to-whinnu de he nọ saba bẹ hodidọ lẹ hẹn. Di apajlẹ, nọtẹn agbàwhinwhlẹn tọn lẹ nọ zan azọ́nwanu gbèzeyiaga po video po tọn he nọ yin yiyizan titengbe nado basi nulila kavi nado hò adà kleunkleun nuhiho lẹ tọn. Yẹpotin yetọn lẹ nọ do agó po ajọjijla lẹ po hia, bosọ nọ vọ́ nujijọ he wá aimẹ to aihundida lọ whenu lẹ dohia to kleun mẹ. To vogbingbọn mẹ, mí nọ jlo dọ mẹplidopọ mítọn lẹ ni pọ́n video he dite humọ lẹ, sè nuhe na yin didọ sọn oplò ji lẹ bosọ mọnukunnujẹ yé mẹ hezeheze.”

Na nọtẹn plidopọ daho tọn lẹ nọ gbọnvo na yede wutu, azọ́nwanu gbèzeyiaga po video po tọn lẹ dona yin adàdiọna sọgbe hẹ nọtẹn lọ. Tlolo he nọtẹn de yin dide, Azọ́nwatẹn Televiziọn Tọn to alahọ mítọn lẹ mẹ nọ basi tito fihe mẹplidopọ lẹ na sin tọn, sọgbe hẹ sọha mẹhe na wá lẹ po gbigblo nọtẹn lọ tọn po. Enẹgodo, mẹmẹsunnu lẹ nọ magbe fihe hodọtọ lẹ gọna yẹpotin lẹ dona nọ tọn, nọ basi tito lehe yé na yin ṣiṣakadopọ do, bo nọ wá basi todohukanji azọ́nwanu he sin hudo yé na do lẹ tọn nado hẹn ẹn diun dọ mẹplidopọ lẹ na mọ bosọ dotoaina tito lọ ganji.

Mẹmẹsunnu he nọ wazọ́n to Azọ́nwatẹn Televiziọn tọn (LBD) lẹdo de tọn lẹ nọ hodo tito he yin awuwlena ganji de po sọwhiwhe po.

Tito-bibasina azọ́nwanu gbèzeyiaga po video po tọn lẹ tlẹ sọ nọ gẹdẹ humọ to fie tito-to-whinnu plidopọ lọ tọn lẹ na yin zizedonukọnnamẹ to ogbè voovo mẹ te lẹ. Eyin tito lọ na yin lilẹdogbedevomẹ, azọ́nwanu gbèzeyiaga po video po tọn lẹ dona yin awuwlena na gbesetọ lọ lẹ, enẹgodo, nuhe dọ yé te lẹ dona yin didohlan mẹhe sè ogbè enẹlẹ gbọn okàn ji to aliho devo mẹ. Po alọgọ azọ́nwanu nuhiho tọn vonọtaun lẹ tọn po, video de gán yin didohia mẹplidopọ lẹpo to ojlẹ dopolọ mẹ, eyin hodidọ he zọnpọ hẹ video lọ na tlẹ yin sisè to ogbè voovo ṣinatọ̀n mẹ. David dọmọ: “Tito-bibasina azọ́nwanu gbèzeyiaga po video po tọn ehelẹ nọ doglẹ taun, podọ mẹdezejotọ he nọ penukundo yé go lẹ dona mọ azọ́nplọnmẹ susu yí.”

Suhugan alahọ lẹ tọn wẹ tindo azọ́nwanu gbèzeyiaga po video po tọn delẹ to sẹdotẹnmẹ he yé nọ yizan to whemẹwhemẹ. To fie e to mọ te lẹ, mẹmẹsunnu lẹ nọ basi tito na azọ́nwanu ehelẹ dopodopo nido yin bibẹ sọn nọtẹn plidopọ tọn de ji jẹ devo ji. Alahọ États-Unis tọn kẹdẹ nọ zan dọla 200 000 a linlán to whemẹwhemẹ nado do azọ́nwanu lọ lẹ hlan nọtẹn plidopọ daho tọn lẹ ji poun. Etomọṣo, ehe nọ zọ́n bọ akuẹ he nọ yin yiyizan nado họ̀ azọ́nwanu devo lẹ dogọ bosọ penukundo yé go nọ depò. Steven he gọalọ nado penukundo azọ́nwanu gbèzeyiaga po video po tọn go to plidopọ daho de ji to Canada dọmọ: “Pipli mítọn he nọ penukundo azọ́nwanu lọ lẹ go nọ wà nuhe go e pé lẹpo nado hẹn ẹn diun dọ adà azọ́nwanu lọ lẹ tọn dopodopo sin afọ pé, yin nukunpedego ganji, yin sisẹdo to aliho he do hihọ́ de mẹ, podọ yé to gbesisọ mẹ nado yin yiyizan to plidopọ he bọdego ji.”

Azọ́nwanu lọ lẹ Hihọ̀ po Nukunpipedo Yé Go Po

Azọ́nwanu gbèzeyiaga po video po tọn lẹ hihaya nọ vẹakuẹ taun, podọ yé ma nọ saba yọ́n sọmọ kavi ma nọ yin nukunpedego ganji. Enẹwutu, mílọsu wẹ nọ saba họ̀ azọ́nwanu he sin hudo mí do lẹ. To alọnu din, yẹpotin adógo tọn daho he gblo na mẹtlu 5 bo yiaga na mẹtlu 3 nọ họ̀ nudi dọla 24 000, bọ miklo-kàn dopo he tlẹ dite na mẹtlu 15 nọ họ̀ nudi dọla 20. Enẹwutu, Azọ́nwatẹn Televiziọn tọn nọ wazọ́n po Azọ́nwatẹn Nuhihọ̀ tọn po nado “lẹn akuẹ etọn whẹ́” whẹpo do họ̀ azọ́nwanu depope. (Luku 14:28) Di apajlẹ, yé nọ kanse yede omẹ nẹmu wẹ na mọaleyi sọn azọ́nwanu ehelẹ mẹ? Be azọ́nwanu yọyọ lẹ hihọ̀ wẹ yin aliho he yọ́n hugan nado sudo nuhudo lọ tọn ya? Be mí tindo nọtẹn dagbe de he mí na nọ bẹ azọ́nwanu ehelẹ do, podọ be mí tindo nuyizan gọna mẹdezejotọ he yin azọ́nplọn nado nọ penukundo yé go lẹ ya?

Nado mọ azọ́nwanu gbèzeyiaga po video po tọn lẹ zan na ojlẹ dindẹn, bosọ dowéna nunina akuẹ tọn lẹ, mílọsu nọ jla azọ́nwanu lọ lẹ do whẹwhẹ. Humọ, mí sọ nọ bẹ azọ́nwanu lọ lẹ do apotin he sọgbe lẹ mẹ, ehe nọ zọ́n bọ yé nọ tin to hihọ́ mẹ, podọ apotin ehelẹ lọsu nọ yin vivọjlado eyin e biọ domọ.

Nukunpipedo azọ́nwanu gbèzeyiaga po video po tọn lẹ go po vivọ́ yé jlado po nọ zọ́n bọ yé nọ dọ́jì.

Kunnudide Dagbe de Gọna Tito-to-Whinnu de He E Bọawu Nado Hodo

Awú nọ ji mẹdelẹ he ma yin Kunnudetọ na nuhe yé nọ sè bosọ nọ mọ to plidopọ daho mítọn lẹ ji wutu. Di apajlẹ to plidopọ daho de ji, azọ́nwatọ de he nọ wazọ́n hẹ dopo to azọ́nwhé ladio po televiziọn po tọn he diyin hugan to aihọn lọ mẹ doayi e go dọ nuhe tito-to-whinnu mítọn gọna adà voovo he e nọ bẹhẹn lẹ nọ hẹn awuji mẹ taun. Jonathan he nọ gọalọ nado penukundo azọ́nwanu gbèzeyiaga po video po tọn lẹ go to plidopọ daho lẹ ji dọ gando dawe lọ go dọ, “E jiawu na ẹn whenue e mọdọ mẹhe to azọ́nwa to pipli mítọn mẹ lẹpo wẹ yin mẹdezejotọ lẹ bọ e ma yin azọ́n lọ watọ lẹ. E dọ dọ eyin azọ́nwanu lọ lẹ na wazọ́n ganji, e na yí azán atọ́n to azọ́nwhé emitọn si nado dotana nuhe mílẹ nọ yí azán dopo daa poun do bayi lẹ.” To plidopọ daho devo ji, ogán nọtẹn he mí haya lọ tọn dọ dọ, “Azọ́nyọnẹntọ nuhiho po video po tọn susu lẹ wẹ ko wá wazọ́n tofi pọ́n, amọ́, n’ma ko mọ azọ́nyinyọnẹn po anazọ́n ehe nkọ po pọ́n gbede.”

Mẹmẹsunnu po mẹmẹyọnnu lẹ po to vivi tito-to-whinnu lọ tọn dù

Be azọ́nwanu gbèzeyiaga po video po tọn lẹ ko hẹn ale wá na we to plidopọ daho de ji ya? Vlavo numọtolanmẹ dopolọ wẹ a tindo hẹ David he wá sọn Angleterre. E dọmọ: “Owhe 88 wẹ n’do, bo ko sọ yì plidopọ daho lẹ to gbẹzan ṣie blebu mẹ. Ṣogan, e bọawu todin hugan gbede pọ́n nado na ayidonugo mlẹnmlẹn tito-to-whinnu lọ. Video dagbedagbe ehelẹ zọ́n bọ tito lọ blebu yì linsinlinsin bosọ yawu juwayi, podọ nudọnamẹ lọ lẹ họnwun dogọ bosọ do kanṣiṣa.” Micheal he nọ nọ̀ Nigéria doayi e go dọ, “Na e masọ nọ vẹawuna mẹmẹsunnu mítọn lẹ nado sè nuhe dọ hodọtọ lọ te kavi nado pọ́n video lẹ ba wutu, yé nọ penugo nado ze ayiha do fidopo podọ yé ma nọ yin ayihafẹsẹna to tito-to-whinnu lọ whenu.”

To owhe ehe mẹ, dile a na to Plidopọ daho kavi Plidopọ Vonọtaun he hosọ etọn yin “Lá Wẹndagbe Lọ!” ji, yí whenu nado lẹnnupọndo nuhe e biọ na a nido sè bosọ mọ tito-to-whinnu lọ lẹpo ji. Mí yọ́n pinpẹn nunina mìtọn lẹ tọn, etlẹ yin dehe nọ yin bibasi gbọn donate.pr418.com ji lẹ, he gọalọ nado hẹn ehe yọnbasi. Mì wanu kaka.

a Dọla he yin nùdego to hosọ ehe mẹ lẹpo yin dọla États-Unis tọn.