“To ojlẹ delẹ die wayi, mí ma gán ’o lẹndọ nuyizan lẹtliki tọn lẹ wẹ na yin yiyizan titengbe nado na mí núdùdù gbigbọmẹ tọn.” Be a ma kọngbedopọ hẹ hogbe enẹlẹ ya? Hodidọ tulinamẹ tọn he mẹ’sunnu Geoffrey Jackson na to Linlin Agọe Tọn Hagbẹ Anademẹtọ Tọn 6tọ 2020 tọn mẹ, wẹ hogbe enẹlẹ sọawuhia te. E zindonukọn dọ: “Amọ́ to alọnu din, mí gán to kinkanse míde dọ, nawẹ e na pà mí gbọn eyin azọ́nwanu lẹ taidi JW Library ma ko tin wẹ. E họnwun dọ Jehovah wẹ to awuwledai na mí na ninọmẹ ehe nkọ.”

 Nawẹ Jehovah to awuwledai na mí gbọn? Azọ́n tẹlẹ wẹ yin wiwà nado wleawuna aplikasiọn JW Library, podọ etẹwẹ e nọ biọ nado penukundego bo hẹn ẹn pọnte dogọ?

 To mai 2013, Hagbẹ Anademẹtọ lọ biọ to azọ́nwatẹn MEPS tọn he to tatọ́-tẹnnọ mítọn si nado wleawuna aplikasiọn de he na bẹ Lẹdogbedevomẹ Aihọn Yọyọ Tọn he yin vivọjlado lọ hẹn. Mẹ’sunnu Paul Willies he nọ wazọ́n to azọ́nwatẹn MEPS tọn dọ dọ: “Kakajẹ ojlẹ enẹ mẹ, mí ma ko de aplikasiọn de tọ́n bọ yè gán mọ to nọtẹn Intẹnẹt tọn he yè nọ yí aplikatiọn lẹ te. Etomọṣo, mí wleawuna pipli de bo jo azọ́n delẹ do whẹ́ bosọ wazọ́n po azọ́nwatẹn devo lẹ po nado wleawuna aplikasiọn lọ po nuhe na nọ e mẹ lẹ po. Whlasusu wẹ mí hodẹ̀, podọ Jehovah gọalọ bọ aplikasiọn lọ yin didetọn to osun atọ́n poun godo to opli whemẹwhemẹ tọn ji!”

 Nuhe kàn dẹpẹ biọ devo he mí pehẹ wẹ nado bayi aplikasiọn lọ, na e nido lẹzun wesẹdotẹn de he na bẹ zinjẹgbonu po ogbè susu po hẹn. To janvier 2015, suhugan zinjẹgbonu yọyọ mítọn lẹ tọn ko yin awuwlena do aplikasiọn lọ mẹ to Glẹnsigbe mẹ, podọ to osun ṣidopo poun godo zinjẹgbonu enẹlẹ ko tin-to-aimẹ nado mọyi to ogbè kanweko susu devo lẹ mẹ.

 Sọn whenẹnu gbọ́n, mẹmẹsunnu mítọn lẹ ko vọ́ azọ́nwa do aplikasiọn lọ ji to aliho susu mẹ bo gọ́ video lẹ na, yé sọ bẹ zinjẹgbonu po yẹdide he na yin yiyizan na opli agun tọn lẹ po do adà dopo glọ, bosọ hẹn ẹn bọawu nado zan alọdlẹndonu Anademewe Dodinnanu Tọn do wefọ Biblu tọn dopodopo ji tlọlọ.

 Alokan, tablẹti kavi nuyizan mọnkọ livi 8 wẹ nọ hùn JW Library egbesọegbesọ, podọ nuyizan mọnkọ livi 15 linlán lẹ ji wẹ yè nọ zan ẹn te to sunmẹsunmẹ. Etẹwẹ e nọ biọ na aplikasiọn lọ nido to azọ́nwa ganji to nuyizan enẹlẹ ji? Mẹ’sunnu Willies bayi zẹẹmẹ dọ: “Azọ́n ma ko fó do aplikasiọn lọ ji. Mí gbẹ́ to azọ́nwa nado yí adà yọyọ lẹ dogọ podọ nado hẹn ẹn bọawu dogọ nado zan. Sọn ojlẹ de mẹ jẹ devo mẹ wẹ yè nọ bayi vọjlado na nuyizan he nọ zan Intẹnẹt lẹ, enẹwutu mí dona nọ vọ́ azọ́nwa do aplikasiọn lọ ji whẹwhẹ, na e nido nọ wazọ́n ganji to nuyizan yọyọ enẹlẹ ji. Podọ mí sọ dona penukundo azọ́nwanu he mí do wleawuna aplikasiọn lọ go bo nọ vọ́ azọ́nwa do e ji, na zinjẹgbonu po hoyidokanji he nọ yin yiyido JW Library mẹ lẹ po fọ́n bo to jijẹ e ji wutu.” Eyin mí hia nuhe tin to ogbè voovo mẹ to JW Library mẹ to alọnu lẹpo, mí na mọ zinjẹgbonu 200 000 nkọ gọna hoyidokanji po video 600 000 linlán po!

 Nuhe sin hudo mí do nado to nukunpedo aplikasiọn lọ go ganji zọnmii ma yin ọdinatẹẹ kẹdẹ. Mí dona sú akuẹ nado zan tito ọdinatẹẹ tọn delẹ. Akuẹ he mí nọ sú na tito ọdinatẹẹ tọn dopo tata to owhe dopo mẹ nọ yì dọla Amelika tọn 1 500 (nudi 800 000F CFA). Gbọnvona enẹ, azọ́nwatẹn MEPS tọn nọ zan nudi dọla Amelika tọn 10 000 (nudi 5 000 000F CFA) to whemẹwhemẹ do họ̀ azọ́nwanu he azọ́nwhé voovo lẹ nọ bayi nado hẹn ẹn diun dọ aplikasiọn lọ wazọ́n ganji to ọdinatẹẹ, tablẹti po alokan he ṣẹṣẹ tọ́n lẹ po ji.

 JW Library ko zọ́n bọ akuẹ he mí nọ zan do zín owe lẹ jẹgbonu bo blá yé bosọ do yé hlan fihe yé dona yì lẹ ko depò taun. Mí ni yí alọnuwe lọ, Dogbapọnna Owe-Wiwe lẹ Egbesọegbesọ do na apajlẹ. Diblayi vọkan livi 12 alọnuwe lọ Dogbapọnna Owe-Wiwe lẹ Egbesọegbesọ—2013 tọn wẹ mí zinjẹgbonu. Amọ́ nudi livi 5 poun zinjẹgbonu 2020 tọn wẹ yin zinzinjẹgbonu, dile etlẹ yindọ mí do wẹnlatọ 700 000 dogọ lẹdo aihọn pé. Naegbọn diọdo ehe do wá aimẹ? Nulọ wẹ yindọ susu to mẹ’sunnu po mẹ’yọnnu mítọn lẹ po mẹ, wẹ nọ zan JW Library do hia wefọ egbesọegbesọ tọn. a

 JW Library sọ nọ gọalọna mẹhe to zinzan ẹn lẹ to aliho susu mẹ. Geneviève he nọ nọ̀ Canada mọdọ aplikasiọn lọ zọ́n bọ emi nọ plọnnu whẹwhẹ. E dọ dọ: “Nado dọ hójọhó, eyin n’na bẹ owe he sin hudo n’do lẹpo pli wẹ, n’ma lẹndọ n’gán nọ plọnnu to afọnnu lẹpo. Amọ́ na aplikasiọn ehe wutu, n’nọ ze tablẹti ṣie, na nue sin hudo n’do lẹpo wẹ to e mẹ. Nupinplọn to gbesisọmẹ ko hẹn yise ṣie lodo bosọ hẹn mi sẹpọ Jehovah dogọ.”

 Aplikasiọn lọ sọ yọ́n-na-yizan taun to ojlẹ azọ̀nylankan COVID-19 tọn mẹ. Charlyn he wá sọn États-Unis bayi zẹẹmẹ dọ: “Hugan owhe dopo, n’ma mọ depope to owe yọyọ mítọn he yin zinzinjẹgbonu lẹ mẹ, na COVID-19 to núgbà lẹdo aihọn pé wutu. Amọ́, JW Library ko zọ́n bọ mí mọ núdùdù gbigbọmẹ tọn he sin hudo mí do lẹ, podọ n’dopẹna Jehovah na awuwledainanu owanyinọ ehe.”

 Faye he nọ nọ̀ Philippines do numọtolanmẹ he mẹsusu do. E dọmọ: “Aplikasiọn huhlọnnọ ehe wẹ gọalọna mi nado vẹ́ po Jehovah po dogọ. Uwọ wẹ n’nọ zan do hiawe to afọnnu lẹ. N’nọ dotó ohàn lẹ to e ji, eyin n’to whégbè-zọ́n lẹ wà. N’nọ zan ẹn do wleawuna opli lẹ, podọ do wleawuna oplọn ṣie lẹ. N’nọ pọ́n video lẹ to e ji, eyin alọnu ṣie vò. N’nọ hia hosọ he tọ́n lẹ kavi Biblu to e ji, eyin n’to fie gbẹtọ sù te bo dona tò. E họakuẹ taun.”

 Aplikasiọn lọ sọ yọ́n-na-yizan taun to lizọnyizọn lọ mẹ. Di apajlẹ, mẹ’yọnnu de to kunnude to Cameroun, bo jlo na zan wefọ de he e mọ bọ mẹ’yọnnu devo zan to osẹ delẹ die wayi. Amọ́, e ma flin fie e na mọ wefọ lọ te. E dọ dọ: “N’dopẹ́ dọ n’flin hogbe delẹ to wefọ lọ mẹ. N’tá aplikasiọn lọ bo hùn Biblu bosọ dín hogbe lọ lẹ. Tlolo wẹ n’mọ wefọ he dín n’te lọ. Azọ́nwanu ehe ko gọalọna mi nado mọ wefọ susu he n’nọ wọn lẹ.”

 Nunina he mì nọ yí homẹdagbe do bayi sọgbe hẹ aliho he yin nùdego to donate.pr418.com ji lẹ wẹ gọalọ nado wleawuna aplikasiọn JW Library bosọ penukundego, podọ nado vọ́ azọ́nwa do e ji bo hẹn ẹn pọnte dogọ na mẹ’sunnu po mẹ’yọnnu mítọn lẹ po lẹdo aihọn pé. Mì wanu taun na gbigbọ alọtútlú tọn mìtọn.

1. Octobre 2013—Aplikasiọn lọ yin didetọn bo bẹ Lẹdogbedevomẹ Aihọn Yọyọ Tọn he yin vivọjlado lọ hẹn

2. Janvier 2015—Zinjẹgbonu devo lẹ to Glẹnsigbe mẹ yin awuwlena do e mẹ, podọ ogbè kanweko devo lẹ bọdego

3. Novembre 2015—Lehe yè gán dohiagona fihe jlomẹ po sinmẹ voovo po do yin yiyidogọ

4. Mai 2016—Adà opli lẹ tọn yin yiyidogọ

5. Mai 2017—Nuhe na zọ́n bọ yè gán kannu do e mẹ yin yiyidogọ

6. Décembre 2017—Nuhe gando Biblu Oplọn tọn go lẹ yin yiyidogọ

7. Mars 2019—Yè sọ gọ́ nudevo na he zọ́n bọ e nọ bọawu nado mọ hoyidokanji lẹ yí bosọ pọ́n video lẹ to e ji tlọlọ, podọ alọdlẹndonu Anademẹwe Dodinnanu Tọn lẹ yin yiyidogọ

8. Janvier 2021—Adà yọyọ devo lẹ yin yiyidogọ owe lọ Duvivi Ogbẹ̀ Tọn Kakadoi!